Read Samoan Old Version Bible – O LE TUSI PAIA I TUPU, 5 Bible Online

I TUPU, 5 - Samoan Old Version Bible – O LE TUSI PAIA bible

I TUPU, 5

¹Ua aauina atu e Hiramo le tupu o Turo o ana auauna ia Solomona; auā na ia faalogo ua latou faauuina o ia e fai ma tupu e sui a‘i lona tamā; auā sa alofa Hiramo ia Tavita i ona aso uma.

²Ua alu foi le feau a Solomona ia Hiramo, ua faapea atu,

³Ua e silafia na le mafaia e lo‘u tamā o Tavita ona fai o se fale i le suafa o Ieova lona Atua, ona o taua na siosioina ai o ia, ina seia tuuina ifo i latou e Ieova i lalo i ona alofivae.

⁴A o lenei, ua foaiina mai ia te au e Ieova lo‘u Atua le filemu i itu uma, ua leai se ua ita mai, po o se leaga ua tupu.

⁵Faauta, ou te manatu e fai se fale i le suafa o Ieova lo‘u Atua, e faapei ona fetalaia mai e Ieova i lo‘u tamā o Tavita, ua faapea mai, O lou atalii, ou te faanofoina i lou nofoālii e fai mou sui, o ia na te faia le fale i lo‘u igoa.

⁶O lenei, ia e fetalai atu ia latou taia mai ma‘u o arasi mai Lepanona; e faatasi foi a‘u auauna ma au auauna; ou te avatu foi ia te oe le totogi mo au auauna, e tusa ma mea uma e te fetalai mai ai; auā ua e silafia ua le o ia te i matou se tagata ua iloa ta laau e pei o tagata o Saitonu.

⁷Ua faalogo Hiramo i upu a Solomona, ona fiafia tele ai lea o ia, ua faapea foi o ia, Ua faafetai ia Ieova i le aso nei, o le ua avatua ia Tavita lona atalii poto na te pule i lena nuu tele.

⁸Ona sau lea o le feau a Hiramo ia Solomona, ua faapea mai, Ua ou faalogo i mea na sau ai lau feau ia te au; ou te faia mea uma ua e finagalo i ai i laau o arasi, ma laau o perosi.

⁹E ave ifo ai e a‘u auauna ai Lepanona i le sami; ou te faia foi ma vaa laau, ma momoli i le sami i le mea e te fetalai mai ai ia te au, ma ou fai atu ia tatalaina i lea mea, e te avae ai. E te faia foi le mea ou te manao i ai ia au mai mea e ‘ai mā lo‘u aiga.

¹⁰Ona ave ai lea e Hiramo ia Solomona o laau o arasi ma laau o perosi, o mea uma na ia manao i ai.

¹¹Ua avatu foi e Solomona ia Hiramo o saito e lua sefulu o afe o kori e fai ma mea e ‘ai mā lona aiga; ma suāuu e tu‘ia o kori e luafulu; ua faapea ona avatua e Solomona ia Hiramo i lea tausaga ma lea tausaga.

¹²Ua foaiina mai foi e Ieova o le poto ia Solomona, e pei ona ia fetalaia mai ia te ia; ua la nofo lelei o Hiramo ma Solomona, ua la osia foi la la feagaiga.

¹³Ua togia tagata e le tupu o Solomona mai ia Isaraelu uma; o e na togia foi e tolu sefulu o afe o tagata.

¹⁴Ua ia aauina atu i latou i Lepanona e auaua‘i, o le masina ma le sefulu o afe; o le masina e tasi sa i ai i latou i Lepanona, a o masina e lua sa i ai i o latou aiga; ua pule foi Atoniramo i e na togia.

¹⁵Sa ia Solomona foi o e ave avega e fitu sefulu o afe; ma le valu sefulu o afe o e talai i le mauga;

¹⁶atoa foi ma alii sili o e na tofia e pule e Solomona, o e na pule i le galuega e tolu afe ma le tolu o selau i latou; na pule i latou i le nuu na faia le galuega.

¹⁷Ua poloai atu le tupu, ona latou au mai ai lea o maa tetele, o maa silisili, e fai ma faavae o le fale; o maa ua talai.

¹⁸Ua talai foi e tufuga a Solomona, ma tufuga a Hiramo, atoa ma tagata o Kavali, ua latou saunia laau ma maa e fai a‘i le fale.