Read Samoan Old Version Bible – O LE TUSI PAIA I TUPU, 7 Bible Online

I TUPU, 7 - Samoan Old Version Bible – O LE TUSI PAIA bible

I TUPU, 7

¹E sefulu ma le tolu tausaga o fai ai e Solomona lona lava fale, ua ia faauma ona fai o lona fale uma.

²Ua ia faia foi le fale o le vao o Lepanona, e tasi le selau o kupita o lona umi, e lima sefulu kupita o lona lautele, e tolu sefulu foi kupita o lona maualuga; ua ia fai ai i luga o atu pou arasi e fa, o laau faalava arasi foi i luga o pou.

³Ua ufitia foi i arasi i luga o laau faalava, i luga o pou e fagafulu ma le lima, e taisefulu ma le lima pou i le atu pou e tasi.

⁴Sa i ai atu faamalama e tolu, ua faafeagai lea faamalama ma lea faamalama i ia atu faamalama e tolu.

⁵O faitotoa uma ma pou ua faatāfafa ia, ua o gatasitasi ma laau faalava, ua faafeagai foi lea faamalama ma lea faamalama i atu faamalama e tolu.

⁶Ua ia faia foi le faapaologa i pou, e lima sefulu kupita o lona umi, e tolu sefulu kupita o lona lautele; sa i o latou luma le faapaologa, sa i o latou luma foi pou ma le laau faalava.

⁷Ona faia lea e ia o le faapaologa mo le nofoālii na te fai ai faamasinoga, o le faapaologa lea e faamasino ai; sa tăpapa ai i le arasi, e afua ae i le lotofale i lalo e oo i le fogāfale i luga.

⁸O lona fale foi sa nofo ai o ia ua i ai le lotoā i tua o le faapaologa, sa faapea foi ona fai. Ua faia foi e Solomona o le fale mo le afafine o Farao, o le ua fai mana avā, e faapei o lena faapaologa.

⁹O maa silisili na fai ai uma lava, e pei o le fua o maa talai, ua ilia i ili, o totonu atoa foi ma tua, e amata ae i le faavae, e oo i maa aupitoaluga, atoa ma tuafafo atu, e oo i le lotoā tele.

¹⁰Ua faia foi le faavae i maa silisili, o maa tetele, o maa taisefulu o kupita, ma maa taivalu o kupita.

¹¹Sa i luga foi maa silisili, e pei o le fua o maa talai; sa i ai foi arasi.

¹²Sa i le lotoā tele foi na soo ai o le atu maa talai ua sāutuatolu, ma le atu laau faalava o arasi ua talai, mo le lotoā aupito i totonu e pei o le fale o Ieova, atoa ma le faapaologa o le fale.

¹³Ua alu atu le feau a le tupu o Solomona, ma ua au mai ia Hiramo mai Turo.

¹⁴O le tama tane ia a le fafine ua oti lana tane, o lo le itu aiga o Nafatali, a o lona tamā o le tagata Turo ia, o le tufuga fai mea ‘apa memea; sa tumu ia i le poto, ma le mafaufau, ua na iloa e faigaluega uma i mea ‘apa memea. Ua sau o ia i le tupu o Solomona, ma na faia ana galuega uma.

¹⁵Ua faia e ia o pou ‘apa memea e lua, e sefulu ma le valu o kupita o lo la maualuga taitasi; ua faataaliolioina foi o lea pou ma lea pou i le fua e sefulu ma le lua ona kupita.

¹⁶Ua fala foi e ia o kapetala e lua i ‘apa memea ua tunua e tuu ae ai i pito pou i luga; e lima kupita le maualuga o le tasi kapetala, e lima kupita foi le maualuga o le isi kapetala.

¹⁷Ua faia foi e ia o mea faaupega, ma mea faafilifili mo kapetala ua i ai i pito pou i luga; e fitu mo le tasi kapetala, e fitu foi mo lona lua o kapetala.

¹⁸Ua ia faia o pou, ma atu rimoni e lua i le mea faaupega e faataaliolio ai, e ufitia ai le tasi kapetala i le pito pou i luga; ua faapea foi o ia i lona lua o kapetala.

¹⁹O kapetala i pito pou i luga ua i ai foi mea e pei o susana e fa kupita i le faapaologa.

²⁰O kapetala i luga o pou e lua, ua i ai atu rimoni mai luga lava i le mea lautele ua i le mea faaupega; e tailua selau rimoni i atu rimoni i le tasi kapetala e faataaliolio ai.

²¹Ua ia faatuina ia pou i le faapaologa o le malumalu; ua ia faatuina le pou i le itu taumatau, ma ia faaigoaina lona igoa o Iakina; ua ia faatuina le pou i le itu tauagavale ma faaigoaina lona igoa o Poasa.

²²Ua i ai foi i pito pou i luga o mea e pei o susana. Ua faauma ai ona faia o pou.

²³Ua ia faia foi le vai ‘apa memea, e sefulu kupita lona fua, e afua mai i le tasi itu o lona lau, e oo i le isi itu o lona lau; o le mea faataaliolio lava; e lima kupita o lona maualuga; ua faataaliolioina i le fua e tolu sefulu ona kupita.

²⁴Sa i lalo foi o lona lau o vine vao e faataaliolio ai ua soo ai lava, e taisefulu i kupita; ua faataaliolioina le vai; ua faia o atu vine vao e lua ina o faia ia.

²⁵Ua faaee ai i luga o povi e sefulu ma le lua; ua faasaga le tolu i le itu i matu, ua faasaga le tolu i sisifo, ua faasaga le tolu i le itu i toga, ua faasaga foi le tolu i sasae; ua i o latou luga le vai, o latou tua uma foi na i totonu ia.

²⁶O lona mafiafia e tusa lea ma le lautele o le alofilima; ua faia foi lona lau e pei o le lau o se ipu, ua fai ai fuga o le susana; o lona tumu foi e lua afe o paita lea.

²⁷Ua faia foi e ia o tuugātanoa ‘apa memea e mulumulu ai e sefulu; e fa kupita le umi o le tuuga e tasi, e fa kupita foi lona lautele e tolu kupita foi lona maualuga.

²⁸Ua faapea ona faia o tuugātanoa ua i ai itu, sa i ai foi i ia itu o tafatafa.

²⁹Sa i ai foi i ia itu i le va o latou tafatafa o leona, ma povi, ma kerupi; sa i luga foi o tafatafa o le tuuga i luga; sa i lalo foi o leona ma povi o mea fili faatautau.

³⁰Ua i ai i tuuga taitasi o mea ‘apa memea e faataavalevale a‘i e fa, ma o latou ‘au ‘apa memea; ua i ai foi i ona tuli e fa o lagolago; o lagolago ‘apa memea i lalo o le tanoa e mulumulu ai i itu o mea fili taitasi.

³¹O lona gutu foi i totonu o le kapetala ma ona luga, o le kupita lea; sa fai faataaliolio lona gutu, na faatatauina i ona fai o le tuugātanoa, o le kupita ma le vaeluagalemu o le kupita; ua i ai foi i lona gutu o mea ua togitogia, o latou tafatafa foi ua faatāfafa ia, ua le fai faataaliolio.

³²Sa i lalo foi o tafatafa o mea e faataavalevale a‘i e fa; o ‘au foi o mea e faataavalevale a‘i sa i le tuugātanoa ia; o le kupita ma le vaeluagalemu o le kupita o le maualuga lea o mea e faataavalevale a‘i taitasi.

³³Ua faia mea e faataavalevale a‘i e pei ona faia o se mea e faataavale a‘i se kariota; o latou ‘au, ma o latou suluga ‘au, ma o latou maga, ma mea e lio a‘i, o ‘apa memea uma ia.

³⁴Ua i ai lagolago e fa i ona tuli e fa o le tuugātanoa e tasi; ua auga faatasi le tuuga ma ona lagolago.

³⁵Sa i ai i le itu i luga o le tuuga o le mea e lio a‘i ua faataaliolio ai, o le vaeluagalemu o le kupita lona maualuga; ua auga faatasi foi ma le tuuga lava o ona tafatafa, ma ona itu sa i lona itu i luga.

³⁶Auā ua ia togitogiina i papa o latou tafatafa, ma o latou itu, o kerupi, ma leona, ma pama, ua faatatauina i mea ua aunoa e taitasi, ma mea fili e faataaliolio ai.

³⁷Ua faapea ona faia e ia o ia tuugatanoa e sefulu; ua gatasi ona faia, ma ona fuatia, ma ona tino mai o i latou uma.

³⁸Ua faia foi e ia o tanoa ‘apa memea e sefulu e mulumulu ai; e fagafulu o paita o le tumu o le tanoa e tasi; e taifa kupita o tanoa; o tuuga e sefulu, e taitasi ma lona tanoa i ona luga.

³⁹Ua ia tuu tuuga e lima i le itu taumatau o le fale, ma le lima i le itu tauagavale o le fale; ua ia tuu foi le vai i le itu taumatau o le fale, e faasaga i le itu i toga.

⁴⁰Ua faia e Hiramo o tanoa, ma suo, ma ipu; ua faaumaina foi e Hiramo ona fai o le galuega uma na ia faia mo le tupu o Solomona mo le fale o Ieova;

⁴¹o pou e lua, ma mea lapotopoto mo kapetala i luga o pou e lua; ma mea faaupega e lua e ufiufi a‘i ia mea lapotopoto o lua mo kapetala sa i luga o pou.

⁴²O rimoni foi e fa galau mo mea faaupega e lua; o atu rimoni e lua sa i le mea faaupega e tasi e ufiufi a‘i ia mea lapotopoto o kapetala i luga o pou.

⁴³O tuugātanoa e sefulu, ma tanoa e sefulu i luga o tuuga.

⁴⁴O le vai e tasi, ma povi e sefulu ma le lua i lalo o le vai.

⁴⁵O ulo, ma suo, ma ipu. Ua faia ia mea uma e Hiramo mo le tupu o Solomona mo le fale o Ieova, i ‘apa memea ua faapupulaina.

⁴⁶Ua faia ia mea e le tupu i le leeleele laugatasi o Ioritana, i le eleele omea i le va o Sukota ma Saretana.

⁴⁷Ua tuua e Solomona o ia mea uma ua le faitaulia, auā na matuā tele lava; ua le masino lava le fua o le mamafa o ‘apa memea.

⁴⁸Ua faia e Solomona o mea uma o le fale o Ieova; o le fata faitaulaga auro; ma le laulau auro ua i ona luga le areto e laulauina i luma;

⁴⁹ma tuugālamepa auro lelei, e lima i le itu taumatau e lima foi i le itu tauagavale, i luma o le mea e fetalai mai ai; ma fua, ma lamepa, ma iofi, o auro ia;

⁵⁰o tanoa foi, ma selelamepa, ma ipu, ma ipu e asu a‘i, ma salefu, o auro lelei ia; o faamau auro e feafeai mo puipui o le fale aupito i tua, o le mea e sili ona paia lea; atoa ma puipui o le fale, o le malumalu lea.

⁵¹Ua uma foi ona fai o le galuega uma na faia e le tupu o Solomona mo le fale o Ieova. Ona au mai lea e Solomona o mea na faasaina e lona tamā o Tavita; o ario, ma auro, ma ipu; ua ia tuu faatasi foi ma oloa o le fale o Ieova.