Read Samoan Old Version Bible – O LE TUSI PAIA I TUPU, 12 Bible Online

I TUPU, 12 - Samoan Old Version Bible – O LE TUSI PAIA bible

I TUPU, 12

¹Ua alu atu Reopoamo i Sekema, auā ua o mai Isaraelu uma lava i Sekema ia fai o ia ma tupu.

²Ua faalogo ai Ierepoamo le atalii o Nepata a o i Aikupito o ia; auā na sola o ia ai luma o le tupu o Solomona, na nofo foi Ierepoamo i Aikupito.

³Ona latou aauina atu lea nisi e aami atu ia te ia. Ona latou o mai lea o Ierepoamo ma le faapotopotoga uma o Isaraelu, ua latou tautala atu ia Reopoamo, ua faapea atu,

⁴Na faamamafaina e lou tamā o la matou amo; o lenei, ia e faamāmā le galuega tiga a lou tamā, ma lana amo mamafa na ia faaeetia ia te i matou, ona matou auauna ai lea ia te oe.

⁵Ona fai atu lea o ia ia te i latou, Ina o ia outou seia oo i ē luā, i le tou toe foi mai ai ia te au; ona ō ai lea o le nuu.

⁶Ona filifili lea o le tupu o Reopoamo ma toeaina e na tutū i luma o lona tamā o Solomona ina o ola o ia, ua faapea atu, Se a se mea tou te fai mai ou te tali atu ai i lenei nuu?

⁷Ona latou tali mai lea ia te ia, ua faapea mai, Afai e te fai ma auauna i lenei nuu i le aso nei, ma e auauna ia te i latou, ma e tali atu ia te i latou, ma e tautala atu ia te i latou i upu lelei, ona fai ai lea o i latou mau auauna e faavavau.

⁸A e peitai ua tuua e ia le upu a toeaina na latou faatonu mai ai ia te ia, ona filifili lea o ia ma taulelea o e na tutupu faatasi ma ia, o e na tutū i ona luma.

⁹Ua fai atu ia ia te i latou, Se a la outou e fai mai ina ia tatou tali atu ai i lenei nuu ua tautala mai ia te au, ua faapea mai, Ia e faamāmā le amo na faaeetia e lou tamā ia te i matou?

¹⁰Ona fai mai lea ia te ia o taulelea o e na tutupu faatasi ma ia, ua faapea mai, Ia e faapea atu i lenei nuu na tautala mai ia te oe, ua faapea mai, Na faamamafaina e lou tamā o la matou amo, a ia e faamāmāina ia te i matou; ia faapea ona e fetalai atu ia te i latou, O lo‘u lima tama e tele lava lea i le sulugatiti o lo‘u tamā.

¹¹Na faaeetia e lo‘u tamā le amo mamafa ia te outou; a o a‘u, ou te faaopoopoina atu i la outou amo; na aoai atu lo‘u tamā ia te outou i sasa; a o a‘u, ou te aoai atu ia te outou i akarava.

¹²Ona o mai lea o Ierepoamo ma le nuu uma ia Reopoamo i le aso tulu, e pei ona fai mai ai o le tupu, ua faapea mai, Tou te toe foi mai ia te au i e luā.

¹³Ona tali atu lea o le tupu i le nuu male saua; ua tuua e ia le upu a toeaina na latou faatonuina atu ia te ia;

¹⁴a e tautala atu ia te i latou e tusa ma le upu a taulelea, ua faapea atu, Na faamamafaina e lo‘u tamā o la outou amo; a o a‘u, ou te faaopoopoina atu i la outou amo; na aoai atu lo‘u tamā ia te outou i sasa; a o a‘u, ou te aoai atu ia te outou i akarava.

¹⁵Ua le faalogo lava le tupu i le nuu; auā mai ia Ieova lea mea ina ia faataunuu lana afioga a fetalai mai ai Ieova na aumaia e Akia le Sailo ia lerepoamo le atalii o Nepata.

¹⁶Ua iloa e Isaraelu uma lava e lei faalogo mai le tupu ia te i latou, ona tali atu lea o le nuu i le tupu, ua faapea atu, So matou tofi ea Tavita? E le so matou tofi le atalii o Iese. Isaraelu e, ina o ia outou i o outou fale ie. O lenei, Tavita e, faitalia oe i lou aiga. Ona o ai lea o Isaraelu i o latou fale ie.

¹⁷A o le fanauga a Isaraelu sa nonofo i aai o Iuta, na fai Reopoamo ma tupu ia te i latou.

¹⁸Ona auina atu lea e le tupu o Reopoamo o Aturamo o le pule i taulaga, a ua fetogi Isaraelu uma ia te ia i maa, ua oti ai o ia. Ona faataalise lea o le tupu o Reopoamo e alu ae i lona kariota, e sola atu i Ierusalema.

¹⁹Ua foua foi e Isaraelu le aiga o Tavita, ua oo lava i ona po nei.

²⁰Ua faalogo e Isaraelu uma ua foi mai Ierepoamo, ona latou aauina atu ai lea nisi e aami atu ia te ia e sau i le faapotopotoga, ona latou fai lea o ia ma tupu i Isaraelu uma; e leai se na mulimuli atu i le aiga o Tavita, ua na o le itu aiga lava o Iuta.

²¹Ua oo Reopoamo i Ierusalema, ona faapotopoto ai lea e ia o le aiga uma lava o Iuta, ma le itu aiga o Peniamina e selau afe ma afe e valu sefulu, o e ua filifilia, o e ua taulia taua, e tau ma le aiga o Isaraelu, ia toe maua mai le malo mo Reopoamo le atalii o Solomona.

²²A ua tŭlei mai le afioga a le Atua ia Semaia le tagata o le Atua, ua faapea mai,

²³Ina fai atu ia ia Reopoamo le atalii o Solomona le tupu o Iuta, ma le aiga uma o Iuta ma Peniamina, ma e o totoe i le nuu, ia faapea atu,

²⁴O loo ua faapea ona fetalai mai o Ieova, Aua ne‘i tou o ae, aua ne‘i tou sii atu le taua i o outou uso le fanauga a Isaraelu; ia taitasi outou ma foi atu i lona aiga; auā e mai ia te au lenei mea. Ona latou faalogo lea i le afioga a Ieova, ua liliu ma toe foi atu, e tusa ma le afioga a Ieova.

²⁵Ua faia e Ierepoamo o Sekema i le mauga o Efaraima, ma nofo ai; na ia alu atu ai foi ma na faia o Penueli.

²⁶Ona fai ifo lea o Ierepoamo i lona loto, Anei e toe foi le malo i le aiga o Tavita;

²⁷afai e o ae lenei nuu e fai taulaga i le fale o Ieova i Ierusalema, ona toe liliu ai lea o le loto o lenei nuu i lo latou alii, o Reopoamo le tupu o Iuta, ona latou fasioti ai lea ia te au, ma toe foi atu ia Reopoamo le tupu o Iuta.

²⁸Ona filifili lea o le tupu, ma ia faia tamai povi auro e lua, ua fai atu foi o ia ia te i latou, E faigata ia te outou ona o ae i Ierusalema; Isaraelu e faauta mai ia i o outou atua o e na aveina ae outou mai le nuu o Aikupito.

²⁹Ua ia tuu le tasi i Peteli, ua ia tuu foi le isi i Tanu.

³⁰Na fai lenei mea ma agasala; auā na o atu le nuu i luma o le tasi i Tanu.

³¹Ona faia lea e ia o le fale o mea maualuluga; na tofia foi e ia nisi o le nuu uma e fai ma faitaulaga, e le ni o le fanauga a Levi i latou.

³²Ua faia foi e Ierepoamo le tausamiga i le masina e valu, i le aso e tasi le sefulu ma le lima o le masina, e pei o le tausamiga ua i ai i Iuta; ona alu ae lea o ia i le fata faitaulaga. Sa faapea ona faia e ia i Peteli, e fai taulaga i tamai povi na ia faia; ua ia tofia foi i Peteli o faitaulaga o mea maualuluga na ia faia.

³³Ua alu ae o ia i le fata faitaulaga na ia faia i Peteli i le aso e sefulu ma le lima o le masina e valu, o le masina lea na ia filifilia i lona lava loto; ua faia foi e ia le tausamiga mo le fanauga a Isaraelu; ua ia alu ae foi i le fata faitaulaga e faamu ai mea manogi.