Read Samoan Old Version Bible – O LE TUSI PAIA II TUPU, 14 Bible Online

II TUPU, 14 - Samoan Old Version Bible – O LE TUSI PAIA bible

II TUPU, 14

¹O le lua o tausaga o Ioasa le atalii o Ioasasa le tupu o Isaraelu na fai ai ma tupu Amasia le atalii o Ioasa le tupu o Iuta.

²O le luafulu ma le lima o ona tausaga na fai ai o ia ma tupu; e luafulu ma le iva foi o tausaga na fai ai o ia ma tupu i Ierusalema. O le igoa foi o lona tinā o Ioatana, o le Ierusalema ia.

³Na ia faia foi le amiotonu i luma o Ieova, a e lei faapei o Tavita lona tamā; na ia faia mea uma faapei ona faia e lona tamā o Ioasa.

⁴A e peitai na le aveeseina mea maualuluga; na faia pea e le nuu o taulaga, ma latou faamu mea manogi i mea maualuluga.

⁵Ua oo ina ua mau le malo ia te ia, ona ia fasioti lea i ana auauna o e na fasia lona tamā le tupu.

⁶A ua na le fasiotia fanau a ia fasi tagata, e tusa ma le upu ua tusia i le tusi o le tulafono a Mose, na poloai mai ai Ieova, ua faapea mai, Aua ne‘i fasiotia tamā e sui a‘i le fanau, aua ne‘i fasiotia foi le fanau e sui a‘i o latou tamā; a ia taitasi le tagata ma fasiotia o ia ona o lana lava agasala.

⁷Na ia fasia Etoma e sefulu afe i le vanu masimā; ua fao mai foi Sela i le taua, ua faaigoa ai foi o Iokatielu, ua oo mai i le aso nei.

⁸Ona auina atu ai lea e Amasia o le sāvali ia Ioasa le atalii o Ioasasa le atalii o Ieu le tupu o Isaraelu, ua faapea atu, Maliu mai ia, se‘i ta fesilafa‘i.

⁹Ona tali mai ai lea o Ioasa le tupu o Isaraelu ia Amasia le tupu o Iuta, ua faapea mai, Na ave le feau a le laau talatala o i Lepanona i le arasi o i Lepanona, ua faapea atu, Au mai ia lou afafine e fai ma avā a lo‘u atalii; a ua ui ane le manu feai sa i Lepanona, ua soli i le laau talatala.

¹⁰Ua e fasia lava Etoma, ua faamaualugaina ai lou loto; mitamita ia i lea mea, ma nofo pea i lou fale; e te faatupu le leaga i se a, ina ia malaia ai oe atoa ma Iuta faatasi ma oe?

¹¹A ua le faalogo mai Amasia; ona alu ae ai lea o Ioasa le tupu o Isaraelu, ua la feiloa‘i o ia ma Amasia le tupu o Iuta i Petesemesa le aai o Iuta.

¹²Ona fasia lea o Iuta e Isaraelu, ua latou taitasi ma sola i o latou fale ie.

¹³Ona pue ai lea e Ioasa le tupu o Isaraelu ia Amasia le tupu o Iuta, le atalii o Ioasa, le atalii ia o Aasaia i Petesemesa, ua o mai i Ierusalema; ona lepeti ai lea e ia o le pa o Ierusalema, e amata i le faitotoa o Efaraima e oo i le faitotoa o le tulimanu, o kupita e fa selau.

¹⁴Ua na ave foi auro ma ario uma, atoa ma ipu uma sa maua i le fale o Ieova, ma mea e teu ai oloa i le fale o le tupu, atoa ma ni alii e fai ma faafoi ita. Ona foi atu ai lea o ia i Samaria.

¹⁵O toe o mea a Ioasa na faia e ia, ma lona fitafita, ma lo la taua ma Amasia le tupu o Iuta, e lei tusia ea i le tusi o tala i nofoaiga a tupu o Isaraelu?

¹⁶Ua taoto foi Ioasa faatasi ma ona tamā, ua tanumia i Samaria faatasi ma tupu o Isaraelu; ona soloai ane ai lea o Ierepoamo lona atalii e fai ma tupu.

¹⁷E sefulu ma le lima tausaga na ola ai Amasia le atalii o Ioasa le tupu o Iuta talu ona mavae ona oti o Ioasa le atalii o Ioasasa le tupu o Isaraelu.

¹⁸O toe o mea na faia e Amasia, e lei tusia ea i le tusi o tala i nofoaiga a tupu o Iuta?

¹⁹Ua latou foua o ia i Ierusalema; ona sola ai lea o ia i Lakisa; a ua aauina nisi e tuliloa ia te ia i Lakisa, ua latou fasioti ia te ia lea mea.

²⁰Ona latou au mai ai lea ia te ia i luga o solofanua; ua tanumia o ia i Ierusalema faatasi ma ona tamā i le aai o Tavita.

²¹Ona ave ai lea e le nuu o Iuta uma o Asaraia i le sefulu ma le ono tausaga o lona ola, ma ua fai o ia ma tupu e sui ai lona tamā o Amasia.

²²Ua ia faia Elata, ma na toe tuuina mai ia Iuta ina ua taoto le tupu faatasi ma ona tamā.

²³O le sefulu ma le lima o tausaga o Amasia le atalii o Ioasa le tupu o Iuta na fai ai ma tupu i Samaria o Ierepoamo le atalii o Ioasa le tupu o Isaraelu, e fagafulu ma le tasi tausaga na ia pule ai.

²⁴Na ia faia le amio leaga i luma o Ieova, na ia le te‘a ese lava i agasala uma a Ierepoamo le atalii o Nepata o le na faatupu le agasala ia Isaraelu.

²⁵Na ia toe sii atu le tuaoi o Isaraelu, e amata i le ala e ui atu ai i Amato, e oo i le sami o i le eleele laugatasi, faapei o le afioga a Ieova le Atua o Isaraelu, na tŭlei mai ia Iona lana auauna o le atalii o Amitai, o le perofeta o Kataferu.

²⁶Auā ua silafia e Ieova le puapuaga o Isaraelu ua matuā tele lava; ua le toe se pologa ua le toe se sa‘oloto, ua leai foi se fesoasoani ia Isaraelu.

²⁷A ua le fetalai mai Ieova e soloiesea e ia le igoa o Isaraelu i lalo o le lagi; a o le lima o Ierepoamo le atalii o Ioasa na ia faaolaina ai i latou.

²⁸O toe o mea na faia e Ierepoamo, atoa ma mea uma na ia faia, ma lona fitafita na ia fai ai taua, ma na toe fao mai ai mo Isaraelu o Tamaseko ma Amato, na ia Iuta; e lei tusia ea i le tusi o tala i nofoaiga a tupu o Isaraelu?

²⁹Ua taoto foi Ierepoamo faatasi ma ona tamā, faatasi ma tupu o Isaraelu; ona soloai ane ai lea o lona atalii o Sakaria e fai ma tupu.