Read Samoan Old Version Bible – O LE TUSI PAIA I TUPU, 19 Bible Online

I TUPU, 19 - Samoan Old Version Bible – O LE TUSI PAIA bible

I TUPU, 19

¹Ua faamatala atu e Aapo ia Iesepela o mea uma na faia e Elia, atoa uma ma lona fasioti i perofeta uma i le pelu.

²Ona auina atu lea e Iesepela o le avefeau ia Elia, ua faapea atu, Ia faapea ona fai e atua ia te au, ma ia faaopoopo i ai, pe afai ou te le faatatau lou ola ma le ola o so latou, i le itu la faapenei taeao.

³Ua iloa e ia, ona tulai lea o ia ua tili ola, ua oo o ia i Peresepa i Iuta, ua tuua e ia lana auauna i lea mea.

⁴A ua alu o ia i le vao, o le savaliga o le aso e tasi, ona oo ai lea o ia, ma nofo i lalo o le ratami; ua ia faatoga atu ia oti o ia, ua faapea atu, Ieova e, soia; ia e ave ese lo‘u ola, auā e le sili ona lelei o a‘u i o‘u tamā.

⁵Ua taoto ia, ua moe i lalo ifo o le ratami, faauta mai, o le agelu ua pai mai ia te ia, ma fai mai ia te ia, Ina tu ia i luga, ina ‘ai.

⁶Ona vaai atu lea o ia, faauta, sa i ona ulu le potoi areto ua tunu i maa aasa, ma le ipu vai. Ona ‘ai lea o ia ma inu; ona toe taoto lea o ia.

⁷Ona foi faalua mai lea o le agelu a Ieova, ma pai mai ia te ia, ma fai mai, Ina tu ia i luga, ina ‘ai auā e mamao le ala.

⁸Ona tu lea o ia i luga, ua ‘ai ma inu; ona alu lea o ia i le malosi ona o lea mea na ‘ai e fagafulu o ao ma le fagafulu o po, ua oo lava i Horepa o le mauga o le Atua.

⁹Ua oo i ai o ia i le ana, ua ia nofo ai; faauta foi, ua oo mai ia te ia le afioga a Ieova, ua faapea mai ia te ia, Elia e, se a lau mea e fai iina?

¹⁰Ona fai atu lea o ia, Ua ou matua maelega a‘u ona o Ieova le Atua o ‘au, auā ua tuua e le fanauga a Isaraelu lau feagaiga, ua latou sŏloia i lalo ou fata faitaulaga, ua fasiotia foi e i latou au perofeta i le pelu, ua toe na o a‘u lava; ua latou fia fasioti foi ia te au.

¹¹Ona fetalai mai lea o ia, Ina alu ia oe i fafo, ma e tu i le mauga i luma o Ieova. Faauta mai, ua afio ane Ieova; o le matagi tetele foi ma le malosi ua lepetia ai mauga, ma momomo ai papa i luma o Ieova; e lei i ai Ieova i le matagi; ua mulimuli i le matagi o le mafuie;

¹²e lei i ai Ieova i le mafuie; e mulimuli i le mafuie o le afi; e lei i ai Ieova i le afi; e mulimuli i le afi o le leo filemu ma le itiiti.

¹³Ua faalogo ai Elia, ona ufiufi ai lea e ia o ona mata i lona ofu tele, ma alu i fafo, ma tu i le gutu o le ana; faauta, ua oo mai ia te ia le leo, ua faapea mai, Elia e, se a lau mea e fai iina?

¹⁴Ona fai atu ai lea o ia, Ua ou matuā maelega a‘u ona o Ieova le Atua o ‘au; auā ua tuua e le fanauga a Isaraelu lau feagaiga, ua latou sŏloia i lalo ou fata faitaulaga, ua fasiotia foi e i latou au perofeta i le pelu, ua toe na o a‘u lava, ua latou fia fasioti foi ia te au.

¹⁵Ona fetalai mai lea o Ieova ia te ia, Ina alu ia oe, ma toe foi i lou ala i le vao o Tamaseko; pe a e oo foi i ai, ia e faauuina Asaeli e fai ma tupu o Suria;

¹⁶ma Ieu le atalii o Nimese, e te faauuina e fai ma tupu ia Isaraelu; ma Elisaia le atalii o Safata o le Apelemeola, e te faauuina e fai ma perofeta e sui a‘i oe.

¹⁷O se sao i le pelu a Asaeli, e fasiotia lea e Ieu; o se sao i le pelu a Ieu, e fasiotia lea e Elisaia.

¹⁸A ua ou faatoe ia te au i Isaraelu, e toafitu afe, o i latou uma o e ua le tootuli ia Paala, o i latou uma foi o e ua le sogi ia te ia.

¹⁹Ona alu lea o ia nai lea mea; ua maua foi e ia o Elisaia le atalii o Safata, o loo suatia le eleele ma povi e tailua e sefulu ma le lua na muamua ia te ia; sa i ai o ia i le lua na aupito i tua; ua ui ane Elia ia te ia, ma lafo atu ai lona ofu tele i luga ia te ia.

²⁰Ona tuua lea e ia o povi, a e tuliloa ia Elia, ua fai atu ai, Ina tuu mai ia ia te au se‘i matou feasogi ma lo‘u tamā ma lo‘u tinā, ona ou mulimuli atu ia lea ia te oe. Ona fai atu lea o ia ia te ia, Ina alu ia oe, ina foi atu ia; auā se a se mea ua ou faia ia te oe?

²¹Ona toe foi lea o ia nai ia te ia; ua ave foi e ia o povi e lua, ma ia fasia; ua tunu foi e ia o la tino i mea na galue a‘i povi, ma avatu ai i le nuu, ua latou aai ai. Ona tulai lea o ia, ma alu e mulimuli atu ia Elia, ua ia auauna foi ia te ia.