Read Samoan Old Version Bible – O LE TUSI PAIA II TUPU, 11 Bible Online

II TUPU, 11 - Samoan Old Version Bible – O LE TUSI PAIA bible

II TUPU, 11

¹Ua iloa e Atalia le tinā o Aasaia ua oti lana tama, ona tulai ai lea o ia,

²ua fasioti i le fanau uma a le tupu. A e peitai o Iosapa le afafine o le tupu o Ioramo, le tuafafine o Aasaia, na ia ave ia Ioasa le atalii o Aasaia, ua āisola ia te ia i atalii o le tupu e na fasiotia; ua latou nā ia te ia, o ia ma le na faasusu ia te ia, i le afeafe moe, ia le iloa e Atalia; ona le fasiotia ai lea o ia.

³Sa i ai foi o ia ia te ia ua natia i le fale o Ieova i tausaga e ono. Ua fai foi Atalia ma tupu i le nuu.

⁴A o le fitu o tausaga ua alu ai le feau a Ieoiata, ua aami i alii o taitoaselau, ma le au keri, atoa ma le ‘au e faafeao, ua na au mai i latou ia te ia i le fale o Ieova; ona fai lea o le feagaiga ma i latou, ma fai atu ia tauto i latou i le fale o Ieova, ona faaali atu ai lea ia te i latou o le atalii o le tupu.

⁵Ona fai atu ai lea o ia ia te i latou, ua faapea atu, O le mea lenei tou te faia; O le tasi vaega, o ona vaega e tolu o outou o e ulufale mai i le sapati, e fai i latou ma leoleo o le fale o le tupu;

⁶e i ai foi le tasi vaega i le faitotoa o Sura, e i ai foi le tasi vaega i le faitotoa i tua o le ‘au e faafeao; tou te leoleo ai le fale, ne‘i osofia.

⁷E lua vaega foi o outou uma o e ulufafo i le sapati, latou te leoleo i le fale o Ieova e latalata i le tupu.

⁸Tou te vagavagai foi i le tupu ia soo ai, o le tagata ma lana auupega i lona lima; o se sau foi i totonu o ‘au e faaatusolo ia fasiotia o ia; ia outou i ai foi i le tupu i lona ulufafo atu ma lona ulufale mai.

⁹Ona faia lava lea e alii o taitoaselau e tusa ma mea uma na fai atu ai Ieoiata le ositaulaga; ua taitasi ma ave i ona tagata o e ulufale mai i le sapati, atoa ma e ulufafo i le sapati; ua latou o mai ia Ieoiata le ositaulaga.

¹⁰Ona avatu ai lea e le ositaulaga i alii o taitoaselau o tao ma talita a le tupu o Tavita na i le fale o Ieova.

¹¹Ona tutū ai lea o le ‘au e faafeao, o le tagata ma lana auupega i lona lima, e amata i le itu taumatau o le fale, e oo i le itu tauagavale o le fale i tafatafa ane o le fata faitaulaga ma le fale, ma le tupu e soo ai.

¹²Ona au mai ai lea e ia o le atalii o le tupu, ua faaeeina atu foi ia te ia le palealii, ma tuuina atu i ai le tulafono; ua latou fai ai o ia ma tupu, ua faauu foi ia te ia; ona latou taufaipatilima lea, ma fai atu, Ia soifua le tupu.

¹³Ua faalogo Atalia i le vāvāō o le nuu e femoei, ona sau ai lea o ia i le nuu i le fale o Ieova.

¹⁴Ua na vaai mai, faauta, o le tupu ua tu i le pou e faapei o le tu, ma alii ma e ili pu e latalata i le tupu, ma tagata uma o le nuu ua olioli ma ili pu; ona saei ai lea e Atalia ona ofu, ua alaga, O le fouvale, O le fouvale.

¹⁵Ona fai atu ai lea o Ieoiata le ositaulaga i alii o taitoaselau, o alii o ‘au, ua faapea atu ia te i latou, Ia outou ave ia te ia i tua o ‘au ua faaatusolo, o sē mulimuli atu foi ia te ia ia fasioti i le pelu. Auā na fai atu le ositaulaga, Aua ne‘i fasiotia o ia i le fale o Ieova.

¹⁶Ua latou pue ia te ia, ona alu ai lea o ia i le ala e ui mai ai solofanua i le fale o le tupu, ua fasiotia foi o ia i lea mea.

¹⁷Ona faia lea e Ieoiata o le feagaiga a Ieova ma i latou, o le tupu ma le nuu, e avea ai i latou ma nuu o Ieova; o le feagaiga foi a le tupu ma le nuu.

¹⁸Ona o atu ai lea o tagata uma o le nuu i le fale o Paala, ma latou lepetia; ua latou matuā tu‘imomoia ona fata faitaulaga ma ona tupua; ua latou fasioti foi ia Matana le ositaulaga a Paala i luma o fata faitaulaga. Ona tofia ai lea e le ositaulaga o e leoleo i le fale o Ieova.

¹⁹Ona ave lea e ia o alii o taitoaselau, ma le au keri, ma le ‘au e faafeao, atoa ma tagata uma o le nuu, ona latou o ifo ai lea ma le tupu nai le fale o Ieova i le fale o le tupu, ua ui mai i le ala o le faitotoa o le ‘au e faafeao. Ona tietie ai lea o ia i le nofoālii o tupu.

²⁰Ona olioli ai lea o tagata uma o le nuu, ua filemu foi le aai; a ua fasia Atalia i le pelu e latalata i le fale o le tupu.

²¹Ua fai ma tupu Ioasa i le fitu o ona tausaga.