Read Samoan Old Version Bible – O LE TUSI PAIA I TUPU, 13 Bible Online

I TUPU, 13 - Samoan Old Version Bible – O LE TUSI PAIA bible

I TUPU, 13

¹Faauta foi, ua sau le tagata o le Atua, i le afioga a Ieova, mai Iuta i Peteli; o loo tu mai foi Ierepoamo i tafatafa o le fata faitaulaga e faamu ai mea manogi.

²Ona alaga atu lea o ia i le fata faitaulaga i le afioga a Ieova, ua ia faapea atu, Le fata faitaulaga e, le fata faitaulaga e, o loo faapea ona fetalai mai o Ieova, Faauta o le a fanau mai le tama i le aiga o Tavita, e igoa ia Iosia, na te fai taulaga i luga ia te oe i le au faitaulaga o mea maualuluga, o e faamu mea manogi i luga ia te oe, e susunuina foi ivi o tagata i luga ia te oe.

³Ona avane lea e ia o le faailoga i lea lava aso, ua faapea atu, O le faailoga lenei ua fetalai mai ai Ieova; faauta, e māvae le fata faitaulaga, e masaa ai foi le lefulefu o loo i ona luga.

⁴Ua faalogo le tupu i le upu a le tagata o le Atua, ua ia alaga atu ai i le fata faitaulaga i Peteli, ona aapa atu lea e Ierepoamo o lona lima nai le fata faitaulaga, ua faapea atu, Ina pue ia ia te ia; ona gase lea o lona lima na ia aapa atu ia te ia, ua le toe mafai ona faafoi ai ia te ia.

⁵Ua māvae foi le fata faitaulaga, ua masaa foi le lefulefu na i le fata faitaulaga, e tusa ma le faailoga na avane e le tagata o le Atua i le afioga a Ieova.

⁶Ona fai atu lea o le tupu, ua faapea atu i le tagata o le Atua, Ia e aioi atu i luma o Ieova lou Atua, ma e tatalo atu mo a‘u, ina ia toe lelei lo‘u lima. Ona aioi atu ai lea o le tagata o le Atua i luma o Ieova, ona toe lelei lea o le lima o le tupu, ua pei o anamua.

⁷Ona fai atu lea o le tupu i le tagata o le Atua, Se‘i ta o ma a‘u i lo‘u fale, e te malolo ai, ou te avatu foi ia te oe se mea alofa.

⁸Ona fai mai lea o le tagata o le Atua i le tupu, Afai e te foai mai ia te au le vaeluagalemu o mea o i lou fale, ta te le o faatasi ma oe; ou te le ‘ai ni mea e ‘ai, ou te le inu vai foi i lenei mea.

⁹Auā na faapea ona fetalai mai ai ia te au o le afioga a Ieova, na faapea mai, Aua e te ‘ai i mea e ‘ai, aua ne‘i e inu foi i le vai, aua foi le toe foi mai i le ala e te alu atu ai.

¹⁰Ona alu atu lea o ia i le tasi ala, ua le foi atu o ia i le ala na ia alu atu ai i Peteli.

¹¹Sa nofo i Peteli le tasi perofeta ua toeaina; na o atu ona atalii, ma talatala atu ia te ia i mea uma na faia e le tagata o le Atua i lena aso i Peteli; o upu foi na ia fai atu ai i le tupu ua latou talatala atu ai i lo latou tamā.

¹²Ona fai atu lea o lo latou tamā ia te i latou, O le fea ala na alu atu ai o ia? Auā na iloa e ona atalii le ala na alu atu ai le tagata o le Atua, o le na sau mai Iuta.

¹³Ua ia fai atu foi i ona atalii, Ina faanofoa ia le asini mo a‘u; ona latou faanofoa ai lea o le asini mo ia; ona tietie ai lea o ia.

¹⁴Ona mulimuli atu lea o ia i le tagata o le Atua, na ia maua atu ia te ia o nofo i lalo o le tapeneto; ona fai atu lea o ia ia te ia, O oe ea le tagata o le Atua na sau mai Iuta? Ona tali mai lea o ia, O a‘u lenei.

¹⁵Ona fai atu lea o ia ia te ia, Ta te o ma a‘u i lo‘u fale, se‘i e tausami sina mea.

¹⁶Ona fai mai lea o ia, Ou te le mafai ona ta toe foi atu ma oe, ma te ulufale atu ma oe, ou te le ‘ai i mea e ai, ou te le inu foi i le vai faatasi ma oe i lenei mea;

¹⁷auā na fetalai mai ia te au i le afioga a Ieova, Aua e te ‘ai i mea e ‘ai, pe inu vai i lea mea; aua foi e te liliu mai ma toe foi mai i le ala e te alu atu ai.

¹⁸Ona fai atu lea o ia ia te ia, O a‘u foi o le perofeta e pei o oe; ua fai mai foi le agelu ia te au i le afioga a Ieova, ua faapea mai, Ina e toe faafoi mai ia ia te ia faatasi ma oe i lou fale, ina ia ‘ai o ia i mea e ‘ai, ma inu i le vai. A ua tala pepelo o ia ia te ia.

¹⁹Ona la toe foi atu lea ma ia, ua ia ‘ai foi i mea e ‘ai i lona fale, ma inu vai.

²⁰Ua oo mai le afioga a Ieova i le perofeta na toe faafoi atu ia te ia, a o la nonofo i le laulau.

²¹Ona alaga atu lea o ia i le tagata o le Atua na sau mai Iuta, ua faapea atu, O loo faapea ona fetalai mai o Ieova, Ua e fouvale i le afioga a Ieova, ua e le tausi foi i le poloaiga na fetalai mai ai Ieova lou Atua ia te oe,

²²A ua e too foi mai, ma e ‘ai i mea e ‘ai, ma e inu vai i le mea na fetalai mai ai Ieova ia te oe, aua e te ‘ai ai i mea e ‘ai, pe inu vai, o le mea lea e le oo ai lou tino i le tuugamau o ou tamā.

²³Ua uma ona ia ‘ai i mea e ‘ai ua uma foi ona ia inu, ona faanofoa lea e ia o le asini mo ia, mo le perofeta o le na ia toe faafoi mai.

²⁴Ua alu ia, ona maua lea o ia e le leona i le ala, ua oti o ia ia te ia; ua lafo ifo foi lona tino i le ala, ua tu le asini e latalata i ai, ua tu foi le leona e latalata i le tino.

²⁵Faauta foi i tagata ua o ane, ua latou iloa le tino ua lafo ifo i le ala, ma le leona ua tu mai e latalata i le tino; ona latou o ai lea, ma talatala atu ai i le aai sa nofo ai le perofeta toeaina.

²⁶Ua faalogo i ai le perofeta o le na toe faafoi atu ia te ia i le ala, ona faapea ane lea o ia, O le tagata o le Atua lea, o le na fouvale i le afioga a Ieova; o le mea lea ua tuuina atu ai o ia e Ieova i le leona, ua saei ia te ia, ua oti ai o ia, e tusa ma le afioga a Ieova na ia fetalai mai ai ia te ia.

²⁷Ona fai atu lea o ia i ona atalii, ua faapea atu, Ina faanofoa ia le asini mo a‘u. Ona latou faanofoaina lea.

²⁸Ua alu o ia, ona maua lea e ia o lona tino ua lafo ifo i le ala, ma le asini ma le leona o loo tutū e latalata ane i le tino; ua le ‘aina e le leona o le tino, ua le saeia foi e ia le asini.

²⁹Ona avae lea e le perofeta o le tino o le tagata o le Atua, ma faaee ai i luga o le asini, ma toe avatu ai; ona alu atu lea o le perofeta toeaina i le aai e tagitu‘i ma tanu ia te ia.

³⁰Ua ia tuuina lona tino i lona lava tuugamau; ona latou taufaitagitu‘i lea ia te ia, ua faapea, Aue lo‘u uso e!

³¹Ua uma ona tanu ia te ia, ona fai atu lea o ia i ona atalii, ua faapea atu, Pe a ou oti, ia outou tanu ia te au i le tuugamau ua tanumia ai le tagata o le Atua, ia tuu o‘u ivi i tafatafa o ona ivi;

³²auā e taunuu lava le upu na ia valaau atu ai i le afioga a Ieova i le fata faitaulaga o loo i Peteli, ma fale uma o mea maualuluga o loo i ai i aai o Samaria.

³³Ua mavae lenei mea, ua le liliu ese Ierepoamo i lona ala leaga, a ua toe faia e ia o tagata mai le nuu uma ma faitaulaga o mea maualuluga; ai se manao i ai ua ia tofia o ia, ona avea lea o ia ma faitaulaga o mea maualuluga.

³⁴Na avea lenei mea ma agasala i le aiga o Ierepoamo, ia vavaeeseina ma faaumatia i le fogāeleele.