Read Samoan Old Version Bible – O LE TUSI PAIA II TUPU, 17 Bible Online

II TUPU, 17 - Samoan Old Version Bible – O LE TUSI PAIA bible

II TUPU, 17

¹O le sefulu ma le lua o tausaga o Aasa le tupu o Iuta na fai ai Hosea le atalii o Ele ma tupu o Isaraelu i Samaria i tausaga e iva.

²Na ia faia foi le amio leaga i luma o Ieova, a e lei ausia amio a tupu o Isaraelu e na muamua ia te ia.

³Ua sii mai le taua ia te ia e Salemanesa le tupu o Asuria, ua faitoilalo foi Hosea ia te ia, ma ua fai taulaga i ai.

⁴A ua iloa e le tupu o Asuria o Hosea a fouvale, auā na na auina le sāvali ia So le tupu o Aikupito, ua na le avane foi le taulaga i le tupu o Asuria, faapei o lea tausaga ma lea tausaga; o le mea lea na puipui ai ia te ia e le tupu o Asuria, ma na fusifusi ia te ia i le fale puipui.

⁵Ona alu ae lea o le tupu o Asuria i le nuu uma, ua alu ae lava i Samaria, ua sio ai i tausaga e tolu.

⁶O le iva o tausaga o Hosea na aea ai Samaria e le tupu o Asuria, ua na faatāfeaina foi Isaraelu i Asuria, ma tuuina atu ia te i latou i Hala ma Havoli e lata ane i le vaitafe o Kosane, atoa ma aai o Metai.

⁷Na oo ia mea ina ua agasala le fanauga a Isaraelu ia Ieova lo latou Atua, o le na aveina ae ia te i latou ai le nuu o Aikupito ai lalo o le lima o Farao le tupu o Aikupito, ma ua latou matatau i atua ese.

⁸Ua savavali foi i tu a nuu ese sa tulia e Ieova i luma o le fanauga a Isaraelu, atoa ma tu a tupu o Isaraelu sa latou faia.

⁹Na fai faalilolilo e le fanauga a Isaraelu mea e le tusa ia Ieova lo latou Atua; na latou faia foi mo i latou mea maualuluga i o latou aai uma, o le pae o tagata leoleo atoa ma le aai nofo ‘olo.

¹⁰Ua latou faatuina foi mo i latou tupua ma tupua o Asaira i luga i mauga maualuluga uma, ma lalo o laau lauolaola uma.

¹¹Ua latou faamu ai mea manogi i mea maualuluga uma, faapei o nuu ese e ua faatāfea e Ieova i o latou luma, ua latou faia foi mea leaga e faaonoono atu ai ia Ieova;

¹²auā ua latou auauna i tupua, o le mea na fetalai mai ai Ieova ia te i latou, Aua tou te faia lea mea.

¹³Ua aoai mai lava Ieova ia Isaraelu atoa ma Iuta e le au perofeta uma, ma tagata vaai uma, ua faapea mai, Ia outou liliu mai i o outou ala leaga, ma ia outou tausi i a‘u poloaiga ma a‘u sauniga, ia tusa ma le tulafono uma na ou poloai atu ai i o outou tamā, na ou tuuina atu ai foi ia te outou e a‘u auauna o le au perofeta.

¹⁴A ua latou le faalogo lava, a e peitai ua latou faamaaa i o latou ua, faapei o ua o latou tamā, o e na le talitonu ia Ieova lo latou Atua.

¹⁵Ua latou tiai foi ana sauniga ma lana feagaiga na osi ma o latou tamā, atoa foi ma ana tulafono na ia fetalai mai ai ia te i latou; ua latou mulimuli atu foi i le mea faatauvaa, ona amio faatauvaa ai lea o i latou; ua faaa‘oa‘o foi i nuu ese na vagavagaia i latou, na poloai mai ai Ieova ia te i latou, Aua ne‘i faia faapei o i latou.

¹⁶Ua latou tuua foi poloaiga uma a Ieova lo latou Atua, ua latou faia foi mo i latou tupua uamea, o tamai povi e lua; ua latou fai foi le tupua o Asaira, ua latou ifo foi i ‘au uma o le lagi, ma latou auauna ia Paala.

¹⁷Ua latou faaui ane o latou atalii ma o latou afafine i le afi, ua latou fai togafiti faataulāitu foi, ma saili faailoga; ua matuā tuuina atu foi i latou e i latou ia fai amio leaga i luma o Ieova e faaonoono atu ai ia te ia.

¹⁸O le mea lea na matuā toasa mai ai Ieova ia Isaraelu, ua ia ave ese ai ia te i latou i ona luma; e leai se na toe, na o le itu aiga lava o Iuta.

¹⁹O Iuta foi na le tausi i poloaiga a Ieova lo latou Atua, a ua latou savavali i tu a Isaraelu na latou faia.

²⁰Ona lafoai ai lea e Ieova o le fanau uma a Isaraelu, ma ia faapuapuagatia i latou, ua na tuuina foi i latou i lima o e na vete ia te i latou, ina seia oo ina lafoaiina i latou uma e ia.

²¹Auā na ia vavaeeseina Isaraelu ai le aiga o Tavita; ona latou fai ai lea mo latou tupu o Ierepoamo le atalii o Nepata; ua mimilo ese foi e Ierepoamo ia Isaraelu ne‘i latou mulimuli atu ia Ieova, na ia faatupu ia te i latou le agasala tele.

²²Na savavali foi le fanauga a Isaraelu i agasala uma a Ierepoamo na ia faia, na latou le te‘a ese ai lava.

²³Ua oo ina tuueseina e Ieova ia Isaraelu ai ona luma, e tusa ma lana afioga i ana auauna uma le au perofeta. O lea na faatāfeaina ai Isaraelu ai lo latou nuu i Asuria, ua oo mai lava i le aso nei.

²⁴Ona au mai ai lea e le tupu o Asuria o tagata mai Papelonia, ma Kuta, ma Ava, ma Amato, atoa foi ma Sefavaima, ua tuu atu i latou i aai o Samaria, o sui o le fanauga a Isaraelu, ua latou fai mo i latou o Samaria, ma latou nonofo i ona aai.

²⁵O le amataga o lo latou nonofo i lea nuu ua latou le matatau ai ia Ieova; ona aauina atu ai lea e Ieova o leona ia te i latou, na oti ai nisi o i latou.

²⁶Ona latou ta‘u atu ai lea i le tupu o Asuria, ua faapea atu, O nuu na e avea, ma tuuina i aai o Samaria, ua latou le iloa le tu a le Atua o le nuu; o lea ua aauina mai ai e ia o leona ia te i latou, faauta foi, ua oti ai ō latou, auā ua latou le iloa le tu a le Atua o le nuu.

²⁷Ona fai mai ai lea o le tupu o Asuria, ua faapea mai, Ina avatu ia le tasi o le au ositaulaga na outou aumaia i lea nuu, latou te o e nonofo ai, na te a‘oa‘o atu ia te i latou i le tu a le Atua o le nuu.

²⁸Ona alu atu ai lea o le tasi o le au ositaulaga na latou aumaia mai Samaria, ua nofo i Peteli, ma a‘oa‘o atu ia te i latou i le uiga o le mata‘u ia Ieova.

²⁹A ua taitasi le nuu ma fai o latou lava atua, ma tuu ai i fale o i mea maualuluga sa faia e tagata Samaria, taitasi le nuu ma fai ai i a latou aai na latou nonofo ai.

³⁰Na faia e tagata Papelonia o Suko-peno, na faia foi e tagata Kuta o Nekala, na faia foi e tagata Amato o Asima,

³¹na faia e tagata Ava o Niveasa ma Tareaka, o tagata o Sefavaima foi na latou susunu i a latou fanau i le afi mo Atameleko ma Anameleko, o atua ia o Sefavaima.

³²Na latou matatau ia Ieova, ma fai foi mo i latou o ositaulaga i mea maualuluga mai le nuu uma, na latou ositaulaga mo i latou i fale o i mea maualuluga.

³³Na latou matatau ia Ieova, a e auauna foi i o latou lava atua, faapei o tu a nuu e na faatāfeaina i latou nai lea mea.

³⁴Ua oo lava i le aso nei o latou o fai faapei o tu tuai. Latou te le matatau ia Ieova; latou te le fai foi faapei o a latou tu, ma a latou sauniga, ma le tulafono, ma le poloaiga na poloai mai ai Ieova i le fanauga a Iakopo, na ia faaigoaina o Isaraelu.

³⁵Na osi foi e Ieova le feagaiga ma i latou, ma na poloai mai ai ia te i latou, ua faapea mai, Aua tou te matatau i atua ese, aua tou te ifo ia te i latou, aua tou te auauna i ai, aua foi tou te ositaulaga ia te i latou.

³⁶A o Ieova, o le na aveina ae ia te outou ai le nuu o Aikupito i le mana tele ma le aao faaloaloa, tou te matatau ia te ia, tou te ifo ia te ia, tou te ositaulaga foi ia te ia.

³⁷O sauniga foi, ma tu, ma le tulafono, ma le poloaiga na ia tusi mai mo outou, tou te tausi i ai ia faia i aso uma; aua foi tou te matatau i atua ese.

³⁸O le feagaiga foi na ou osia ma outou, aua ne‘i galo lea ia te outou; aua foi tou te matatau i atua ese.

³⁹A e peitaī o Ieova lo outou Atua ia outou matatau i ai; ona laveai lea o ia ia te outou i lima o i latou uma lava o e ita mai ia te outou.

⁴⁰A e lei faalogo lava i latou, a e peitai ua latou faia lava faapei o a latou tu tuai.

⁴¹O lea na matatau ai ia nuu ia Ieova, a e auauna foi i a latou tupua ua ta. O a latou fanau foi, ma fanau a latou fanau, faapei ona faia e o latou tamā e faapea ona faia e i latou, ua oo mai lava i le aso nei.