Read Samoan Old Version Bible – O LE TUSI PAIA I. NOFOAIGA A TUPU, 16 Bible Online

I. NOFOAIGA A TUPU, 16 - Samoan Old Version Bible – O LE TUSI PAIA bible

I. NOFOAIGA A TUPU, 16

¹Ua latou aumaia le atolaau a le Atua, ma ua tuu ai i totonu o le fale ie na faia e Tavita mo le atolaau; ona latou osia ai lea o taulaga mu ma taulaga faafetai i luma o le Atua.

²Ua uma ona fai taulaga mu ma taulaga faafetai e Tavita, ona faamanuia ai lea e ia o le nuu i le suafa o Ieova.

³Ua tufatufa atu e ia i tagata taitoatasi uma o Isaraelu, o tane ma fafine, taitoatasi ma le potoi areto, ma le ipu uaina, ma le areto suamalie.

⁴Ua tofia e ia nisi o sa Levī e auauna i luma e le atolaau a Ieova e faamanatunatu ai, ma faafetai, ma vivii ia Ieova le Atua o Isaraelu;

⁵o Asafo o le sili, e aupito ane i ai o Sakaria, o Ieielu, ma Semiramota, ma Ikielu, ma Matitia, ma Eliapo, ma Penaia, ma Opete-etoma; o Ieielu foi na i ai napeli, ma Kitara, a o Asafo ua faatagitagi i sumepalo.

⁶O Penaia ma Iaaseelu o faitaulaga na i ai pu, e tumau pea i luma o le atolaau o le feagaiga a le Atua.

⁷O lena lava aso na faatoa tuuina atu ai e Tavita i le lima o Asafo, ma ona uso, o lenei salāmo e faafetai atu ai ia Ieova.

⁸Vivii atu ia outou ia Ieova, valaau atu ia i lona suafa; ia outou faailo atu i nuu o ana mea na fai.

⁹Ia pepese outou ia te ia, ia outou fai pesega ia te ia; talatala atu ia outou i ona vavega uma lava.

¹⁰Ia outou mitamita i lona suafa paia; ia olioli loto o e sailiili ia Ieova.

¹¹Saili ia outou ia Ieova ma lona malosi; sa iliili ia te ia, aua le aunoa.

¹²Faamanatu ia outou i ana mea mamana na ia faia, o ona vavega, atoa ma faamasinoga o lona fofoga;

¹³o outou le fanauga a lana auauna o Isaraelu, o atalii o Iakopo na ia filifilia.

¹⁴O ia lava o Ieova lo tatou Atua; o i le lalolagi uma lava ana faamasinoga.

¹⁵Ia faamanatuina e outou e faavavau o lana feagaiga, o le upu na ia poloai mai i tupulaga e afe.

¹⁶O le feagaiga sa la osia ma Aperaamo ma lana tautoga ia Isaako;

¹⁷na ia faamauina foi ia Iakopo e fai ma tulafono, o le feagaiga e faavavau mo Isaraelu;

¹⁸na faapea atu ia te ia, Ou te avatu ia te oe le laueleele o Kanana, o le vaega lea o lo outou tofi;

¹⁹a o toaitiiti outou, e toaitiiti lava, mona o tagata ese i lea mea.

²⁰Na feoai foi i latou i lea nuu ma lea nuu, nai le tasi foi itu malo i le tasi nuu;

²¹ua le tuua e ia ia faasaua se tasi ia i latou; na ia aoai atu foi i tupu ona o i latou.

²²Ua faapea atu i ai, Aua le tago i e ua ou faauuina; aua foi le agaleaga atu i a‘u perofeta.

²³Ia outou pepese atu ia Ieova le lalolagi uma; ia outou tala‘i atu lana faaolataga i lea aso ma lea aso.

²⁴Ia outou ta‘uta‘u atu lona mamalu i nuu ese, ma ona vavega i nuu uma lava.

²⁵Auā e silisili Ieova, e tusa ona matuā viia o ia; e sili foi ona matautia o ia i atua uma.

²⁶Auā o atua uma o nuu o tupua lava ia; a o Ieova na ia faia le lagi.

²⁷O loo i ona luma le viiga ma le matagofie; o loo i lona afioaga le malosi ma le fiafia.

²⁸Outou o itu aiga o le nuu, ia outou avatua ia Ieova, ia avatua ia Ieova le viiga ma le malosi.

²⁹Ia outou avatua ia Ieova le viiga o lona suafa; ia outou avatu taulaga, ma outou o atu i ona luma, ia outou ifo atu ia Ieova i le malumalu e matagofie.

³⁰Ia outou gatete i ona luma le lalolagi uma; e faatumauina lava le lalolagi, ne‘i faagaeetia.

³¹Ia fiafia le lagi, ia olioli foi le lalolagi, ia outou fai atu i nuu ese, O Ieova o le tupu lava ia.

³²Ia taalili mai le sami, ma mea ua tumu ai; ia fiafia le laueleele, ma mea uma o i ai.

³³Ona alalaga fiafia ai lea o laau o i le vao matua i luma o Ieova, auā o loo afio mai e faamasino le lalolagi.

³⁴Vivii atu outou ia Ieova; auā e lelei lava o ia; auā e faavavau lava lona alofa.

³⁵Ia outou faapea atu, Le Atua o lo matou faaolataga e, ia e faaola mai, ma faapotopotoina i matou, ma laveai ia i matou ai nuu ese, ina ia matou vivii i lou suafa paia, ia mitamita foi i matou i viiga ia te oe.

³⁶Ia faamanu ia Ieova o le Atua o Isaraelu mai le vavau e oo i le faavavau. Ia faapea atu foi le nuu uma, Amene, ma ia vivii atu ia Ieova.

³⁷Na tuua e ia o Asafo, ma ona uso i lea mea i luma o le atolaau o le feagaiga a Ieova, e auauna i luma o le atolaau e le aunoa, e tusa ma le galuega i lea aso ma lea aso;

³⁸o Opete-etoma ma o latou uso e toaono sefulu ma le toavalu; o Opete-etoma foi o le atalii o Iutana, ma Hosa, na tofia e fai ma leoleo faitotoa;

³⁹o Satoka le faitaulaga, ma ona uso le au faitaulaga, sa i luma o le malumalu o Ieova i le mea maualuga i Kipeona,

⁴⁰e fai taulaga mu ia Ieova i luga o le fata faitaulaga i taulaga mu, e le aunoa, i le taeao ma le afiafi, e tusa ma mea uma ua tusia i le tulafono a Ieova na ia poloai ia Isaraelu;

⁴¹sa ia i latou o Hemana, ma Iutana, ma e na totoe na filifilia, na ta‘uina atu o latou igoa, e vivii atu ia Ieova, auā e faavavau lava lona alofa;

⁴²sa ia i latou o Hemana ma Iutana, ua i ai pu, ma sumepalo mo e faatagitagi ai, ma laaupese a le Atua. O atalii o Iutana, e fai ma leoleo faitotoa.

⁴³O tagata uma na taitoatasi ma alu i lona fale; ma ua toe foi mai Tavita e faamanuia lona aiga.