Read Samoan Old Version Bible – O LE TUSI PAIA II. SAMUELU, 5 Bible Online

II. SAMUELU, 5 - Samoan Old Version Bible – O LE TUSI PAIA bible

II. SAMUELU, 5

¹Ua o mai itu aiga uma o Isaraelu ia Tavita i Heperona, ona latou fai mai lea, ua faapea, Faauta, o i matou o ou ivi ma ou aano i matou nei;

²o anamua foi, ina o fai Saulo ma tupu ia te i matou, o oe lava sa ē feta‘ita‘ina‘i ia Isaraelu; na fetalai foi Ieova ia te oe, E te leoleo i lo‘u nuu o Isaraelu, e fai foi oe ma ta‘ita‘i ia Isaraelu.

³Ona o mai lea o toeaina uma o Isaraelu i le tupu i Heperona; ua osi le feagaiga a i latou ma le tupu o Tavita i Heperona i luma o Ieova, ma latou faauu ia Tavita e fai ma tupu ia Isaraelu.

⁴Sa tolu sefulu o tausaga o Tavita ina ua fai o ia ma tupu; e fa sefulu o tausaga sa fai ai o ia ma tupu.

⁵Sa fai o ia ma tupu i Heperona ia Iuta i tausaga e fitu ma masina e ono; a ua fai o ia ma tupu i Ierusalema ia Isaraelu uma atoa ma Iuta, i tausaga e tolu sefulu ma le tolu.

⁶Ona o atu lea o le tupu ma ona tagata i Ierusalema i sa Iepusē o e sa nonofo i le nuu. A ua latou fai mai ia Tavita, ua faapea mai, E te le sao mai iinei, seia muai ave ese i e tauaso ma e pipili; ua faapea i latou, E le masao mai Tavita iinei.

⁷A ua aea e Tavita le ‘olo o Siona, o le aai a Tavita lea

⁸Ona fai ane lea o Tavita i lea aso, O sē fasi i sa Iepusē, ma oo atu i le alāvai, ma fasi i e pipili ma e tauaso ua inosia lava e Tavita, e fai o ia ma alii sili. O le mea lea ua latou fai ane ai, O e tauaso ma e pipili latou te le o mai i le fale.

⁹Ona nofo ai lea o Tavita i le ‘olo, ua ia faaigoa ai, O le aai a Tavita. Ua ati faataamilo e Tavita, e afua mai i Milo a e oo i totonu.

¹⁰Ua tupu pea lava le mamalu o Tavita, sa ia te ia foi Ieova le Atua o ‘au.

¹¹Ua auina mai e Hiramo le tupu o Turo le sāvali ia Tavita, ma na avatu ai laau o arasi, ma tufuga, ma tufuga ati fale; ua latou faia le fale mo Tavita.

¹²Ona iloa ai lea e Tavita ua faatumauina o ia e Ieova e fai ma tupu ia Isaraelu, ma ua faamaualugaina lona malo ona o lona nuu o Isaraelu.

¹³Ua toe fai e Tavita o palake ma avā i Ierusalema, ina ua alu atu nai Heperona; ua toe fanau foi atalii ma afafine o Tavita.

¹⁴O igoa nei o e na fanaua e ia i Ieruselema; o Samua, ma Sopapa, ma Natano, ma Solomona,

¹⁵ma Ivara, ma Elisua, ma Nefeku, ma Iafia,

¹⁶ma Elisama, ma Eliata, ma Elifaleta.

¹⁷Ua faalogo Filisitia ua faauuina Tavita e fai ma tupu ia Isaraelu, ona o ae lea o Filisitia uma e saili ia Tavita; ua lagona e Tavita, ona alu ifo lea o ia i le ‘olo.

¹⁸Ua o atu Filisitia, ma salalau i latou i le vanu o sa Rafā.

¹⁹Ona fesili atu lea o Tavita ia Ieova, ua faapea atu, Ou te alu ae ea ia Filisitia? E te tuuina mai ea i latou i lo‘u lima? Ona fetalai mai lea o Ieova ia Tavita, Alu ae ia, auā ou te tuuina atu lava o Filisitia i lou lima.

²⁰Ua alu atu Tavita i Paala-faresa, ona fāsia lea o i latou e Tavita i lea mea; ona fai ane lea o ia, Ua osofia o‘u fili e Ieova i o‘u luma, pei o le oso mai o le vai, o le mea lea na ia faaigoa ai lea mea o Paala-faresa.

²¹Ua latou tuulafoai ai o a latou tupua, ona ave ese ai lea e Tavita ma ona tagata.

²²Ua toe o ae Filisitia, ma salalau i latou i le vanu o sa Rafā.

²³Ona fesili atu lea o Tavita ia Ieova; ona fetalai mai lea o ia, Aua e te alu ae, a ia e faataamilo i o latou tua, ma ia alu atu ia te i latou i tala ane o laau o peka.

²⁴A e faalogo i le pāūū o le savali mai i tumutumu o laau o peka, ona e faataalise ai lea, auā ua alu atu ai Ieova i ou luma e fasi i le itu taua a Filisitia.

²⁵Ona faia lava lea e Tavita, pei ona fetalai mai ai o Ioeva ia te ia; ua na fāsia Filisitia, e afua mai i Kepa e oo atu i Kasera.