Read Samoan Old Version Bible – O LE TUSI PAIA I. NOFOAIGA A TUPU, 29 Bible Online

I. NOFOAIGA A TUPU, 29 - Samoan Old Version Bible – O LE TUSI PAIA bible

I. NOFOAIGA A TUPU, 29

¹Ua fai atu foi le tupu o Tavita i le faapotopotoga uma, o Solomona lo‘u atalii, o ia lava ua filifilia e le Atua, o le tama itiiti ia ma le vaivai, ua tele foi le galuega; auā e le se maota mo tagata, a o Ieova le Atua.

²Ua saunia e a‘u ma lo‘u malosi atoa mo le fale o lo‘u Atua, o le auro e fai a‘i mea auro, ma le ario e fai a‘i mea ario, ma apa memea e fai a‘i mea ‘apa memea, ma uamea e fai a‘i mea uamea, ma laau e fai a‘i mea laau, ma maa soama, ma maa e faavaa ai, o maa fepulafi ma lanu eseese, ma maa tāua uma, atoa ma maa sesa e tele lava.

³O lea foi, ua ou fiafia i le fale o lo‘u Atua, o le mea lea ua ou avatu ai mo le fale o lo‘u Atua o la‘u lava oloa, o auro ma ario, e faaopoopo i mea uma na saunia e a‘u mo le fale paia,

⁴e tolu afe o taleni o auro, o le auro o Ofeira, ma afe e fitu o taleni o ario ua faamamāina, e ufi ai pa o fale.

⁵O auro e fai a‘i mea o auro, ma ario e fai a‘i mea o ario, mo galuega uma foi e faia e lima o tufuga. O ai foi sē loto e foai ana mea ia Ieova i le aso nei?

⁶Ona foai lea ma le loto o matai sili, ma alii o itu aiga o Isaraelu, ma alii o taitoaafe ma taitoaselau, ma e pule i le galuega a le tupu.

⁷Ua avatua foi mo le galuega o le fale o le Atua, o auro e lima gaafe o taleni ma le sefulu o afe o tareki, ma ario e sefulu afe o taleni, ma ‘apa memea e sefulu ma le valu o afe o taleni, ma uamea e selau afe o taleni.

⁸O i latou na i ai maa tāua ua tuuina atu i le oloa o le fale o Ieova, i le lima o Ikieli le sa Keresonā.

⁹Ona fiafia lava lea o le nuu, auā na foai ma le loto, auā na latou foai ma le fiafia ma le loto atoatoa ia Ieova. Ua fiafia foi Tavita le tupu ma le fiafia tele lava.

¹⁰Ona faamanu atu ai lea o Tavita ia Ieova i luma o le faapotopotoga uma, ma ua faapea atu Tavita, Ia faamanuina oe, Ieova e, le Atua o Isaraelu, lo matou tamā, mai le vavau e oo i le faavavau.

¹¹Ieova e, e ou le silisili ese, ma le malosi, ma le matagofie, ma le mamalu, ma le malualii; auā o ia te oe mea uma o i le lagi ma le lalolagi; Ieova e, e ou le malo, o faasilisili oe e silisili i mea uma lava.

¹²Mai ia te oe le oloa ma le mamalu, o oe e te pule i mea uma lava; o i ai foi i lou aao le mamana ma le malosi, o ia te oe foi e faateleina ma faamalosia tagata uma lava.

¹³O lenei, lo matou Atua e, ua matou faafetai atu ia te oe, ma vivii atu i lou suafa mamalu.

¹⁴A o ai ea a‘u nei? O ai ea foi lo‘u nuu, ina ua matou mafaia ona fai taulaga ma le loto faapenei? Auā mai ia te oe mea uma lava; o au mea foi ua matou foaiina atu ai ia te oe.

¹⁵Auā o tagata ese i matou i ou luma, ma ē āumau e pei o matou tamā uma lava. O matou nei aso i le lalolagi e pei o se ata, e leai foi se faatuatuaga.

¹⁶Ieova e, lo matou Atua, o le oloa uma nei ua saunia e i matou e fai a‘i se fale mo oe, mo lou suafa paia, e mai ia te oe ia, o au mea uma foi ia.

¹⁷Lo‘u Atua e, ua ou iloa o oe e te suesue i le loto, ma ua e fiafia i le amiotonu. O a‘u nei, o le faamaoni o lo‘u loto ua ou foaiina atu ai ma le fiafia o nei mea uma lava; o lenei, ua ou vaai atu ma le fiafia i lo‘u nuu, o nonofo mai iinei e fai taulaga ia te oe ma le loto.

¹⁸Ieova e, le Atua o Aperaamo, o Isaako, ma Isaraelu, o matou tamā, ia e tausi e faavavau lenei mea i le manatu ma mafaufau o loto o lou nuu, ma ia e faatumauina o latou loto ia te oe;

¹⁹ma ia e avatua ia Solomona lo‘u atalii o le loto atoa e tausi ai au poloaiga, ma au tulafono, ma au sauniga, ma ia faia nei mea uma, ma ia faia le malumalu ua ou sauni i ai.

²⁰Ua fai atu Tavita i le faapotopotoga uma, Ia outou faamanu atu ia Ieova lo outou Atua. Ona faamanu atu ai lea o le faapotopotoga uma ia Ieova le Atua o latou tamā, ua latou punonou foi, ma ifo atu ia Ieova ma le tupu.

²¹O le taeao, ina ua mavae lea aso, ua latou osi ai taulaga ia Ieova, ma ua fai ai taulaga mu ia Ieova, o povi poa e tasi le afe, o mamoe poa e tasi le afe, o tamai mamoe e tasi le afe, atoa ma o latou taulaga i mea e inu, ma taulaga e tele mo Isaraelu uma.

²²Ua latou aai ma inu i luma o Ieova i lea aso ma le fiafia tele. Ua latou tofia Solomona le atalii o Tavita e fai mo latou tupu, o le atu lua lea, ma ua faauuina o ia mo Ieova e fai ma alii sili; o Satoka foi ua fai ma faitaulaga.

²³Ona tietie ai lea o Solomona i le nofoālii o Ieova e fai ma tupu e sui a‘i lona tamā o Tavita; ua manuia foi o ia, ma ua faalogo ia te ia o Isaraelu uma.

²⁴O alii sili uma foi, ma toa, atoa foi ma atalii uma o Tavita le tupu, Ua usiusitai ia Solomona le tupu.

²⁵Ua faatuputeleina le mamalu o Solomona e Ieova i luma o Isaraelu uma, ma ua foai atu ia te ia le malualii e lei faapena se tasi tupu i Isaraelu na muamua ia te ia.

²⁶Na fai Tavita le atalii o Iese ma tupu ia Isaraelu uma.

²⁷O ona tausaga na fai ai o ia ma tupu o Isaraelu e fagafulu ia; o tausaga e fitu na fai ai o ia ma tupu i Heperona, ma tausaga e tolugafulu ma le tolu na fai ai o ia ma tupu i Ierusalema.

²⁸Ua oti o ia, ua matuā toeaina, ua tele ona tausaga, ma ana oloa, ma lona mamalu; ua soloai ane foi Solomona lona atalii e fai ma tupu.

²⁹O mea na faia e le tupu o Tavita, o mea na muamua, ma mea na mulimuli, faauta, ua tusia i le tala a Samuelu le tagata vaai, ma le tala a Natano le perofeta, ma le tala a Kato le tagata vaai,

³⁰atoa ma le tala i lana nofoaiga uma, ma lona malosi, ma mea na oo ia te ia, ma Isaraelu, atoa ma malo uma o nuu.