Read Samoan Old Version Bible – O LE TUSI PAIA I TUPU, 3 Bible Online

I TUPU, 3 - Samoan Old Version Bible – O LE TUSI PAIA bible

I TUPU, 3

¹Ua feusuai Solomona ma Farao le tupu o Aikupito, ua fai avā foi o ia i le afafine o Farao, ma au mai ia te ia i le aai o Tavita, seia uma ona fai o lona fale ma le fale o Ieova, ma le pa e sio a‘i Ierusalema.

²Na o mea maualuluga na fai taulaga ai le nuu, auā ua oo i ia ona po ua le faia le fale i le suafa o Ieova.

³Ua alofa Solomona ia Ieova, ua savali foi o ia i poloaiga a lona tamā o Tavita; a ua osia e ia taulaga, ma susunu mea manogi i mea maualuluga.

⁴Na alu atu foi le tupu i Kipeona e fai ai taulaga; auā o le mea maualuga lea e sili; e tasi le afe o taulaga mu na osia e Solomona i luga i lea fata faitaulaga.

⁵Ua faaali mai Ieova ia Solomona i le miti i le po i Kipeona; ua fetalai mai foi le Atua, Ina fai mai ia, pe se a se mea ou te avatua ia te oe?

⁶Ona tali atu ai lea o Solomona, Na e alofa tele i lau auauna o lo‘u tamā o Tavita, ina ua savali o ia i ou luma ma le faamaoni, ma le amiotonu, i le ma le loto sao i ou luma; ua e tausia foi mona lenei alofa tele ua e foaiina ia te ia le atalii e nofo i lona nofoālii, e faapei ona fai i le aso nei.

⁷O lenei, Ieova e, lo‘u Atua, ua e faia lau auauna ma tupu, o le sui o lo‘u tamā o Tavita; o a‘u foi o le tama itiiti, ou te le iloa ona ulufafo ma ulufale.

⁸O lau auauna foi o loo i luma o lou nuu ua e filifilia, o le nuu tele, e le masino, e le mafaitaulia, auā e toatele lava.

⁹O lea ia e foai mai ai i lau auauna le loto matala ina ia faamasino e ia i lou nuu, ma ia masino ai i le lelei ma le leaga, auā po o ai na te mafaia ona faamasino i lou nuu nei ua matua toatele.

¹⁰Ua lelei lana upu i le Alii, ina ua faatoga e Solomona i lena mea.

¹¹Ona tali mai ai lea o le Atua ia te ia, Ua e faatoga mai i lenei mea, a ua e le faatoga mai i le ola tulu‘i mo oe, ua e le faatoga foi mo oe ia mauoa, ua e le faatoga mai foi ia oti e ua ita mai ia te oe; a ua e faatoga mo oe le loto matala ia e iloa ai ona faamasino,

¹²faauta, ua ou faia e faapei ona e fai mai ai; faauta, ua ou foaiina atu ia te oe le loto poto ma le matala; sa leai se tasi na muamua ia te oe e tusa ma oe, e le toe tupu mai foi se tasi e mulimuli ia te oe e tusa ma oe.

¹³Ua ou foaiina atu foi ia te oe atoa ma mea ua e le faatoga mai ai, o le oloa atoa ma le mamalu; ina ia leai se tupu e tusa ma oe i ou aso uma.

¹⁴Afai foi e te savali i o‘u ala, ma e tausi i a‘u tulafono, ma a‘u poloaiga, e pei ona savali o lou tamā o Tavita, ou te faafualoaina ou aso.

¹⁵Ona ala mai lea o Solomona; faauta, o le miti. Ua alu atu o ia i Ierusalema, ona tu lea i luma o le atolaau o le feagaiga a Ieova; ua avatua foi e ia o taulaga mu, ma ia faia taulaga faafetai; ua ia saunia foi le tausamiga mo ana auauna uma.

¹⁶Ona o mai ai lea i le tupu o fafine talitane e toalua, ua la tutū i ona luma.

¹⁷Ua fai mai a le tasi fafine, Le alii e, ma te mau ma lenei fafine i le fale e tasi; na ou fanau foi, sa ma i ai foi ma ia i le fale.

¹⁸Ua oo foi i le po tolu talu ona ou fanau, ona fanau ai lea o lenei fafine, sa ma faatasi, sa leai se tagata ese ia te i maua i le fale, ua na o i maua lava sa i le fale.

¹⁹Ua oti foi le tama a lenei fafine i le po; auā ua tatao o ia ia te ia.

²⁰Ona tulai lea o ia i le tulua o po ma ao, ua ave ese la‘u tama sa ia te au, a o moe lau auauna fafine, ua ia faataoto ia te ia i lona fatafata, a ua faataoto mai e ia lana tama ua oti i lo‘u fatafata.

²¹Na ou nofo i luga i le taeao e faasusu i la‘u tama, faauta, ua oti ia; ua ou matuā matamata i ai i le taeao, faauta, e le o la‘u tama tane na ou fanaua.

²²Ona fai mai lea o le isi fafine, E leai, a o loo ola o la‘u tama lea, a o le ua oti o lau tama lea. A ua fai mai le tasi, E leai; a o le ua oti o lau tama lea, a o le ua ola o la‘u tama lea; ua faapea ona la tautalatala i luma o le tupu.

²³Ona fai atu lea o le tupu, Ua fai mai le tasi, O le ua ola o la‘u tama lea, a o le ua oti o lau tama lea; a ua fai mai le isi, E leai; a o le ua oti o lau tama lea, a o le ua ola o la‘u tama lea.

²⁴Ona fai ane lea o le tupu, Ina aumaia se pelu. Ona latou au mai lea o le pelu i luma o le tupu.

²⁵Ua faapea mai foi le tupu, Ia isilua le tama o loo ola, ma avatu le tasi itu i le tasi, ma le isi itu i le isi.

²⁶Ona fai mai ai lea i le tupu o le fafine e ana le tama o loo ola, ua faapea mai, (auā ua mutimuti vale lona loto ona o lana tama,) Le alii e, avatu le tama o loo ola ia te ia, aua lava ne‘i fasioti ia te ia. A ua fai mai le tasi, Aua le au mai ia te au, pe avatu ia te oe, a e isilua ia.

²⁷Ona fai atu lea o le tupu, ua faapea atu, Ina ave ia o le tama o loo ola ia te ia, aua lava ne‘i fasioti ia te ia, o lona tinā lena.

²⁸Ua faalogo Isaraelu uma i le faamasinoga na faia e le tupu, ona matatau ai lea o i latou i le tupu; auā ua latou iloa ua ia te ia le poto mai le Atua e faamasino ai.