Read Samoan Old Version Bible – O LE TUSI PAIA II TUPU, 4 Bible Online

II TUPU, 4 - Samoan Old Version Bible – O LE TUSI PAIA bible

II TUPU, 4

¹Ua valaau ia Elisaia le avā a le tasi soo o le au perofeta, ua faapea mai, Ua oti lau auauna o la‘u tane, ua e silafia foi sa mata‘u lau auauna ia Ieova, a ua sau le ua matou aitalafu i ai, o le a na ave i a‘u tama tane e toalua e fai mona pologa.

²Ona fai atu lea o Elisaia ia te ia, Se a ea se mea ou te faia ia te oe? Ina ta‘u mai ia ia te au, pe se a se mea o ia te oe i le fale? Ona tali mai ai lea o ia, E leai se mea a lau auauna fafine o i lo‘u fale, ua na o le fagu suāuu lava.

³Ona fai atu ai lea o ia, Ina alu ia, ia e no ipu i tuā i tagata uma ua lata mai ia te oe, o ipu le susua, aua le itiiti.

⁴A ē ulufale ane, ia e pupuni le faitotoa i ou tua ma tua o au tama, i le e liligi atu i na ipu uma, ma tuu ese le ua tumu.

⁵Ona alu ane ai lea o ia, ua tapuni le faitotoa i ona tua ma tua o ana tama; ona la au mai ai lea o ipu ia te ia, ona liligi atu ai lea e ia.

⁶Ua tutumu ipu, ona fai atu lea o ia i lana tama, Ia toe au mai se isi ipu ia te a‘u; ona fai mai ai lea o ia ia te ia, E leai se toe ipu. Ona utu ai lea o le suāuu.

⁷Ona alu ai lea o ia, ua ta‘u atu i le tagata o le Atua. Ona fai mai ai lea o ia ia te ia, Alu ia, ina faatau atu le suāuu, i le e taui atu i le tagata ua outou aitalafu ai; a o mea ua totoe ia ola ai oe ma au tama.

⁸O le tasi aso na ui atu ai Elisaia i Sunema, sa i ai le tasi sa‘o tamaitai; na ia pulunaunau mai ia te ia se‘i ‘ai. Ona iu ai lea ina afe soo ai o ia e ‘ai ai i ana malaga i lea ala.

⁹Ona fai atu ai lea o ia i lana tane, Faauta mai, ua ou iloa o le tagata paia o le Atua lenei, o le sau soo ia te i taua.

¹⁰Ia ta faia se afeafe itiiti i luga e fai i le pa puipui o le fale; ia ta tuu ai se moega mo ia, ma se laulau, ma se nofoa, ma se tuugālamepa; a sau foi o ia ia te i taua, i le alu ane i ai o ia.

¹¹O le tasi aso na oo atu ai o ia i lea mea, ona ulu ane lea i le afeafe, ua taoto ai.

¹²Ua fai atu o ia ia Kiasi lana auauna, Valaau ia i lena tamaitai Sunema. Ona valaau lea o ia ia te ia, ona tu mai ai lea o ia i ona luma.

¹³Ona fai atu lea o ia ia te ia, Ia e fai atu i ai Faauta, ua tigaina oe ona o i maua i nei sauniga uma, se a se mea e faia mo oe? Pe ta‘u ea oe i le tupu, po o le alii e pule i au? Ona tali mai ai lea o ia, Ou te nofo faatasi ma lo‘u nuu.

¹⁴Ona fai ane lea o ia, Se a se mea e faia mo ia? Ona tali mai ai lea o Kiasi, E leai sana tama, ua toeaina foi lana tane.

¹⁵Ona fai atu lea o ia, Valaau atu ia te ia. Ona valaau atu lea o ia ia te ia, ona tu mai ai lea o ia i le faitotoa.

¹⁶Ona fai atu lea o ia, O lela tausaga, e te sapasapai i sau tama tane. Ona tali mai lea o ia, Aua, le alii e, le tagata o le Atua, aua e te ‘ole‘ole mai i lau auauna fafine.

¹⁷Ona to ai lea o le fafine, ua fanau mai ai lana tama tane i lea tausaga, e faatatau i le tau o le olaga sa fai atu ai Elisaia ia te ia.

¹⁸Ua matua le tama, ona oo lea i le tasi aso, ua alu atu ai o ia i lona tamā i e na sele saito.

¹⁹Ua fai atu ia i lona tamā, Lo‘u ulu e, lo‘u ulu e! Ona fai atu ai lea o ia i se tasi taulealea na te avea o ia i lona tinā.

²⁰Ona ave lea e ia, ua avatu ai i lona tinā; ona sii lea o ia i ona vae, ua oo ina tutonu o le la, ona oti ai lea o ia.

²¹Ona alu ae lea o le fafine, ua faataoto ia te ia i luga o le moega o le tagata o le Atua, ua pupuni le faitotoa, ona alu lea o ia i fafo.

²²Ona valaau atu ai lea o ia i lana tane, ua faapea atu, Se‘i e auina mai ia te au se tasi taulealea ma se asini, ou te vave atu ai i le tagata o le Atua, i lo‘u toe sau ai.

²³Ona fai mai lea o ia, O le a le mea e te alu ai ia te ia i le aso nei? E le o le masina faatoa vaaia lenei, e le o le sapati foi. A ua tali atu ai o ia, E le afaina.

²⁴Ona faanofoa lea e ia o le asini, ua fai atu i lana auauna, Ia faatelevave ona alu, aua ne‘i faatelegese ona faamomo‘e ona o a‘u, se‘i iloga ou fai atu ai ia te oe.

²⁵Ona alu ai lea o ia, ua oo atu i le tagata o le Atua i le mauga o Karamelu. Ua iloa mamao mai foi o ia e le tagata o le Atua, ona fai ane ai lea o ia ia Kiasi lana auauna, Faauta i lena tamaitai Sunema.

²⁶Ina momo‘e ia oe e faafetaiai ia te ia, fai atu foi i ai, E manuia ea oe? E manuia ea lau tane? E manuia ea le tama? Ona tali mai lea o ia, Ua manuia lava.

²⁷Ua oo mai o ia i le tagata o le Atua i le mauga, ona ‘u‘u lea o ia i ona vae; a ua faalatalata ane Kiasi, o le a tulei ese ia te ia. A ua fai atu le tagata o le Atua, Ina tuu pea ia ia te ia, auā ua tiga lona loto; a ua nanā e Ieova le mea ia te au, e lei faaalia mai ia te au.

²⁸Ona fai mai lea o ia, Na ou ole atu ea i se tama tane i lo‘u alii? Na ou le fai atu ea, Aua e te ‘ole‘ole mai ia te au?

²⁹Ona fai atu ai lea o ia ia Kiasi, Ina fusi ia lou sulugātiti, ia e ave foi lo‘u tootoo i lou lima, ma ia e alu atu; a oulua fetaiai ma se isi, aua ne‘i e ofo alofa ia te ia; a alofa mai foi se tasi ia te oe, aua e te toe tali atu i ai; ma ia e faaee lo‘u tootoo i mata o le tama.

³⁰Ona fai mai lea o le tinā o le tama, O loo soifua Ieova, ua e ola foi oe, ou te le te‘a ese ia te oe. Ona tulai lea o ia, ua mulimuli ia te ia.

³¹Ua muamua atu Kiasi ia te i latou, ua faaee le tootoo i mata o le tama; a ua leai se leo, ua le lagona foi. Ona foi mai lea o ia e faafetaiai ia te ia; ua fai mai foi ia te ia, ua faapea mai, E lei ala le tama.

³²Ua ulufale atu Elisaia i le fale, faauta foi, o le tama ua oti, ua faataoto i luga o lona moega.

³³Ua ulu atu o ia, ua pupuni foi le faitotoa, ua i totonu i laua, ona tatalo atu ai lea o ia ia Ieova.

³⁴Ona alu ae lea o ia, ua faō luga o le tama; ua faatatau lona gutu i lona gutu, ma ona mata i ona mata, ma ona lima i ona lima; ua taoto o ia i ona luga; ona mafanafana lea o le tino o le tama.

³⁵Ona foi atu lea o ia, ua taifoifaatasi ona savali i le loto fale; ona alu ae ai lea, ua taoto o ia i ona luga; ona mafatua faafitu ai lea o le tama, ua pupula ae foi mata o le tama.

³⁶Ona valaau lea o ia ia Kiasi, ua faapea atu, Valaau ia i lena tamaitai Sunema. Ona valaau atu lea o ia i ai. Ua sau foi o ia ia te ia, ona fai atu ai lea o ia, Sii ae ia o lau tama.

³⁷Ona ulu mai lea o ia, ua faapaū i ona vae, ua ifo toele; ona sii mai lea o lana tama, ua alu.

³⁸Ua toe alu atu Elisaia i Kilikala; ua oge le nuu; ua nonofo foi i ona luma soo o le au perofeta. Ona fai atu lea o ia i lana auauna, Faaee ia le pani tele i le afi, e tunu ai ni mea e ‘ai mā soo o le au perofeta.

³⁹Ona alu ai lea o le tasi i le vao e saili mea e ‘ai, ua maua se vine vao, ua tau ai ona fua, ua tumu ai lona ie, ona sau ai lea, ua tipi i le pani sa tunu a‘i mea e ‘ai; auā ua latou le iloa ia mea.

⁴⁰Ona latou liligi atu ai lea e aai ai tagata. O aai i latou i le mea na tunu, ona latou alalaga lea, ua faapea mai, Le tagata o le Atua e, ua i le pani le oti. Ua le mafai ona latou aai ai.

⁴¹A ua fai atu o ia, Ina aumaia se falaoa. Ona lafo lea e ia i le pani, ona fai atu ai lea, Liligi atu ia mā le nuu, latou te aai ai. Ua le toe i ai se mea leaga i le pani.

⁴²Ua sau le tasi tagata mai Paalasalisa, ua au mai i le tagata o le Atua o le mea e ‘ai o uluai fua, o areto karite e fua lua, atoa ma fua saito mata i lana taga. Ona fai atu lea o ia, Avatu ia ma le nuu, latou te aai ai.

⁴³Ona fai mai ai lea o lana auauna, Pe a ou laulauina atu ea mea nei i luma o tagata e toaselau? Ona toe fai atu lea o ia, Ina laulau atu ia mā le nuu, ina ia latou aai ai; aua o loo faapea ona fetalai mai o Ieova, Latou te aai ai, a e totoe lava.

⁴⁴Ona laulau atu ai lea e ia i o latou luma, ua latou aai ai ma ua totoe lava, pei ona fetalai mai ai o Ieova.