Read Samoan Old Version Bible – O LE TUSI PAIA II TUPU, 12 Bible Online

II TUPU, 12 - Samoan Old Version Bible – O LE TUSI PAIA bible

II TUPU, 12

¹O le fitu o tausaga o Ieu na fai ai Ioasa ma tupu; o tausaga e fagafulu na fai ai o ia ma tupu i Ierusalema. O le igoa foi o lona tinā o Sevi o le Peresepa.

²Ua faia foi e Ioasa le amiotonu i luma o Ieova i ona aso uma na a‘oa‘o atu ai Ieoiata le ositaulaga ia te ia.

³Na ona ua le aveeseina mea maualuluga; na fai taulaga pea le nuu, ma faamu mea manogi i mea maualuluga.

⁴Ua fai atu Ioasa i le au faitaulaga. O tupe uma o mea e faapaiaina e aumaia i le fale o Ieova, o tupe a tagata taitoatasi ua faitaulia, o tupe o togiola e faapei ona faatatauina le tagata, ma tupe uma e manatu i ai le loto o le tagata e au mai i le fale o Ieova,

⁵O ositaulaga ia taitasi ma talia ia tupe i tagata ua latou masani, ma ia latou toe faasoo i mea ua lepetia o le fale, i mea uma e iloa ai se mea ua lepetia.

⁶Ua oo i le luafulu ma le tolu o tausaga o Ioasa le tupu, a ua le faasooina e le au faitaulaga o mea ua lepetia o le fale.

⁷Ona aami ai lea e Ioasa le tupu o Ieoiata le ositaulaga atoa ma le au ositaulaga, ua fai atu ia te i latou, Pe se a ea le mea ua outou le faasoo ai i mea ua lepetia o le fale? O lenei, aua ne‘i toe talia tupe i tagata ua outou masani, a ia tuu atu ai lava e fai ai mea ua lepetia o le fale.

⁸Ona usiusitai ai lea o le au ositaulaga o le a le toe talia tupe i le nuu, e le faasoo foi mea na lepetia o le fale.

⁹Ona ave ai lea e Ieoiata le ositaulaga o le atolaau, ua fai foi le gutu i lona ufi, ona tuu ai lea i tafatafa o le fata faitaulaga i le itu taumatau o le tagata e ulu mai i le fale o Ieova; ona fafao lea i ai e faitaulaga na leoleo i le faitotoa o tupe uma na aumaia i le fale o Ieova.

¹⁰Ua latou iloa e tele tupe i le atolaau, ona o ae ai lea o le tusiupu a le tupu ma le ositaulaga sili, ua fafao i taga, ma faitau i tupe na maua i le fale o Ieova.

¹¹Ona la avatu ai lea o tupe na faitauina ia te i latou ua fai le galuega e na leoleo i le fale o Ieova; ua latou tuu atu ai i tufuga, ma tufuga ati fale, e na galulue i le fale o Ieova, o e ati pa foi,

¹²ma e talai maa; e faatau a‘i foi laau ma maa talai e faasoo a‘i mea ua lepetia o le fale o Ieova, atoa ma mea uma na avatu mo le fale e faasoo a‘i.

¹³A o tupe na aumaia i le fale o Ieova e lei fai a‘i mo le fale o Ieova ni tanoa ario, po o sele lamepa, po o ipu, po o pu, ni mea auro po o mea ario lava;

¹⁴a ua latou avatu ai i e na fai le galuega, ma ua latou faasoo ai le fale o Ieova.

¹⁵Ua la le faamasino foi i tagata na la tuuina atu i ai tupe e avatu i e faigaluega; auā ua latou faamaoni.

¹⁶O tupe ona o le sese ma tupe ona o agasala na le aumaia ia i le fale o Ieova; e a ositaulaga ia.

¹⁷O ona po ia na alu ae ai Asaeli le tupu o Suria, ua tau ma Kata, ua aea foi; ona faasaga atu ai lea o Asaeli o le a alu ae e tau ma Ierusalema.

¹⁸Ona ave ai lea e Ioasa le tupu o Iuta o mea paia uma na faasaina e ona tamā o Iosefatu, ma Ioramo, ma Aasaia, o tupu o Iuta, atoa ma ana lava mea paia, atoa ma auro uma na i ai i mea e teu ai oloa o le fale o Ieova atoa ma le fale o le tupu, ua avatu ai ia Asaeli le tupu o Suria; ona alu ese ai lea o ia i Ierusalema.

¹⁹O toe o mea na faia e Ioasa, atoa ma mea uma na faia e ia, e lei tusia ea i le tusi o tala i nofoaiga a tupu o Iuta?

²⁰Ua tulai foi ana auauna ua fou, ua fasioti ia Ioasa i le fale o Milo e ui ifo ai i Sila.

²¹Auā o Iosaka le tama tane a Semea, ma Iosapa le tama tane o Someli, o ana auauna, na la fasi ia te ia, ona oti ai lea o ia; ua latou tanu ia te ia faatasi ma ona tamā i le aai a Tavita. Ona soloai ane ai lea o Amasia lona atalii e fai ma tupu.