Read Samoan Old Version Bible – O LE TUSI PAIA I TUPU, 4 Bible Online

I TUPU, 4 - Samoan Old Version Bible – O LE TUSI PAIA bible

I TUPU, 4

¹Ua fai le tupu o Solomona ma tupu ia Isaraelu uma.

²O alii nei sa ia te ia; O Asaraia le atalii o Satoka le faitaulaga;

³o Eliorefa ma Akia, o atalii o Sesa, o tusiupu ia; o Iosefatu le atalii o Ailuta, o le fātua‘iupu;

⁴o Penaia le atalii o Ioiata, o le pule i ‘au; o Satoka ma Aviata, o faitaulaga ia;

⁵o Asaraia le atalii o Natano, o lē pule i e na tofia e pule; ma Saputo le atalii o Natano, o le faipule, o le uo a le tupu ia;

⁶o Akisaro, o le pule i le aiga; ma Atoniramo le atalii o Apeta, o lē pule i taulaga.

⁷Sa ia Solomona e na tofia e pule e toasefulu ma le toalua i Isaraelu uma lava, o e fagaina le tupu ma lona aiga; o le tagata ma lona masina i lea tausaga ma lea tausaga e fafaga mai ai.

⁸O latou igoa foi nei; o le atalii o Huro, i le mauga o Efaraima.

⁹O le atalii o Tikeru, i Makasa, ma Salapima, ma Petesemesa, ma Aluna-petana.

¹⁰O le atalii o Heseta i Arupoto; sa ia te ia o Suka, atoa ma le nuu uma o Eferu.

¹¹O le atalii o Apinatapa sa ia te ia le nuu maualuga uma o Toro; o lana avā o Tafata o le afafine o Solomona.

¹²O Paana, le atalii o Ailuta sa ia te ia o Tanaka ma Mekito, ma Peteseana uma lava, e lata ane lea i Saratana i lalo o Isereelu, e pau mai i Peteseana, a e gata atu i Apelemeoloa, e oo i tala atu o Iokameama.

¹³O le atalii o Kipera i Ramota-kiliata, sa ia te ia aai o Iairo le atalii o Manase ua i Kiliata, sa ia te ia foi le itu o Arakopo ua i Vasana, o aai tetele e onogafulu, ua i ai pa ma faamaufaalava ‘apa memea.

¹⁴O Akinatapu le atalii o Ito, sa ia te ia o Maanaima.

¹⁵O Aimaasu, i Nafatali, na fai avā foi o ia ia Pasemeta le afafine o Solomona.

¹⁶O Paana le atalii o Husai i Asera ma Alota.

¹⁷O Iosefatu le atalii o Parua, i Isakara.

¹⁸O Semi le atalii o Ala, i Peniamina.

¹⁹O Kipera le atalii o Uri, i le nuu o Kiliata le nuu o Sekono le tupu o sa Amorī, ma Oko le tupu o Vasana, ua tofia o ia e pule e toatasi i le nuu.

²⁰Ua toatele Iuta ma Isaraelu, e pei o le oneone i le matafaga ona toatele, o loo aai, ma feinu, ma olioli.

²¹Ua pule foi Solomona i malo uma e gata mai i le vaitafe, e pau mai i le nuu o Filisitia, e oo foi i le tuaoi o Aikupito; ua latou aumaia foi mea alofa, ma latou auauna ia Solomona i aso uma o lona ola.

²²O mea e ‘ai a Solomona, o le aso ma le tolugafulu o kori o falaoa lelei, ma le onogafulu o kori o isi falaoa;

²³o povi pepeti e sefulu, ma povi tataa e luafulu, ma mamoe e selau; i le ma aila, ma sevi ma imura, ma parepuri pepeti.

²⁴Auā na ia te ia le pule i nuu uma i tala mai o le vaitafe, e gata mai i Tipesa, e pau mai i Kasa, o tupu uma i tala mai o le vaitafe. Sa ia te ia le filemu i itu uma na vagavagai ia te ia.

²⁵Sa nonofo ma le filemu o Iuta ma Isaraelu; e taitasi ma nofo i lalo o lona vine, ma lalo o lona mati, e gata mai i Tanu, e pau mai i Peresepa, i ona po uma o Solomona.

²⁶Sa ia Solomona mea e nonofo ai solofanua e fa sefulu o afe mo kariota sa ia te ia, ma e tietie i solofanua e sefulu afe ma afe e lua.

²⁷O e na tofia e pule sa latou fafaga i le tupu o Solomona, ma i latou uma o e na o mai i le laulau a le tupu o Solomona; ua latou taitasi ma lona lava masina; ua le tuua se mea e tasi.

²⁸O karite foi, ma ‘au o saito ā solofanua, ma manu tele vavave, ua latou avatua i le mea sa i ai i latou e taitasi le tagata ma lona tofiga.

²⁹Ua foaiina mai e le Atua ia Solomona le poto ma le loto matala e matuā tele lava, ma le loto e oo i mea e tele, e faapei o le oneone o i le matafaga.

³⁰Ua sili lava le poto o Solomona i le poto o tagata uma i sasae, ma le poto uma o Aikupito.

³¹Ua sili lona poto i lo tataga uma; i lo Etano o lo sa Eserā, ma Hemana, ma Kalakolu, ma Tarata, o atalii o Makolo; na ta‘ua o ia i nuu uma na vagavagai.

³²O ana faataoto na ia faia e tolu afe ia; o ana pese foi ua tasi le afe ma le lima.

³³Na tautala foi o ia i le uiga o laau e afua mai i le arasi o loo i Lepanona, e oo atu i le isopo ua tupu ae i le aupa; ua tautala foi o ia i le uiga o manu tataa, ma manu felelei, ma mea fetolofi, ma i‘a.

³⁴Ua latou o mai e faalogologo i le poto o Solomona mai nuu uma, ma tupu uma o le lalolagi o e na logo atu i ai lona poto.