Read Samoan Old Version Bible – O LE TUSI PAIA II TUPU, 21 Bible Online

II TUPU, 21 - Samoan Old Version Bible – O LE TUSI PAIA bible

II TUPU, 21

¹O le sefulu ma le lua o tausaga o Manase na fai ai o ia ma tupu; e limagafulu ma le lima o tausaga na ia tupu ai i Ierusalema. O le igoa foi o lona tinā o Efiseva.

²Na ia faia le amio leaga i luma o Ieova, faapei o amio leaga a nuu na tulia e Ieova i luma o le fanauga a Isaraelu.

³Ua na toe faia foi mea maualuluga sa faaumatia e Esekia lona tamā, ma na fai foi fata faitaulaga o Paala, ua na fai foi le tupua o Asaira, faapei ona faia e Aapo le tupu o Isaraelu, ma na ifo foi i ‘au uma a le lagi, ma auauna i ai.

⁴Ua ia fai foi fata faitaulaga i le fale o Ieova, o le mea na fetalai mai ai Ieova, O Ierusalema ou te tuu ai lo‘u igoa.

⁵Ua ia fai foi fata faitaulaga mo ‘au uma a le lagi i lotoā uma e lua o le fale o Ieova.

⁶Ua ia faaui ane foi lona atalii i le afi, ua iite foi i ao o le lagi, ma fai togafiti faataulāitu, ua saili foi i aitu vavalo, ma taulāitu; e tele lava le amio leaga na ia faia i luma o Ieova e faaonoono ai.

⁷O le tupua foi o Asaira na ia faia, ua ia faatuina i le fale sa fetalai ai Ieova ia Tavita ma Solomona lona atalii, O le fale nei atoa ma Ierusalema ua ou filifilia i itu aiga uma o Isaraelu ou te tuu ai lo‘u igoa e faavavau.

⁸Ou te le toe tulieseina Isaraelu i le laueleele na ou avatu ai i o latou tamā, tau lava ina ne‘i latou le anaana ia fai mea uma na ou poloai atu ai ia te i latou, atoa ma le tulafono uma na poloai atu ai e la‘u auauna o Mose ia te i latou.

⁹A ua latou le faalogo lava; ua faasese foi Manase ia te i latou e fai le amio leaga e sili i le amio na faia e nuu na faaumatia e Ieova i luma o le fanauga a Isaraelu.

¹⁰Ona fetalai mai lea o Ieova i perofeta ana auauna, ua faapea mai,

¹¹Ona ua faia e Manase le tupu o luta, ia mea leaga, e sili ona leaga i mea uma na faia e sa Amorī na muamua ia te ia, ua ia faatupu foi le agasala a Iuta i ana tupua;

¹²o le mea lea o loo faapea ona fetalai mai ai o Ieova le Atua o Isaraelu, Faauta, o loo au mai e a‘u le malaia i Ierusalema ma Iuta, e taitasi uma o e faalogologo i ai ma taalili ai ona taliga e lua.

¹³Ou te fālō foi i luga o Ierusalema le fua o Samaria ma le fua faatautau o le aiga o Aapo; ou te fufulu foi i Ierusalema pei ona fufulu e se tasi le tanoa, e fufulu ma faafaō ai.

¹⁴Ou te tuulafoaiina foi e o totoe o lo‘u tofi, ou te tuu atu foi ia te i latou i lima o e ua ita mai ia te i latou; e avea ai foi i latou ma tagata o taua ma vete mo i latou uma o e ita ia te i latou;

¹⁵auā ua faia e i latou le amio leaga i o‘u luma, ua faaonoono mai foi ia te au talu lava i le aso na o mai ai o latou tamā ai Aikupito, ua oo lava i le aso nei.

¹⁶Ua faamasaa foi e Manase toto o e le sala e tele lava, ua na matuā faatumuina ai Ierusalema; ua faaopoopo ai i lana agasala na ia faatupu ai le agasala ia Iuta, ia faia le amio leaga i luma o Ieova.

¹⁷O toe o mea na faia e Manase, atoa ma mea uma na na faia, ma lana agasala na agasala ai o ia, e lei tusia ea ia mea i le tusi o tala i nofoaiga a tupu o Iuta?

¹⁸Ua taoto foi Manase faatasi ma ona tamā, ona tanu ai lea o ia i le lotoā o lona fale, o le lotoā lea o Usa; ona soloai ane ai lea o Amone lona atalii e fai ma tupu.

¹⁹O le luafulu ma le lua o ona tausaga na fai ai Amone ma tupu, a e lua tausaga na tupu ai o ia i Ierusalema. O le igoa foi o lona tinā o Mesuleme, o le afafine o Arusa le Iatepa.

²⁰Na ia faia foi le amio leaga i luma o Ieova, faapei ona faia e lona tamā o Manase.

²¹Ua savali foi o ia i le ala uma sa savali ai lona tamā, ua na auauna i tupua sa auauna i ai lona tamā, ma ifo foi i ai.

²²Ua ia tuulafoai foi ia Ieova le Atua o ona tamā, ua ia le savali lava i le ala o Ieova.

²³Ona foua lea o Amone e ana auauna, ua latou fasioti foi i le tupu i lona fale.

²⁴Ona fasioti ai lea e tagata o le nuu ia te i latou uma na foua le tupu o Amone; ua tofia foi e tagata o le nuu lona atalii o Iosia e fai ma tupu e sui a‘i o ia.

²⁵O toe o mea a Amone na ia faia, e lei tusia ea ia mea i le tusi o tala i nofoaiga a tupu o Iuta?

²⁶Ua tanu foi o ia i lona tuugamau i le lotoā o Usa; ona soloai ane ai lea o Iosia lona atalii e fai ma tupu.