Read Samoan Old Version Bible – O LE TUSI PAIA II TUPU, 10 Bible Online

II TUPU, 10 - Samoan Old Version Bible – O LE TUSI PAIA bible

II TUPU, 10

¹Sa i Samaria foi o atalii o Aapo e toafitugafulu. Ua tusi foi e Ieu o tusi, ma avatu ai i Samaria, i alii o Isereelu o toeaina, atoa foi ma i latou na tausi i fanau a Aapo, ua faapea atu,

²A oo atu lenei tusi ia te outou, o ia te outou atalii o lo outou alii, e ia te outou foi kariota, ma solofanua, o le aai foi o nofo ‘olo, atoa ma auupega;

³ia outou filifili se atalii o lo outou alii, o se ua sili ma le tatau, ia outou faanofo foi ia te ia i le nofoalii o lona tamā, ma ia outou sauni tau mai ona o le aiga o lo outou alii.

⁴A ua matuā matatau lava i latou, ua faapea ane, Faauta, e lei tutu tupu e toalua i ona luma, pe faapefea ona tatou tutū ai?

⁵Ona ave ai lea ia Ieu o le feau a le na pule i le aiga, ma le na pule i le aai, ma toeaina, atoa ma e tausia tama, ua faapea mai, O au auauna i matou, matou te faia mea uma e te fetalai mai ai; matou te le faia se tupu; ina faia ia oe o le mea e te finagalo i ai.

⁶Ona toe tusi faalua atu ai lea o ia ia te i latou, ua faapea atu, Afai ua ia te au outou, ma outou usiusitai i a‘u upu, ia outou au mai i ulu o ia tagata o atalii o lo outou alii, i le tou o mai ai ia te au i Isereelu a taeao i le itu la faapenei. Na i ai foi atalii o le tupu e toafitugafulu tagata i alii o le aai, na latou tausi ia te i latou.

⁷Ua oo atu le tusi ia te i latou, ona latou ave ai lea o atalii o le tupu, ma latou fāsioti i tagata ia te toafitugafulu, ua fafao foi o latou ulu i ato, ma avatu ai ia te ia i Isereelu.

⁸Ona sau ai lea o le sāvali, ua ta‘u mai ia te ia, ua faapea mai, Ua latou au mai ulu o atalii o le tupu. Ona fai atu ai lea o ia, Ia outou tuuina i faupuega e lua i le puipui o le faitotoa seia taeao.

⁹Ua oo i le taeao, ona alu atu ai lea o ia, na tu atu, ma fai atu i le nuu uma, Ua amiotonu outou, faauta mai, na ou foua e a‘u lo‘u alii, ma fasioti ia te ia; a o ai ea na fasioti ia te i latou nei uma?

¹⁰O lenei, ia outou iloa e le iuvale se mea e tasi o afioga a Ieova, sa fetalai mai ai Ieova i le aiga o Aapo; a ua faia e Ieova le mea sa na fetalaia mai i lana auauna o Elia.

¹¹Na fāsia e Ieu o i latou uma na totoe o le aiga o Aapo i Isereelu, atoa ma alii uma sa ia te ia ma ana aumea, ma ana ositaulaga, ua oo ina le faatotoe e ia se toatasi ia te ia.

¹²Ona tulai ai lea o ia, ua alu atu, o le a alu i Samaria, ua i le fale e fusi ai mamoe e leoleo mamoe, sa i le ala lea.

¹³Ona maua ai lea e Ieu uso o Aasaia le tupu o Iuta; ua na fai atu foi, O ai ea outou na? Ona fai mai ai lea o i latou, O uso o Aasaia i matou, o loo o ifo foi i matou e fealofani ma alo o le tupu, atoa ma alo o le masiofo.

¹⁴Ona fai atu ai lea o ia, Ina pue ola ia te i latou. Ona latou pue ola lea ia te i latou, ma fāsioti ia te i latou, i le lua o le fale e fusi ai mamoe, o tagata e toafagafulu ma le toalua; e lei faatoe lava e ia so latou.

¹⁵Ua alu ese ia i lea mea, ona iloa ai lea e ia o Ionatapa le atalii o Rakapa, ua faafetaiai mai ia te ia. Ona alofa atu ai lea ia te ia, ua fai atu i ai, Po ua tonu mai ea lou loto, faapei o lo‘u loto i lou loto? Ona fai mai ai lea o Ionatapa, O lea lava. Afai ua faapea, au mai ia lou lima. Ona au mai ai lea e ia o lona lima; ona ia avae ai lea o ia ia la faatasi i le kariota.

¹⁶Ona fai atu ai lea o ia, Ia ta o ma a‘u, e te iloa ai lo‘u maelega ia Ieova. Ua latou fai atu ia te ia e tietie i lona kariota.

¹⁷Ua oo ia i Samaria, ona fasi uma ai lea e ia i e na totoe o sa Aapō i Samaria, ua oo ina faaumatia o ia, faapei o le afioga a Ieova, na ia fetalai mai ia Elia.

¹⁸Ona faapotopoto ai lea e Ieu o le nuu uma, ua fai atu ia te i latou, Sa auauna faaitiiti Aapo ia Paala, a e tele ona auauna o Ieu ia te ia.

¹⁹O lenei, ina faapotopoto mai ia ia te au o perofeta uma a Paala, o ana auauna uma, atoa ma ana ositaulaga uma; aua ne‘i nofo se tasi; auā o le a fai la‘u taulaga tele ia Paala; ai se nofo e le ola ia. A ua faia lea mea e Ieu ma le faa‘ole‘ole, ina ia faaumatia e ia o e auauna ia Paala.

²⁰Ua fai atu Ieu, Tala‘i ia o se nunu ia Paala. Ona latou tala‘i ai lea.

²¹Ua ave foi le feau a Ieu ia Isaraelu uma; ona o mai ai lea auauna uma lava a Paala, e lei toe se tasi tagata e le o sau. Ua latou ulufale foi i le fale o Paala, ua tumu saisai ai le fale o Paala.

²²Ona fai atu ai lea o ia i le na leoleo i le fale e tuu ai ofu, Au mai ia o ofu mo i latou uma o e auauna ia Paala. Ona au mai ai lea e ia o ofu mo i latou.

²³Ona alu ai lea o Ieu, o i laua ma Ionatapa le atalii o Rakapa, i le fale o Paala, ma na fai atu i e auauna ia Paala, Suesue ia, ma ia iloa ina ne‘i iinei ia te outou sē auauna ia Ieova, ia na o e auauna ia Paala lava.

²⁴Ua latou ulufale atu e fai ai taulaga ma taulaga mu; ona tofia lea i fafo e Ieu o tagata e toavalugafulu, ua fai atu foi, A sao se tasi o ia tagata ua ou au mai i o outou lima, e suia o ia i so outou.

²⁵Ua uma ona faia le taulaga mu, ona fai atu ai lea o Ieu i le ‘au e faafeao, ma e ta‘i ‘au, Ulufale atu ia, ina fāsioti ia te i latou, ne‘i sao i fafo se tasi. Ona latou fāsioti ai lea ia te i latou i le pelu, ua lafoai foi i latou i fafo e le ‘au e faafeao ma e ta‘i ‘au. Ona latou o ai lea i le aai o le fale o Paala.

²⁶Ona latou au mai ai lea i fafo o tupua ai le fale o Paala, ma latou susunu ai.

²⁷Ua latou lepeti i le tupua o Paala, ua latou lepeti foi i le fale o Paala, ua fai ai ma māliuga, ua oo lava i le aso nei.

²⁸O lenei, ua faaumatia Paala e Ieu i Isaraelu.

²⁹A e peitai ua le liliu ese lava Ieu i agasala a Ierepoamo le atalii o Nepata, o le na faatupu le agasala ia Isaraelu; o tamai povi auro foi ia na i ai i Peteli atoa foi ma Tanu.

³⁰Ona fetalai mai lea o Ieova ia Ieu, Ua lelei lau mea na fai ina ua e faia le mea tonu i o‘u luma, ma ua e faia i le aiga o Aapo e tusa ma mea uma na ou loto i ai, o le mea lea e nonofo ai ou atalii i le nofoālii o Isaraelu e oo i le fa o tupulaga.

³¹A e lei anaana Ieu e savali i le tulafono a Ieova le Atua o Isaraelu ma lona loto atoa; ina ua le liliu ese i agasala a Ierepoamo, o le na faatupu le agasala ia Isaraelu.

³²O ia ona po na amata ai e Ieova ona faaitiitiina o Isaraelu; na fāsia foi e Asaeli o i latou i itu uma o Isaraelu,

³³e amata i Ioritana i le itu e alu ae ai le la, o le nuu uma o Kiliata, o sa Katō, ma sa Reupenā, atoa ma sa Manasē, e amata i Aroeru e latalata i le alia o Arinona, o Kiliata atoa ma Vasana.

³⁴O toe o mea na faia e Ieu ma mea uma na ia faia, atoa ma lona fitafita uma, e lei tusia ea i le tusi o tala i nofoaiga a tupu o Isaraelu?

³⁵Ua taoto foi Ieu faatasi ma ona tamā; ua latou tanu ia te ia i Samaria; ona soloai ane ai lea o Ioasasa lona atalii e fai ma tupu.

³⁶O aso foi na fai ai Ieu ma tupu ia Isaraelu i Samaria, e luafulu ma le valu o tausaga ia.