Read Samoan Old Version Bible – O LE TUSI PAIA II. NOFOAIGA A TUPU, 19 Bible Online

II. NOFOAIGA A TUPU, 19 - Samoan Old Version Bible – O LE TUSI PAIA bible

II. NOFOAIGA A TUPU, 19

¹Ua toe foi atu Iosefatu le tupu o Iuta i lona fale i Ierusalema ma le filemu.

²Ona sau lea o Ieu le atalii o Hanani le tagata vaai e faafetaiai ia te ia, ua faapea mai foi o ia i le tupu o Iosefatu, E tatau ea ona e fesoasoani i e amio leaga, ma alofa atu ia te i latou o e ‘ino‘ino ia Ieova? O le mea lea o loo i luga ai ia te oe le toasa mai ia Ieova.

³A e peitai ua maua mea lelei o ia te oe, ina ua e aveeseina tupua o Asaira i le nuu, ma ua saunia lou loto e sailiili i le Atua.

⁴Ua nofo Iosefatu i Ierusalema; ona toe alu atu lea o ia i le nuu e gata mai i Peresepa e gata mai i le mauga o Efaraima, ma na faafoisia mai i latou ia Ieova le Atua o latou tamā.

⁵Ua tofia foi e ia faamasino i le nuu i aai nofo ‘olo uma o Iuta, o lea aai ma lea aai.

⁶Ua ia fai atu foi i faamasino, ia outou lava i mea tou te faia; auā tou te le faamasino mo tagata, a o Ieova, ua ia te outou o ia i mea tou te faamasino ai.

⁷O lenei, ia ia te outou le mata‘u ia Ieova; ia faaeteete outou, ma ia outou faia; auā e leai se amiotonu ia Ieova lo tatou Atua, po o se faailogaina o tagata, po o se talia o mea alofa.

⁸Ua tofia foi e Iosefatu i Ierusalema nisi o sa Levī, ma faitaulaga, ma matai sili o Isaraelu mo le faamasinoga a Ieova, ma finauga, ina ua latou toe foi mai i Ierusalema.

⁹Ua ia fai atu ia te i latou, ua faapea atu, Ia faapea ona faia e outou ma le mata‘u ia Ieova, ma le faamaoni, ma le loto sao.

¹⁰O finauga uma e au mai ia te outou mai o outou uso, o e nonofo i o latou aai, i le toto ma le toto, o le tulafono ma le poloaiga, o sauniga ma faamasinoga, tou te apoapoai foi ia te i latou, ina ne‘i latou agasala atu ia Ieova, ma oo mai le toasa ia te outou ma o outou uso; ia faapea ona outou faia ona le agasala lea o outou.

¹¹Faauta foi, o Amaria o le faitaulaga sili e pule ia te outou i mea uma a Ieova; ma Sepatia le atalii o Isamaeli, o lē pule i le aiga o Iuta, i mea uma a le tupu; o sa Levī foi e fai ma faipule i o outou luma. Ia faamalosi ma ia faia; e i ai foi Ieova i e o amio lelei.