Read Samoan Old Version Bible – O LE TUSI PAIA I. NOFOAIGA A TUPU, 5 Bible Online

I. NOFOAIGA A TUPU, 5 - Samoan Old Version Bible – O LE TUSI PAIA bible

I. NOFOAIGA A TUPU, 5

¹O Atalii o Reupena le ulumatua a Isaraelu, auā o ia lava le ulumatua; a ua leaga ia te ia le moega o lona tamā, na avatu ai lona tofi o le ulumatua i atalii o Iosefa o le atalii o Isaraelu; e lei tusia foi le gafa e faatatau i le tofi o le ulumatua.

²Aua na malosi Iuta e sili i ona uso, na tupu foi ia te ia o le alii sili; a o le tofi o le ulumatua e ia Iosefa lea.

³O atalii o Reupena o le ulumatua a Isaraelu; o Enoka, ma Falu, o Esarona, ma Karame.

⁴O atalii o Ioelu; o Semaia lona atalii, o Koku lona atalii, o Semi lona atalii,

⁵o Mika lona atalii, o Reaia lona atalii, o Paala lona atalii,

⁶o Peira lona atalii o le na avea faatagataotaua e Tikila-pilesa le tupu o Asuria. O ia le alii sili o sa Reupenā.

⁷O ona uso foi ina ua faitauina o latou tusi tupuga, e tusa ma o latou aiga, o alii sili ia, o Ieielu ma Sakaria,

⁸o Pela le atalii o Asasa, le atalii ia o Sema, o le atalii ia o Ioelu, na mau o ia i Aroeru e oo i Nepo ma Paalameona.

⁹O le itu i sasae na mau ai o ia e oo i le ala e ui ai i le vao e fua mai i le vaitafe o Eufirate; auā sa tupu tele o latou lafu i le nuu o Kiliata.

¹⁰Na latou tau ai le taua i ona po o Saulo ma sa Akarā, ma fafasi ia te i latou; ona latou nonofo ai lea i o latou fale ie i le laueleele uma i le itu i sasae o Kiliata.

¹¹O le fanauga a Kato sa nonofo faafeagai ma i latou i le laueleele o Vasana e oo i Saleka.

¹²O Ioelu o le sili ia, ma Sefama o le aupito ane i ai, ma Iaanai, ma Safata sa nofo i Vasana.

¹³O latou uso foi o aiga o latou tamā, o Mekaeli, ma Mesulama, ma Sepa, ma Iorai, ma Iakana, ma Sea, ma Eperu, e toafitu ia.

¹⁴O atalii nei o Aviaila, o le atalii o Huri, o le atalii lea o Iaroa, o le atalii lea o Kiliata, o le atalii lea o Mekaeli, o le atalii lea o Iesesai, o le atalii lea o Iato, o le atalii lea o Pusa;

¹⁵o Aki le atalii o Apitelu, le atalii lea o Kuni, o le alii ia o le aiga o latou tamā.

¹⁶Ua latou nonofo i Kiliata i Vasana, ma ona faoa aai, ma tuafanua uma o Sarona i o latou tuaoi.

¹⁷Sa tusia i latou uma ia i o latou gafa i ona po o Iotama le tupu o Iuta, ma ona po o Ierepoamo le tupu o Isaraelu.

¹⁸O le fanauga a Reupena, ma sa Katō, ma le tasi vaega o le itu aiga o Manase, o tagata totoa, o tagata e mafaia ona feāveai o le talita ma le pelu, ma fanafana i le aufana, e masani foi i taua, e fa sefulu o afe ma afe e fa ma le toafitu o selau ma le toaonogafulu e na o atu i le taua.

¹⁹Na latou tau le taua ma sa Akarā, ma Ietura, ma Nafiso, ma Notapa.

²⁰Na maua le fesoasoani e i latou e tau ma i latou, sa tuuina mai foi sa Akarā i o latou lima, atoa ma e na ia te i latou; auā na latou alalaga atu i le Atua i le taua, ma ua faafofoga mai o ia ia te i latou, ina ua latou faatuatua ia te ia.

²¹Na vetea e i latou o latou lafu, o kamela e lima sefulu o afe, ma a latou mamoe e lua selau o afe ma afe e lima sefulu, ma a latou asini e lua afe, ma tagata e selau o afe.

²²Auā e toatele ua pauu manunua, auā mai le Atua le taua; ua latou nonofo foi i le mea sa i ai i latou e oo i le tafeaga.

²³Ua nonofo le fanauga a le tasi vaega o le itu aiga o Manase i le nuu, e afua mai i Vasana e oo atu i Paala-heremone, ma Senira, ma le mauga o Heremone; ua faatoateleina i latou.

²⁴O matai sili nei o le aiga o latou tamā; o Efara, ma Isai, ma Elielu, ma Aserielu, ma Ieremia, ma Hotavia, ma Iatielu, o tagata fitafita lava, o tagata ta‘ua, o alii sili i le aiga o latou tamā.

²⁵Ua agasala foi i latou i le Atua o latou tamā, ma latou mulilulua i atua o tagata o le nuu na faaumatia e le Atua i o latou luma.

²⁶Ona faaoso lea e le Atua o Isaraelu ia Pula le tupu o Asuria ma Tikila-pilesa le tupu o Asuria, ua avea i latou e ia faatagataotaua, o sa Reupenā, ma sa Katō, ma le tasi vaega o le itu aiga o Manase, ma na avatu i latou i Hala, ma Havoli, ma Hara, ma le vaitafe o Kosane, e oo i le aso nei.