Read Samoan Old Version Bible – O LE TUSI PAIA I. NOFOAIGA A TUPU, 20 Bible Online

I. NOFOAIGA A TUPU, 20 - Samoan Old Version Bible – O LE TUSI PAIA bible

I. NOFOAIGA A TUPU, 20

¹Ua oo i ona po ua toe aulia ai le tausaga, o ona po foi lea e o atu ai tupu, ona ta‘ita‘iina atu lea e Ioapo ‘au o le taua, ma na faaumatia le nuu o le fanauga a Amoni, ma ua alu atu ma vagaia Rapa. A ua nofo Tavita i Ierusalema. Ua fasia Rapa e Ioapo, ma faaumatia ai.

²Ua ave e Tavita le paleālii o lo latou tupu nai lona ao, ua iloa ina ua fuatia ua i ai le taleni o auro, ua i ai foi maa tāua; ua faaeeina i le ao o Tavita. Ua aumaia foi e ia o vete o le aai e matuā tele.

³Ua ia ta‘ita‘iina atu tagata sa i ai, ma tuu atu i latou i ‘ili, ma tui uamea, ma to‘i. Sa faapea ona faia e Tavita i aai uma o le fanauga a Amoni. Ona foi atu lea o Tavita ma le nuu uma i Ierusalema.

⁴Ua mavae lenei mea, ona tau ai lea i Kasera o le taua ma Filisitia. O aso lava ia na fasia ai e Sepekai o le sa Usā o Sapa o so le fanau a Rafa. Ua faatoilaloina i latou.

⁵Ua toe tau le taua ma Filisitia. Ona fasia lea e Eleana le atalii o Iaira o Laime le uso o Koliata le Kata; o le fuata o lona tao ua pei se laau faalava o lē lalaga ie.

⁶Ua toe tau foi le taua i Kata, sa i ai le tagata maualuga, o ona tamatamai lima ma tamatamai vae ua taiono, e lua sefulu ma le fa; o ia foi o le atalii o le sā Rafa.

⁷Ua faifaia e ia o Isaraelu, ona fasi ai lea ia te ia e Ionatana le atalii o Sema o le uso o Tavita.

⁸O i latou ia o le fanau a le sa Rafā i Kata. Na fāsia i latou e Tavita ma ana auauna.