Read Samoan Old Version Bible – O LE TUSI PAIA II. SAMUELU, 8 Bible Online

II. SAMUELU, 8 - Samoan Old Version Bible – O LE TUSI PAIA bible

II. SAMUELU, 8

¹Ua mavae nei mea ona fāsia lea e Tavita ia Filisitia, ma na faatoilaloina i latou; ua faoa foi e Tavita Meti-ama ai lima o Filisitia.

²Ua ia fāsia foi Moapi, ona fuatia lea o i latou i le maea, o loo lafo i latou i le eleele, ma na fuatia i latou i maea e lua e fasioti ai, ma le maea āuāu e faaola ai. Ua faia foi Moapi ma pologa ia Tavita, ua latou au mai ai taulaga.

³Ua fasi foi e Tavita ia Atatesa le atalii o Reopo, le tupu o Sopa, ina ua alu atu o ia e faaoo lana pule i le vaitafe o Eufirate.

⁴Ua maua foi e Tavita nai ia te ia o e tietie i solofanua e tasi le afe ma le fitu galau, ma ‘au e savavali, o tagata e lua sefulu o afe; ona vaevae lea e Tavita o ua o vae o solofanua i kariota uma; a ua faasao ai māna o kariota e selau.

⁵Ua o mai Suria nai Tamaseko e fesoasoani ia Atatesa le tupu o Sopa, ona fāsia lea e Tavita o Suria e lua sefulu o afe, ma afe e lua o tagata.

⁶Ona tuu lea e Tavita o leoleoga i Suria Tamaseko; ua fai ma pologa Suria ia Tavita, ua latou aumaia taulaga. Ua faasaoina Tavita e Ieova i mea uma na ia fealuai ai.

⁷Ua avea e Tavita o talita auro sa i ai i auauna a Atatesa, ua ia au mai ai i Ierusalema.

⁸A o Peta ma Perota o aai a Atatesa, na avea ai e le tupu o Tavita o apa memea e matua tele lava.

⁹Ua lagona e Toi le tupu o Amato, ua fāsia e Tavita ‘au uma a Atatesa,

¹⁰ona auina mai lea e Toi o lona atalii o Iorama i le tupu o Tavita e alofa atu ia te ia, ma faafetai ia te ia, ina ua la tau o ia ma Atatesa, ma ua fasia o ia e ia; auā sa va tau Toi ma Atatesa. Ua au mai foi e ia o ipu ario, ma ipu auro, ma ipu ‘apa memea.

¹¹O mea foi ia sa faasa e le tupu o Tavita ia Ieova, atoa ma le ario ma le auro sa na faasaina mai nuu ese uma sa na faatoilaloina;

¹²o Suria, ma Moapi, ma le fanauga a Amoni, ma Filisitia, ma Amaleka, ma vete mai ia Atatesa le atalii o Reopo le tupu o Sopa.

¹³Ona viia lea o le suafa o Tavita ina ua foi o ia nai le fasiga o Suria i le vanu masimā, o tagata e sefulu afe ma afe e valu.

¹⁴Ua ia tuu foi o leoleoga i Etoma; o Etoma uma lava ua ia tuu i ai leoleoga; ua fai ma pologa Etoma uma ia Tavita. Ua faasao e Ieova ia Tavita i mea uma na ia fealuai ai.

¹⁵Ua faia Tavita ma tupu i Isaraelu uma, ua fai foi e Tavita le faamasinoga ma le tonu i lona nuu uma lava.

¹⁶O Ioapo le tama a Seruia, ua pule o ia i ‘au; o Iosefatu le atalii o Ailuta, o le fātua‘iupu o ia;

¹⁷o Satoka le atalii o Akitopo, ma Aimeleka le atalii o Aviata, o faitaulaga i laua;

¹⁸a o Seraia o le tusiupu ia; o Penaia le atalii o Ioiata sa pule ia i le au Kereti ma le au Peleti; a o atalii o Tavita o faipule i latou.