Read Samoan Old Version Bible – O LE TUSI PAIA I TUPU, 18 Bible Online

I TUPU, 18 - Samoan Old Version Bible – O LE TUSI PAIA bible

I TUPU, 18

¹Ua mavae aso e tele, ona oo mai ai lea o le afioga a Ieova ia Elia i le tolu o tausaga, ua faapea mai, Ina alu ia oe, ma faaali oe ia Aapo, ou te faatotōina foi le ua i le laueleele.

²Ona alu ai lea o Elia e faaali o ia ia Aapo; sa matuā velavela le oge i Samaria.

³Na valaau foi Aapo ia Opetaia, o lē pule i lona aiga. (Sa matuā mata‘u Opetaia ia Ieova;

⁴auā na fasiotia e Iesepela o perofeta a Ieova, ona ave lea e Opetaia o perofeta e toaselau, ma nanā ia te i latou e taitoalimagafulu i ana, na ia fafaga foi ia te i latou i areto ma vai.)

⁵Ua fai atu Aapo ia Opetaia, Ina alu ia oe i le nuu i vaipuna uma, atoa foi ma alia uma; pe tatou te maua ni mutia e faaolaina ai solofanua, ma falata, ina ne‘i maumau manu uma.

⁶Ona vaeluaina lea e i laua o le nuu, ina ia la feoai ai; ua alu Aapo i le tasi ala na o ia, a ua alu Opetaia i le isi ala na o ia.

⁷Ua i ai i le ala Opetaia, faauta, ua la fetaiai ma Elia; ua iloa o ia e ia ona faapaūfao ai lea o ia, ua faapea mai, O oe ea le alii o Elia?

⁸Ona tali atu lea o ia, O a‘u lava lea. Alu ia oe, ma e fai atu i lou alii, Faauta, o Elia.

⁹Ona fai mai lea o ia, Se a ea se mea ua ou agasala ai, ina a e tuuina atu ai lau auauna i le lima o Aapo, ia fasiotia ai a‘u?

¹⁰O loo soifua Ieova lou Atua, e leai se nuu po o se malo e lei oo i ai le feau a lo‘u alii e sailiili ia te oe; a latou tali mai ai, E le i ai, ona ia fai atu lea, e tauto lea malo ma lea nuu, ua latou le maua oe.

¹¹O lenei, ua e fetalai mai, Alu ia oe ma e fai atu i lou alii, Faauta, o Elia.

¹²A a‘u alu ese ia te oe, ona avea lea o oe e le Agaga o Ieova i se mea ou te le iloa; pe a ou alu, ma ta‘u atu ia Aapo, a e le maua mai oe e ia, ona fasiotia lea o a‘u e ia; a o loo mata‘u lau auauna ia Ieova talu ina ou itiiti.

¹³Pe na le ta‘uina atu ea i lo‘u alii le mea na ou faia ina ua fasiotia e Iesepela o perofeta a Ieova; na ou natia perofeta a Ieova, o tagata e toaselau, e taitoalimagafulu i ana, na ou fafaga foi ia te i latou i areto ma vai?

¹⁴O lenei foi, ua e fetalai mai, Alu ia oe, ma e fai atu i lou alii, Faauta, o Elia; ona fasiotia lea o a‘u e ia.

¹⁵Ona fai atu lea o Elia, O loo soifua, Ieova o ‘au, o ia ou te tu ai i ona luma, ou te faaali lava a‘u ia te ia i le aso nei.

¹⁶Ona alu ai lea o Opetaia e faafetaiai ia Aapo, ma ta‘u atu ai ia te ia; ona sau ai lea o Aapo e faafetaiai ia Elia.

¹⁷Ua iloa atu e Aapo ia Elia, ona fai atu lea o Aapo ia te ia, O oe ea o lē faatiga ia Isaraelu?

¹⁸Ona tali mai lea o ia, E le o a‘u lē faatiga ia Isaraelu, a o oe ma le aiga o lou tamā; auā ua outou tuua o poloaiga a Ieova, ma outou mulimuli atu ia Paala.

¹⁹O lenei, ina feau atu ia, ma faapotopoto mai ia te au i le mauga o Karamelu o Isaraelu uma, ma perofeta a Paala e fa selau ma le lima o sefulu, ma perofeta a Asaira e fa selau, o e aai i le laulau a Iesepela.

²⁰Ona feauina atu lea e Aapo i le fanauga uma a Isaraelu, ua ia faapotopoto foi le au perofeta i le mauga o Karamelu.

²¹Ona faalatalata atu lea o Elia i le nuu uma, ua faapea atu, Pe tou te faaletonu i manatu e lua seia afea? Afai o Ieova o le Atua ia, ia outou mulimuli atu ia te ia; a e afai o Paala, ia outou mulimuli atu ia te ia. A e le tali mai le nuu ia te ia i se upu.

²²Ona fai atu lea o Elia i le nuu, Ua na o a‘u ua toe i perofeta a Ieova; a o perofeta a Paala, e fa selau ma le toalimagafulu i latou.

²³Ia latou au mai ia te i matou o povi e lua; ona filifilia lea e i latou se tasi povi mo i latou, ma latou pena, ma faaee ai i luga o fafie, a e aua le avane ai le afi; ou te saunia foi le tasi povi, ma faaee ai i luga o fafie, a ou te le avane ai le afi.

²⁴Ona valaau atu lea outou i le igoa o outou atua; ou te valaau atu foi i le suafa o Ieova. O le Atua na te tali mai i le afi, o le Atua lea. Ona tali mai lea o le nuu uma, ua faapea mai, Ua lelei lau upu.

²⁵Ona fai atu lea o Elia i perofeta a Paala, Ina filifili ia se povi mo outou, ma ia muamua ona sauni ai e outou, auā e toatele outou; ia outou valaau atu foi i le igoa o outou atua, a e aua le avane ai le afi.

²⁶Ona latou avea lea o le povi na tuuina atu ia te i latou, ua latou saunia foi, ma latou valaau atu i le igoa o Paala, na amata i le taeao ua oo i le tutonu o le la, ua faapea atu, Paala e, ia e faafogafoga mai ia te i matou. A ua leai se leo; e leai se na tali mai. Ona latou feosofi lea i le fata faitaulaga na latou faia.

²⁷Ua oo i le tutonu o le la, ona tauemu atu lea o Elia ia te i latou, ua ia faapea atu, Ina valaau atu ia, ia leo tele; auā o le atua ia; po ua tautala ia, po ua alu ese, po ua alu i se malaga; ai lava ua moe ia, e tatau ona fagufagu atu ia te ia.

²⁸Ona latou valaau atu lea ua leo tele, ma latou selei ia te i latou i polo ma tui, e tusa ma la latou tu, ua oo ina faamaligiina ifo le toto ia te i latou.

²⁹Ua mavae le tutonu o le la, ona latou perofeta ane lea ua oo i le itu la e fai ai le taulaga afiafi, a ua leai se leo, e leai se na tali mai, pe faalogo mai.

³⁰Ona fai atu lea o Elia i le nuu uma, Ina faalatalata mai ia ia te au. Ona faalatalata atu lea o le nuu uma ia te ia, ona toe teu lea e ia o le fata faitaulaga o Ieova sa sŏloia i lalo.

³¹Ona ave lea e Elia o maa e sefulu ma le lua, e tusa ma le faitauina o itu aiga o atalii o Iakopo, o le na oo i ai e afioga a Ieova, na faapea, E igoa oe ia Isaraelu.

³²Ona faia lea e ia i ia maa o le fata faitaulaga i le suafa o Ieova; ua faia foi e ia le utu ua soo ai le fata faitaulaga; o lona tele ua tusa ma sea e lua o fua.

³³Ona faaafu lea e ia o fafie, ma pena le povi, ma faaee ai i luga o fafie; ona fai atu lea o ia, Ina faatumu mai ia o kate e fa i le vai, ma sasaa ai i luga o le taulaga mu, ma luga o fafie.

³⁴Ua ia fai atu foi, Ina foi faalua mai ia. Ona latou foi faalua mai ai lea. Ua ia fai atu foi, Ina foi faatolu mai ia. Ona latou foi faatolu mai ai lea.

³⁵Ua tafe le vai ua soo ai le fata faitaulaga; ua tumu foi le utu i le vai.

³⁶Ua oo i le itu la e fai ai le taulaga afiafi, ona faalatalata atu ai lea o Elia le perofeta, ua faapea atu, Ieova e, le Atua o Aperaamo, ma Isaako, ma Isaraelu, ia faailoa i lenei aso, o oe o le Atua i Isaraelu, o a‘u foi o lau auauna, ma ua ou faia o nei mea uma e tusa ma lau afioga.

³⁷Ia e faafofoga mai ia te au, Ieova e, ia e faafofoga mai ia te au, ina ia iloa e le nuu nei o oe o Ieova o le Atua, ma ua e faaliliuina mai o latou loto.

³⁸Ona paū ifo lea o le afi a Ieova, ma faaumatia ai le taulaga mu, ma fafie, ma maa, ma le eleele ua mitiia ai foi le vai sa i le utu.

³⁹Ua iloa e le nuu uma, ona faapauufao ai lea o i latou, ua faapea, O Ieova, o le Atua ia; o Ieova o le Atua ia!

⁴⁰Ona fai atu lea o Elia ia te i latou, Ia outou pupue i perofeta a Paala; aua ne‘i sao atu so latou. Ona latou pupue lea ia te i latou; ua ave ifo foi e Elia ia te i latou i le alia o Kisona, ma na fasioti ia te i latou i lea mea.

⁴¹Ona fai atu lea o Elia ia Aapo, Ina maliu ae ia oe, ia e taumafa ma inu; auā o le taalili o le ua tele.

⁴²Ona alu ae ai lea o Aapo e ‘ai ma inu; ua alu ae foi Elia i le tumutumu o Karamelu, ua ia ifo ai i le eleele, ma tuu ona mata i le va o ona tulivae.

⁴³Ua fai atu ia i lana auauna, Ia e alu ae, ma vaavaai i tai. Ona alu ae lea o ia, ma ia vaavaai, ua faapea mai, E leai se mea. Ona fai atu lea o ia, Ina foi faafitu atu ia.

⁴⁴Ua oo i lona foi faafitu, ona ia fai mai lea, Faauta, ua alu ae i le sami si ao itiiti e pei o se alofilima o se tagata. Ona fai atu lea o ia, Ina alu ae ia, ma e fai atu ia Aapo, Ina sauni ia lou nofoa faataavalevale, ma e maliu ifo, ne‘i taofia oe i le uaga.

⁴⁵O loo fai foi ia mea, ua faamalumalu ifo le lagi i ao ma le savili; ua tele lava le timu. Ua tietie Aapo i le nofoa faataavalevale, ma alu i Isereelu.

⁴⁶Sa ia Elia le aao o Ieova; ona fusi ai lea o ia i lona sulugatiti, ma tamoe i luma o Aapo, ua oo i le mea e ui atu ai i Isereelu.