Read Samoan Old Version Bible – O LE TUSI PAIA II TUPU, 1 Bible Online

II TUPU, 1 - Samoan Old Version Bible – O LE TUSI PAIA bible

II TUPU, 1

¹Ua sili le oti o Aapo, ona foua lea o Isaraelu e Moapi.

²Ua paū ifo Aasaia i le mea faaupega o le faamalama i lona afeafe aupitoaluga i Samaria, ona ma‘i ai lea; ona aauina atu ai lea e ia o auauna, ua fai atu i ai, Ina o ia, ina fesili atu ia Pelesepulo le atua o Ekerona, pe ou te malolo i lenei ma‘i.

³A ua fetalai atu le agelu a Ieova ia Elia le Tisepi, Tu ia i luga, ina alu ae e faafetaiai i auauna a le tupu o Samaria; ia e fai atu foi ia te i latou, Ona ua leai ea se Atua i Isaraelu tou te o atu ai e fesili ia Pelesepulo le atua o Ekerona?

⁴O le mea lea o loo faapea ona fetalai mai ai o Ieova, E te le alu ifo lava i lea moega ua e alu ae i ai, a o le a e oti lava oe. Ona alu ai lea o Elia.

⁵Ua foi atu auauna ia te ia, ona fai mai ai lea o ia ia te i latou, Se a ea le mea ua outou foi mai ai?

⁶Ona latou fai atu ai lea ia te ia, Na alu ae le tasi tagata e faafetaiai mai ia te i matou, na fai mai foi o ia ia te i matou, O ia, ina foi atu ia i le tupu na aauina outou, ma fai atu ia te ia, O loo faapea ona fetalai mai o Ieova, Ona ua leai ea se Atua i Isaraelu, ua e aauina atu ai e fesili ia Pelesepulo le atua o Ekerona? o le mea lea e te le alu ifo ai i lena moega ua e alu ae i ai, a o le a e oti lava oe.

⁷On fai mai lea o ia ia te i latou, Se tagata pe ī ea le na alu ae e faafetaiai ia te outou, ma fai atu na upu ia te outou?

⁸Ona latou tali atu ai lea ia te ia, O le tagata taufulufulua, ua fusi foi lona sulugātiti i le fusi pa‘u. Ona fai mai lea o ia, o Elia le Tisepi lea.

⁹Ona ia aauina mai lea ia te ia o le ta‘ita‘i o le toalimagafulu ma lona toalimagafulu. Ona alu ae lea o ia ia te ia, faauta, foi, o loo nofo ia i le tumutumu o le mauga; ua ia fai mai i ai, Le tagata o le Atua e, o loo fetalai mai le tupu, E te alu ifo.

¹⁰Ona tali atu lea o Elia, ua faapea atu i le ta‘ita‘i o le toalimagafulu, Afai o le tagata o le Atua a‘u, ia alu ifo le afi mai le lagi, e faaumatia ai oe ma lou toalimagafulu. Ona alu ifo ai lea o le afi mai le lagi, ua faauma ia te ia ma lona toalimagafulu.

¹¹Ona ia toe aauina mai lea ia te ia o le tasi ta‘ita‘i o le toalimagafulu ma lona toalimagafulu; ua fai mai foi o ia ia te ia, Le tagata o le Atua e, o loo faapea ona fetalai mai o le tupu, Ia vave ona e alu ifo.

¹²Ona tali atu ai lea o Elia, ua faapea atu ia te i latou, Afai o le tagata o le Atua a‘u, ia alu ifo le afi mai le lagi e faaumatia ai oe ma lou toalimagafulu. Ona alu ifo ai lea o le afi a le Atua mai le lagi, ua faauma ia te ia ma lona toalimagafulu.

¹³Ona toe aauina mai ai lea e ia o lona toatolu o ta‘ita‘i o le toalimagafulu ma lona toalimagafulu. Ona alu ae ai lea o lona toatolu o ta‘ita‘i o le toalimagafulu, ua oo atu ia, ma tootuli i ona tulivae i luma o Elia, ua aioi atu ia te ia, ma fai atu ia te ia, Le tagata o le Atua e, ia e alofa mai i lo‘u nei ola atoa ma ola o le toalimagafulu nei o au auauna.

¹⁴Faauta, na alu ifo le afi mai le lagi, ua faauma i uluai ta‘ita‘i o toalimagafulu e lua, ma o laua tai toalimagafulu; a o lenei, ia e alofa mai i lo‘u nei ola.

¹⁵Ona fetalai mai lea o le agelu a Ieova ia Elia, Ia oulua o ifo ma ia, aua e te mata‘u ia te ia. Ona tulai ai lea o ia, ua la o ifo i le tupu.

¹⁶Ona fai atu lea o ia ia te ia, O loo faapea ona fetalai mai o Ieova, Ona ua e aauina atu o auauna e fesili ia Pelesepulo le atua o Ekerona, ona ua leai ea se atua i Isaraelu e fesili ai i lana afioga? o le mea lea e te le maliu ifo ai i lea lava moega ua e maliu ae i ai, a o le a e maliu lava oe.

¹⁷Ona oti lea o ia e tusa ma le afioga a Ieova na fai atu ai Elia. Ona soloai ane ai lea o Ioramo e fai ma tupu i le lua o tausaga o Ioramo le atalii o Iosefatu le tupu o Iuta, auā e leai sona atalii.

¹⁸O toe o mea a Aasaia na ia faia, e lei tusia ea ia i le tusi i tala i nofoaiga a tupu o Isaraelu?