Read Samoan Old Version Bible – O LE TUSI PAIA II. NOFOAIGA A TUPU, 12 Bible Online

II. NOFOAIGA A TUPU, 12 - Samoan Old Version Bible – O LE TUSI PAIA bible

II. NOFOAIGA A TUPU, 12

¹Ua faatumauina le malo e Reopoamo, ma ua faamalosia o ia e ia, ona tuua lea e ia ma Isaraelu uma faatasi ma ia o le tulafono a Ieova.

²O le lima o tausaga o le tupu o Reopoamo na alu ae ai o Sesaka le tupu o Aikupito e tau ma Ierusalema, auā na latou agasala atu ia Ieova,

³ma kariota e tasi le afe ma le lua o selau, ma ‘au e tietie i solofanua e ono sefulu o afe, a e le mafaitaulia o tagata na o mai ma ia mai Aikupito; o tagata Lipua, ma Suki, ma Aitiope.

⁴Ua aea e ia o aai nofo ‘olo sa ia Iuta, ona oo mai lea o ia i Ierusalema.

⁵Ona alu atu lea o Semaia le perofeta ia Reopoamo ma alii sili o Iuta sa faapotopotoina i Ierusalema ona o Sesaka, ma ua faapea atu ia te i latou, O loo faapea ona fetalai mai o Ieova, Ua outou tuua a‘u, o le mea lea ua ou tuua ai outou i le lima o Sesaka.

⁶Ona faamaulalo ai lea o alii sili o Isaraelu ma le tupu, ua latou faapea atu, O loo amiotonu Ieova.

⁷Ua silafia e Ieova ua faamaulalo i latou, ona tŭlei mai ai lea o le afioga a Ieova ia Semaia, ua faapea mai, Ua faamaulalo i latou: ou te le faaumatia i latou, a ou te tuuina atu sina laveaiina mo i latou; e le sasaaina atu foi lo‘u ita i luga o Ierusalema i le lima o Sesaka.

⁸A e peitai e avea ai i latou mana auauna; latou te iloa ai le auauna mai ia te au, ma le auauna atu i malo o nuu.

⁹Ua alu ae Sesaka le tupu o Aikupito e tau ma Ierusalema, ma ua avea e ia o le oloa sa i le fale o Ieova, ma le oloa sa i le fale o le tupu, ua avea uma; ua avea foi e ia talita auro na faia e Solomona.

¹⁰Ona faia lea e le tupu o Reopoamo o talita ‘apa memea e sui a‘i, ma na tuuina atu ai i lima o alii o le ‘au e faafeao, o e na leoleo i le faitotoa o le fale o le tupu.

¹¹A alu atu le tupu i le fale o Ieova, ona o mai lea o le ‘au e faafeao, ma ave ia talita, ma toe au mai ai i le potu o le ‘au e faafeao.

¹²Ua faamaulalo o ia, ona liliu ese ai lea ia te ia o le toasa o Ieova, ua ia le matuā faaumatia o ia; sa i ai foi i Iuta le manuia.

¹³Ua faamalosia e Reopoamo le tupu ia te ia i Ierusalema, ma ua fai o ia ma tupu. Sa fagafulu ma le tasi tausaga o Reopoamo, ina ua fai o ia ma tupu, e tasi le sefulu ma le fitu o tausaga na ia fai ai ma tupu i Ierusalema, o le aai lea na filifilia e Ieova i itu aiga uma o Isaraelu, e tuu ai lona suafa. O le igoa foi o lona tinā o Naama lea o le sa Amonī.

¹⁴Na amio leaga o ia ina ua le manatu i lona loto e saili ia Ieova.

¹⁵O mea na faia e Reopoamo, o mea muamua ma mea mulimuli, ua le tusia ea i le tala a Semaia le perofeta, ma Itu le tagata vaai i le tusi o gafa? Sa utu tau lava o Reopoamo ma Ierepoamo i aso uma.

¹⁶Ua taoto Reopoamo faatasi ma ona tamā, ua tanu foi o ia i le aai a Tavita. Ona soloai ane ai lea o lona atalii o Avia e fai ma tupu.