Read Samoan Old Version Bible – O LE TUSI PAIA I TUPU, 21 Bible Online

I TUPU, 21 - Samoan Old Version Bible – O LE TUSI PAIA bible

I TUPU, 21

¹Ua mavae ia mea. Sa ia Napota le Isereelu le tovine i Isereelu, e latalata ane i le maota o Aapo le tupu o Samaria.

²Ua fai atu Aapo ia Napota, ua faapea atu, Ina au mai ia o lou tovine mo‘u e fai mo‘u fanua e totō ai laau‘aina, auā e latalata i lo‘u fale, a e ou te avatu ia te oe le tovine e sili ona lelei i lena e sui a‘i; a e afai e lelei ia te oe, ou te avatu ia te oe lona tau i tupe.

³Ona tali mai lea o Napota ia Aapo, Ia faamamao e Ieova ia te au ona ou avatu ia te oe le tofi o o‘u tamā.

⁴Ona alu lea o Aapo i lona fale, na tiga ma ita, auā o le upu ua fai mai ai Napota le Isereelu ia te ia, ua faapea mai, Ou te le avatu ia te oe le tofi o o‘u tamā. Ona taoto lea o ia i lona moega, ma faasaga ese ona mata, e lei ‘ai foi o ia.

⁵Ona sau lea ia te ia o Iesepela lana avā, ma na fai mai ia te ia, Pe se a le mea ua tiga ai lou finagalo, ma e le taumafa ai se mea?

⁶Ona fai atu lea o ia ia te ia, Auā na ou fai atu ia Napota le Isereelu, ua ou faapea atu i ai, Ina au mai ia mo‘u lou tovine i tupe; a e afai e lelei ia te oe ou te avatu mo oe se isi tovine e sui a‘i. Ona fai mai lea o ia, Ou te le avatu ia te oe lo‘u tovine.

⁷Ona fai mai lea o Iesepela lana avā ia te ia, Po ua e faia ea e oe le malo o Isaraelu? Ina tulai ia, ina taumafa se mea, ia fiafia foi lou finagalo; ou te avatu ia te oe le tovine o Napota le Isereelu.

⁸Ona tusi lea e ia ni tusi i le igoa o Aapo, ma faamau ai i lona faamaufaailoga, ma ia aveina atu o ia tusi i toeaina ma alii o lana aai o e nonofo faatasi ma Napota.

⁹Ua ia tusia foi i ia tusi, ua faapea, Ia outou tala‘iina le anapogi, ma ia outou tuu atu ia Napota i le mea sili i le nuu.

¹⁰Ia outou tuu atu foi i luma ia te ia o tagata ulavavale e toalua e molimau ia te ia, ia faapea, Na e faifai i le Atua ma le tupu. Ona outou ta‘ita‘i atu lea ia te ia i tuāpa, ma fetogi ia te ia i maa, ia oti ai o ia.

¹¹Ona faia lea e tagata o lana aai, o toeaina ma alii o e nonofo i lana aai, e pei o le feau a Iesepela ia te i latou, e tusa ma ana upu na tusia i tusi na ia aveina atu ia te i latou.

¹²Ua latou tala‘iina le anapogi, ua tuu foi e i latou ia Napota i le mea sili i le nuu.

¹³Ona o mai lea o tagata ulavavale e toalua, ma la nonofo i ona luma; ua molimau foi ia tagata ulavavale ia te ia, o Napota lava, i luma o le nuu, ua faapea, Na faifai Napota i le Atua ma le tupu. Ona latou ave lea ia te ia i tuāpa o le aai, ma fetogi ia te ia i maa, ona oti ai lava lea o ia.

¹⁴Ona latou aauina atu lea nisi ia Iesepela, ua faapea atu, Ua fetogia Napota i maa, ua oti o ia.

¹⁵Ua faalogo Iesepela ua fetogia Napota i maa, ma ua oti o ia, ona fai atu lea o Iesepela ia Aapo, Ina tulai ia, ma e fai mo oe le tovine o Napota le Isereelu, na ia le mafai ona avatu ia te oe i tupe; auā ua le ola Napota, a ua oti.

¹⁶Ua iloa e Aapo ua oti Napota, ona tulai lea o Aapo e alu ifo e fai mona le tovine o Napota le Isereelu.

¹⁷Ona tŭlei mai lea o le afioga a Ieova ia Elia le Tisepi, ua faapea mai,

¹⁸Ina tulai ia, ina e alu ifo e faafetaiai ia Aapo le tupu o Isaraelu, o loo i Samaria; faauta, o loo i ai ia i le tovine o Napota, ua alu ifo i ai e fai mona.

¹⁹Ia e fai atu ia te ia, ia faapea atu, O loo faapea ona fetalai mai o Ieova. Ua e fasiotia ea, ua fai foi mou? Ia e fai atu foi ia te ia, ia faapea atu, O loo faapea ona fetalai mai o Ieova, O le mea na etoeto ai ulī i le toto o Napota, e etoeto ai foi ulī i lou lava toto, o oe lava.

²⁰Ua fai mai Aapo ia Elia, O oe na le fai a‘u mou fili, ua e maua ea a‘u? Ona fai atu lea o ia, Ua ou maua; auā ua e faatau oe ia te oe e fai mea leaga i luma o Ieova.

²¹Faauta, o loo fetalai mai Ieova, Ou te faaoo atu le leaga ia te oe, ma ou aveesea lou gafa, ma faaumatia ai ia Aapo o e tulai atu i se aupa, o pologa atoa ma e sa‘oloto i Isaraelu.

²²Ou te faia foi lou aiga, ia pei o le aiga o Ierepoamo le atalii o Nepata, e pei o le aiga foi o Paasa le atalii o Akia, ona o le faaonoono ua e faaonoono mai ai ia te au, ma e faatupu ai le agasala ia Isaraelu.

²³O Iesepela foi, o loo fetalai mai ai Ieova, ua faapea mai, E ‘aina Iesepela e ulī i lalo o le pa o Isereelu.

²⁴O so Aapo e oti i le aai e ‘aina ia e ulī; o se oti i le vao e ‘aina lea e manu felelei.

²⁵E leai lava se tasi la te tutusa ma Aapo, o le na faatau e ia ia ia e fai mea leaga i luma o Ieova; o ia na faaosoosoina e Iesepela lana avā.

²⁶Na matuā fai mea leaga ina ua mulimuli i tupua, e tusa ma mea uma na faia e sa Amorī, o e na tulia e Ieova i luma o le fanauga a Isaraelu.

²⁷Ua faalogo Aapo i ia upu, ona saeia lea e ia ona ofu, ma ua ofu lona tino i ie talatala, ma ua anapogi, ma taoto i ie talatala, ma fealualuai faafifilemu.

²⁸Ona tŭlei mai lea o le afioga a Ieova ia Elia le Tisepi, ua faapea mai,

²⁹Ua e iloa ea ua faamaulalo Aapo i o‘u luma? Auā ua ia faamaulalo i o‘u luma, o le mea lea ou te le faaoo ai le leaga i lana nofoaiga; a o le nofoaiga a lona atalii ou te faaoo ai le leaga i lona aiga.