Read Samoan Old Version Bible – O LE TUSI PAIA II TUPU, 23 Bible Online

II TUPU, 23 - Samoan Old Version Bible – O LE TUSI PAIA bible

II TUPU, 23

¹Ona aau atu lea nisi e le tupu, ona latou faapotopoto ai lea ia te ia o toeaina uma o Iuta atoa ma Ierusalema.

²Ona alu ae ai lea o le tupu i le fale o Ieova, o ia atoa ma tagata uma o Iuta, ma i latou uma e na nonofo i Ierusalema, o le au ositaulaga foi, atoa ma le au perofeta, ma le nuu uma lava, o tama iti atoa ma e matutua; ona faitau atu lea e ia, o latou o faalogologo ai, i upu uma lava o le tusi o le feagaiga na maua i le fale o Ieova.

³Ua tu foi le tupu i le tulaga ma osi ai le feagaiga i luma o Ieova, e mulimuli atu ia Ieova, ma anaana i ana poloaiga, ma ana tulafono, atoa ma ana sauniga, i le loto atoa ma le agaga atoa, e faamauina foi upu o lenei feagaiga ua tusia i lenei tusi. Ua auga foi i le nuu uma le feagaiga.

⁴Ona fai atu ai lea o le tupu ia Hilikia le ositaulaga sili, ma ositaulaga e aupito ane ia te ia, atoa ma leoleo o le faitotoa, e au mai i fafo i le malumalu o Ieova o ipu uma na faia mo Paala, ma Asaira, ma ‘au uma a le lagi; ua ia susunu ai foi i tua o Ierusalema i le fanua o Ketarono, ona ave ai lea o latou lefulefu i Peteli.

⁵Ua ia aveeseina foi le au faitaulaga e na faatuina e tupu o Iuta e faamu mea manogi i mea maualuluga i aai o Iuta, atoa ma mea e vagavagai i Ierusalema; o i latou foi e na faamu mea manogi ia Paala, ma le la, ma le masina, ma faailoga o le lagi, atoa ma ‘au uma a le lagi.

⁶Ua ia au mai foi le tupua o Asaira nai le fale o Ieova, ua ave i tua o Ierusalema i le alia o Ketarono, ua susunu ai i le alia o Ketarono, ma na tu‘ililiia pei o le efuefu, ona lafo ai lea o lona efuefu i luga o tuugamau o tagata o le nuu.

⁷Ua ia lepeti foi i fale o e faasotoma sa i tafatafa o le fale o Ieova, na lalaga ai e fafine o fale mo Asaira i lea mea.

⁸Ua ia au mai foi ositaulaga uma na i aai o Iuta, ma na faaleaga i mea maualuluga na faamu ai mea manogi e le au ositaulaga, pau mai i Kipea pau mai i Peresepa, ma na lepeti foi i mea maualuluga o faitotoa sa i le mea e ui atu ai i le faitotoa o Iosua le alii e pule i le aai, sa i ai i le itu tauagavale o le tagata i le faitotoa o le aai.

⁹A e peitai e lei o ae ositaulaga o mea maualuluga i le fata faitaulaga o Ieova i Ierusalema, na ona latou aai i le areto lē faafefeteina faatasi ma o latou uso.

¹⁰Ua ia faaleaga foi i Tofeta o i le vanu o le atalii o Hinoma, ina ne‘i faaui ane e se tagata i lona atalii po o lona afafine i le afi ia Moloka.

¹¹Ua ia ave ese foi i solofanua na tuuina e tupu o Iuta mo le la i le faitotoa o le fale o Ieova, e lata ane i le afeafe o Natana-meleka le auauna sili sa i Parevara, ma na susunu nofoa faataavalevale o le la i le afi.

¹²Ua lepeti foi e le tupu o fata faitaulaga na i luga o le afeafe aupitoaluga o Aasa na faia e tupu o Iuta, atoa ma fata faitaulaga na faia e Manase i lotoā uma e lua o le fale o Ieova, ona tele vave atu ai lea nai lea mea, ma sasaa atu o latou efuefu i le alia o Ketarono.

¹³Ua faaleaga foi e le tupu mea maualuluga sa i luma o Ierusalema i le itu taumatau o le mauga o le malaia, na faia e Solomona le tupu o Isaraelu mo Asaira le mea leaga a sa Saitonū, mo Kimosa foi le mea leaga a Moapi, mo Melekoma foi le mea leaga a le fanauga a Amoni.

¹⁴Ua ia tu‘ininii foi tupua, ma na vavae i lalo tupua o Asaira, ona faatutumu ai lea o mea sa latou i ai i ivi o tagata.

¹⁵O le fata faitaulaga foi sa i Peteli, o le mea maualuga na faia e Ierepoamo le atalii o Nepata, o le na faatupu le agasala ia Isaraelu, na ia lepeti i lea lava fata faitaulaga atoa ma le mea maualuga, ma na susunu le mea maualuga, ua tu‘ininii ai pei o le efuefu, ua na susunu foi le tupua o Asaira.

¹⁶Ona fāliu lea o Iosia, ua iloa atu ai tuugamau na i ai i le mauaga, ua aauina atu ai nisi e au mai ivi ai tuugamau, ona susunu ai lea i luga o le fata faitaulaga, ua faaleaga ai, e tusa ma le afioga a Ieova na alaga mai ai e le tagata o le Atua, o le na alaga mai ia upu.

¹⁷Ona fai atu ai lea o ia, O le a lena faailoga ou te iloa atu ai? Ona fai mai ai lea o tagata o le aai ia te ia, O le tuugamau lea o le tagata o le Atua na sau mai Iuta, ma alaga mai i na lava mea ua e faia i le fata faitaulaga i Peteli.

¹⁸Ona fai atu ai lea o ia, Tuu pea ia te ia, aua ne‘i oia e se tagata ona ivi. Ona sao ai lea ona ivi atoa ma ivi o le perofeta na sau mai Samaria.

¹⁹O fale uma foi o mea maualuluga sa i aai o Samaria, na faia e tupu o Isaraelu e faaonoono ia Ieova, ua aveeseina e Iosia, ua ia fai foi i ai faapei o mea uma na ia faia i Peteli.

²⁰Ua ia fasiotia le au ositaulaga o mea maualuluga sa i ai i luga o fata faitaulaga, ma na susunu ai ivi o tagata; ona foi atu ai lea o ia i Ierusalema.

²¹Ona poloai ai lea o le tupu i le nuu uma lava, ua faapea atu, Ia outou fai le paseka ia Ieova lo outou Atua, faapei ona tusia i le tusi o lenei feagaiga.

²²Auā e lei faia lava se paseka faapei o lenei talu i ona po o faamasino e na faamasino ia Isaraelu, atoa ma ona po uma o tupu o Isaraelu, ma tupu o Iuta;

²³na o le paseka lava lenei na faia ia Ieova i Ierusalema i le sefulu ma le valu o tausaga o le tupu o Iosia.

²⁴Ua aveeseina foi e Iosia e sa i ai aitu vavalo, ma taulāitu, ma faatagata, ma tupua, atoa ma mea inosia uma na iloa i le nuu o Iuta ma Ierusalema, ina ia faataunuuina e ia o upu o le tulafono na tusia i le tusi na maua e le ositaulaga o Hilikia i le fale o Ieova.

²⁵E lei muamua ia te ia se tupu e tusa ma ia, o le na liliu atu ia Ieova ma lona loto atoa, ma lona agaga atoa, ma lona malosi atoa, e tusa ma le tulafono uma a Mose; talu ai foi e lei tu mai se tusa ma ia.

²⁶E ui lava i lea e lei liliuseina e Ieova lona toasa matuā tele na ia toasa ai ia Iuta, ona o mea faaonoono uma na faaonoono ai Manase ia te ia.

²⁷A ua faapea mai Ieova, Ou te ave ese ia Iuta foi i o‘u luma, faapei ona ou ave ese ia Isaraelu; ou te tiai foi le aai nei o Ierusalema na filifilia e a‘u, atoa foi ma le fale na ou fai atu ai, E i ai lo‘u igoa.

²⁸O toe o mea na faia e Iosia, ma mea uma na ia faia, e lei tusia ea ia mea i le tusi o tala i nofoaiga a tupu o Iuta?

²⁹O lana nofoaiga na alu ae ai Farao Neko le tupu o Aikupito i le vaitafe o Eufirate e sii ai le taua i le tupu o Asuria; ona alu atu ai lea o le tupu o Iosia e tau ma ia; ua la feiloai i Mekito, ona ia fasioti ai lea ia te ia.

³⁰Ua ave foi o ia ua oti, i le kariota e ana auauna ai Mekito, ua au mai ia te ia i Ierusalema, ma tanu ia te ia i lona tuugamau. Ona ave ai lea e tagata o le nuu ia Ioasasa le atalii o Iosia, ma faauu ia te ia ia fai o ia ma tupu, e sui a‘i lona tamā.

³¹O le luafulu ma le tolu o ona tausaga na fai ai Ioasasa ma tupu, e tolu foi masina na ia tupu ai i Ierusalema. O le igoa o lona tinā o Hamutala, le afafine o Ieremia o le Lipena.

³²Ua ia faia le amio leaga i luma o Ieova, pei o mea uma na faia e ona tamā.

³³Ua noanoa e Farao Neko ia te ia i Ripelu i le nuu o Amato, ina ia le fai o ia ma tupu i Ierusalema; ua ia faasalaina foi le nuu o taleni ario e selau, ma le taleni auro.

³⁴Ua tofia e fai ma tupu e Farao Neko o Eliakimo le atalii o Iosia, e fai ma sui o lona tamā o Iosia, a ua liliu lona igoa ia Ioakima; ona ia ave ai lea o Ioasasa, ua oo foi o ia i Aikupito, ua oti ai.

³⁵Ona avatu ai lea e Ioakima le ario ma le auro ia Farao, a ua na togitu taulaga a le nuu e avatu ai le ario, pei o le poloaiga a Farao, taitasi le tagata e tusa ma lana togiga, na ia faatauanau lava o ario ma auro ai tagata o le nuu e avatu ai ia Farao Neko.

³⁶O le luafulu ma le lima o ona tausaga na fai ai Ioakima ma tupu; e sefulu ma le tasi tausaga na tupu ai o ia i Ierusalema. O le igoa o lona tinā o Seputu o le afafine o Petaia o le Ruma.

³⁷Ua ia faia foi le amio leaga i luma o Ieova, faapei o mea uma na faia e ona tamā.