Read Samoan Old Version Bible – O LE TUSI PAIA II. NOFOAIGA A TUPU, 1 Bible Online

II. NOFOAIGA A TUPU, 1 - Samoan Old Version Bible – O LE TUSI PAIA bible

II. NOFOAIGA A TUPU, 1

¹Sa faatumauina Solomona le atalii o Tavita i lona malo, sa ia te ia lona Atua o Ieova, ua na matuā faateleina foi lona mamalu.

²Ona fai atu ai lea o Solomona ia Isaraelu uma, o alii o taitoaafe ma taitoaselau, ma faamasino, ma alii sili uma o Isaraelu uma, o matai sili.

³Ona o atu ai lea o Solomona ma le faapotopotoga uma faatasi ma ia i le mea maualuga sa i Kipeona; auā sa i ai i lea mea o le fale fetafai o le faapotopotoga o le Atua na faia e Mose le auauna a Ieova i le vao.

⁴A o le atolaau a le Atua na aveina ae e Tavita mai Kiriata-iarima i le mea na saunia e Tavita mo le atolaau; auā na ia fai ai le fale ie i Ierusalema.

⁵A o le fata faitaulaga ‘apa memea na faia e Pesaleli le atalii o Auri, o le atalii lea o Huro, na i ai lea i luma o le malumalu o Ieova; ua sailiili i ai Solomona ma le faapotopotoga.

⁶Ona alu ae lea o Solomona i lea mea i le fata faitaulaga ‘apa memea i luma o Ieova, sa i le fale fetafai o le faapotopotoga, ma na fai i ona luga o taulaga mu e afe.

⁷Ua faaali mai le Atua i lea lava po ia Solomona, ma faapea mai ia te ia, Ia e fai mai se mea ou te avatu ai ia te oe.

⁸Ona faapea atu ai lea o Solomona i le Atua, Na e alofa tele i lo‘u tamā o Tavita, ma ua e faasoloai ane o a‘u e fai ma tupu.

⁹O lenei, Ieova e, le Atua, ia faamaonia lau afioga ia Tavita lo‘u tamā; auā ua e tofia a‘u e fai ma tupu o le nuu e toatele e pei o le efuefu o le laueleele.

¹⁰O lenei, ia e foai mai ia te au le poto ma le atamai, ina ia ou fealuai i luma o le nuu nei; auā o ai ea se na te mafaia ona faamasinoina lou nuu nei ua tele?

¹¹Ona faapea mai ai lea o le Atua ia Solomona, Ua i ai i lou loto lenei mea, ua e le ole mai i oloa, po o le tamaoaiga, po o le mamalu, pe ia oti e ua ita mai ia te oe, ua e le ole mai foi i le ola tulu‘i; a ua e ole mai i le poto ma le atamai mo oe, ina ia e mafai ona faamasinoina lo‘u nuu, ua ou tofia ai oe ma tupu;

¹²o le mea lea ua foaiina atu ai ia te oe le poto ma le atamai; ou te foaiina atu foi ia te oe le oloa, ma le tamaoaiga, ma le mamalu, e lei faapea ona i ai i tupu na muamua ia te oe, e le faapea foi i ni e mulimuli ia te oe.

¹³Ona toe foi mai ai lea o Solomona i Ierusalema nai le mea maualuga sa i Kipeona, ai luma o le fale fetafai o le faapotopotoga; ua fai o ia ma tupu ia Isaraelu.

¹⁴Ua faapotopotoina e Solomona o kariota ma ‘au e tietie i solofanua; sa ia te ia o kariota e tasi le afe ma le fa o selau, ma ‘au e tietie i solofanua e sefulu o afe ma afe e lua, na ia tuuina i latou i aai o kariota, ma ia faatasi ma le tupu i Ierusalema.

¹⁵Ua faateleina e le tupu o ario ma auro i Ierusalema e pei o maa; ua ia faateleina foi o arasi e pei o sukamoru ua i le fanua maulalo.

¹⁶Na aumaia solofanua mā Solomona mai Aikupito; na talia foi e le vao tagata faatauoa a le tupu o le vao solofanua i le tau.

¹⁷Na latou avae ma aumaia foi mai Aikupito se kariota i tupe e ona selau, ma se solofanua i le selau ma le limagafulu o tupe; sa faapea foi ona aumaia e i latou o solofanua mā tupu uma o sa Hetī, ma tupu o Suria.