Read Samoan Old Version Bible – O LE TUSI PAIA II TUPU, 22 Bible Online

II TUPU, 22 - Samoan Old Version Bible – O LE TUSI PAIA bible

II TUPU, 22

¹Ua fai ma tupu Iosia i le valu o ona tausaga, e tolugafulu ma le tasi o tausaga na tupu ai o ia i Ierusalema. O le igoa foi o lona tinā o Ietita o le afafine o Ataia le Posekata.

²Na ia faia le amiotonu i luma o Ieova, ua ia savali foi i le ala uma o Tavita lona tamā, e lei alu ese ai lava ia i le itu taumatau, po o le itu tauagavale.

³O le sefulu ma le valu o tausaga o le nofoaiga a le tupu o Iosia na auina ai e le tupu i le fale o Ieova o Safana le atalii o Asalaia, le atalii ia o Mesulama, o le tusiupu, ua faapea atu,

⁴Alu ae ia ia Hilikia le faitaulaga sili, na te faitauina tupe uma ua aumaia i le fale o Ieova, o mea ua faaputuina mai i le nuu e i latou o e leoleo i le faitotoa;

⁵Ma ia latou avatu ai ia te i latou o e fai le galuega, o e leoleo i le fale o Ieova, latou te avatu ai ia te i latou o e fai le galuega i le fale o Ieova; ina ia toe faasoo mea ua lepetia o le fale;

⁶e avatu ai i tufuga, ma tufuga ati fale, ma e ati pa, e faatau a‘i foi laau ma maa talai, e faasoo a‘i le fale.

⁷A e peitai ua le faamasinoina i latou i tupe na tuuina atu ia te i latou, auā ua latou faia ma le faamaoni lava.

⁸Ua fai atu Hilikia le faitaulaga sili ia Safana le tusiupu, Ua ou maua le tusi o le tulafono i le fale o Ieova. Ona avatu ai lea o le tusi e Hilikia ia Safana, ua na faitau ai.

⁹Ona sau ai lea o Safana le tusiupu i le tupu, ua tala mai i le tupu, ua faapea mai, Ua sasaaina e au auauna o tupe na i le fale, ua tuuina atu foi ia te i latou o e fai le galuega, o e leoleo i le fale o Ieova.

¹⁰Ona ta‘u mai ai lea e Safana le tusiupu i le tupu, ua faapea mai, Ua au mai ia te au e Hilikia le faitaulaga o le tusi. Ona faitau ai lea e Safana i luma o le tupu.

¹¹Ua faalogo le tupu i upu o le tusi o le tulafono, ona saei ai lea e ia ona ofu.

¹²Ona fai atu ai lea o le tupu ia Hilikia le faitaulaga, ma Aikamo le atalii o Safana, ma Akapora le atalii o Mekaia, ma Safana le tusiupu, atoa ma Asaia le auauna a le tupu, ua faapea atu,

¹³O ia outou, ina fesili atu ia Ieova mo a‘u, ma le nuu, atoa ma Iuta uma lava i upu o le tusi nei ua maua, auā e tele lava le toasa o Ieova ia te i tatou, auā ua le faalogo o tatou tamā i upu o lenei tusi ina ia faia ia tusa ma mea uma ua tusia mai ai ia te i tatou.

¹⁴Ona o atu ai lea o Hilikia le faitaulaga, ma Aikamo, ma Akapora, ma Safana, ma Asaia ia Ulata le perofeta fafine le avā a Saluma le atalii o Tikeva, le atalii ia o Areasa, o le na tausi i ofu, (sa nofo o ia i Ierusalema i le mea e ta‘ua o le lua o aai;) ua latou tautala ma ia.

¹⁵Ona fai mai ai lea o ia ia te i latou, O loo faapea ona fetalai mai o Ieova le Atua o Isaraelu, Ia outou fai atu i le tagata na aauina mai outou ia te au,

¹⁶o loo faapea ona fetalai mai o Ieova, Faauta, o le a a‘u aumaia se malaia i lenei mea atoa ma e o nonofo ai, o upu uma lava o le tusi na faitauina e le tupu o Iuta;

¹⁷auā ua latou tuua a‘u a e faamu mea manogi i atua ese, ina ia latou faaonoono mai ia te au i mea uma ua faia e o latou lima; o le mea lea o le a mu ai lava lo‘u ita i lenei mea, e le tineia lava.

¹⁸A o le tupu o Iuta na aauina mai outou e fesili ia Ieova, ia faapea ona outou fai atu ia te ia, O loo faapea ona fetalai mai o Ieova le Atua o Isaraelu i upu na e faalogo ai, auā ua malulu lou loto,

¹⁹ma ua e faamaulalo oe i luma o Ieova, ina ua e faalogologo i mea na ou fai atu ai i lenei mea, ma e o nonofo ai, e faatafunaina i latou ma fetuuina, ua e saei foi i ou ofu, ma e tagi i o‘u luma; o loo fetalai mai Ieova, Ua ou faalogo ai lava.

²⁰O lenei, faauta ea, ou te faaopoopoina atu oe i ou tamā, e oo atu foi oe i lou tuugamau ma le filemu; a e le iloa e oe le malaia uma ou te aumaia i lenei mea. Ona latou toe ta‘u mai ai lea i le tupu.