Read Samoan Old Version Bible – O LE TUSI PAIA II. NOFOAIGA A TUPU, 13 Bible Online

II. NOFOAIGA A TUPU, 13 - Samoan Old Version Bible – O LE TUSI PAIA bible

II. NOFOAIGA A TUPU, 13

¹O le sefulu ma le valu o tausaga o le tupu o Ierepoamo, na fai ai Avia ma tupu o Iuta.

²E tolu tausaga na fai ai o ia ma tupu i Ierusalema. O le igoa foi o lona tinā o Mekaia le afafine o Urielu, o le Kipea ia. Sa tau Avia ma Ierepoamo.

³Na amataina le taua e Avia, o lana itu taua o toa malolosi e fa selau o afe o tagata ua filifilia; na tofi mai foi e Ierepoamo le taua e tau ma ia, o lana itu taua e valu selau o afe o tagata ua filifilia, o toa malolosi.

⁴Ua tu Avia i luga o le mauga o Semaraima o i le mauga o Efaraima, ua faapea atu, Ierepoamo e, ma Isaraelu uma, ina faafogafoga mai ia ia te au;

⁵tou te le o iloa ea na foai mai e Ieova le Atua o Isaraelu ia Tavita le malo e pule ai ia Isaraelu e faavavau, o ia ma ona atalii i le feagaiga masima?

⁶A o Ierepoamo le atali o Nepata, o le auauna a Solomona, le atalii o Tavita, ua tu mai o ia, ma ua foua e ia lona alii.

⁷Ua faapotopotoina foi ia te ia o tagata faatauvaa, o tagata ulavavale, na latou faamalolosi i latou e tetee ia Reopoamo le atalii o Solomona, ina o taulealea ma loto vaivai Reopoamo, ua le ma faamalosi e tetee ia te i latou.

⁸O lenei foi, ua outou manatu e faamalosi e tetee i le malo o Ieova o i ai i atalii o Tavita; ua matuā toatele foi outou, ua ia te outou foi tamai povi auro na faia e Ierepoamo mo outou e fai ma atua.

⁹Ua le tulia ea e outou le au faitaulaga a Ieova, o le fanauga a Arona ma sa Levī, ma ua faia mo outou o faitaulaga e pei o tagata o nuu ese? Ai se tasi e au mai se povi poa taanoa, ma mamoe poa e fitu, e tofia a‘i o ia, e fai o ia ma faitaulaga ia te i latou e le ni atua.

¹⁰A o i matou nei, o Ieova o lo matou Atua ia; ua le tuua o ia e i matou; o faitaulaga foi, e o auauna ia Ieova, o le fanauga a Arona ma sa Levī e fai a latou galuega;

¹¹ua latou susunuina taulaga mu ia Ieova i lea taeao ma lea taeao, i lea afiafi ma lea afiafi; ma mea manogi lelei, ma le areto e laulauina i luma i luga o le laulau auro lelei; ma le tuugālamepa auro ma ona lamepa, e mumū ai i lea afiafi ma lea afiafi; auā ua tausia e i matou le sauniga a Ieova lo matou Atua; a ua tuua o ia e outou.

¹²Faauta foi, o ia te i matou o le Atua e fai ma alii sili; o ona faitaulaga foi ma pu leo taalili e ili i le leo faatetetete ia te outou. Le fanauga a Isaraelu e, aua tou te tau ma Ieova le Atua o outou tamā; auā e le manuia outou.

¹³A ua fai atu Ierepoamo ia sisio le ‘au e tanu i o latou tua; sa i ai foi i latou i luma o Iuta, sa i o latou tua foi le ‘au ua tanu.

¹⁴Ona tepa lea i tua o Iuta, faauta foi, sa i ai ‘au i o latou luma ma o latou tua; ona alalaga atu lea o i latou ia Ieova, ma ua ili pu e le au faitaulaga.

¹⁵Ona sŏlovi lea o tagata o Iuta; ua sŏlovi tagata o Iuta, ona fāsia lea e le Atua o Ierepoamo ma Isaraelu uma i luma o Avia ma Iuta.

¹⁶Ona sosola lea o le fanauga a Isaraelu i luma o Iuta; ua tuuina mai foi i latou e le Atua i o latou lima.

¹⁷Ua fasia foi i latou e Avia ma lona nuu, ua tele lava le fasi. E lima selau o afe o tagata filifilia o Isaraelu na fasiotia.

¹⁸Ona faatoilaloina ai lea o le fanauga a Isaraelu i ia ona po, ma ua manumalo le fanauga a Iuta, auā na latou faalagolago ia Ieova le Atua o latou tamā.

¹⁹Ua tuliloaina Ierepoamo e Avia, ua faoa foi o aai sa ia te ia, o Peteli ma ona faoa aai, ma Iesana ma ona faoa aai, ma Eferona ma ona faoa aai.

²⁰Ua le toe maua se malosi e Ierepoamo i ona po o Avia; ua taia o ia e Ieova, ona oti ai lea o ia.

²¹A ua tupu le malosi o Avia, ua fai ni ana avā e toasefulu ma le toafa, ma ua fanaua ona atalii e toaluafulu ma le toalua, ma afafine e toasefulu ma le toaono.

²²O toe o mea ua faia e Avia, ma ana amio, ma ana upu, ua tusia i le tala a Itu le perofeta.