Read Samoan Old Version Bible – O LE TUSI PAIA II. NOFOAIGA A TUPU, 23 Bible Online

II. NOFOAIGA A TUPU, 23 - Samoan Old Version Bible – O LE TUSI PAIA bible

II. NOFOAIGA A TUPU, 23

¹A o le fitu o tausaga na faamalosi ai Ieoiata, ma ua ia faia le feagaiga ma alii o taitoaselau, o Asaraia le atalii o Ieroamo, ma Isamaeli le atalii o Ioanana, ma Asaraia le atalii o Opeta, ma Maaseia le atalii o Ataia, ma Elisafata le atalii o Sekari.

²Ona latou faataamilo lea i Iuta, ma faapotopotoina sa Levī mai aai uma o Iuta, ma matai sili o Isaraelu; ona latou o mai ai lea i Ierusalema.

³Ona osi ai lea o le feagaiga a le faapotopotoga uma ma le tupu, i le fale o le Atua. Ua ia faapea atu foi ia te i latou, Faauta, e fai le atalii o le tupu ma tupu e tusa ma le fetalaiga a Ieova i le fanauga a Tavita.

⁴O le mea lenei tou te faia; o le tasi vasega o lona vaetoluina o outou, o le au faitaulaga ma sa Levī, o e ulufale mai i le sapati, latou te fai ma leoleo faitotoa;

⁵e i ai foi le tasi vaega i le fale o le tupu; ma le tasi vaega i le faitotoa o le faavae; a o le nuu uma e i ai i lotoā o le fale o Ieova.

⁶A e aua le o mai nisi i le fale o Ieova, ua na o le au faitaulaga, ma i latou o e auauna o sa Levī; latou te ulufale i ai, auā ua faapaiaina i latou, a o le nuu uma latou te anaana i tausiga a Ieova.

⁷E vagavagai sa Levī i le tupu ia soo ai, o le tagata ma lana auupega i lona lima; ai se tasi e ulufale mai i le fale, ia fasiotia o ia; a ia outou i ai i le tupu i lona ulufale mai ma lona ulufafo atu.

⁸Ona faia lea e sa Levī ma Iuta uma e tusa ma mea uma na fai atu ai Ieoiata le faitaulaga, ua taitasi ma ave ona tagata e ulufale mai i le sapati, atoa ma e ulufafo atu i le sapati; auā ua le faatuua vasega e Ieoiata le faitaulaga.

⁹Ona avatu lea e Ieoiata le faitaulaga i alii o taitoaselau o tao, ma talita tetele, ma talita a Tavita le tupu sa i le fale o le Atua.

¹⁰Ua tofia e ia o tagata uma e tutū faataaliolio i le tupu, o le tagata ma lana auupega i lona lima, e afua i le itu taumatau o le fale e oo i le itu tauagavale o le fale, i tafatafa ane o le fata faitaulaga ma le fale.

¹¹Ona latou aumaia lea o le atalii o le tupu, ma faaeeina ia te ia le palealii, ma avatu ia te ia le tulafono, ma ua fai o ia ma tupu. Na faauuina o ia e Ieoiata ma ona atalii, ona latou fai atu lea, Ia soifua le tupu.

¹²Ua faalogo Atalia i le vāvāō o le nuu o loo femoei, ma vivii atu i le tupu, ona sau ai lea o ia i le nuu i le fale o Ieova;

¹³ua vaai atu o ia, faauta, ua tu mai le tupu i lona pou i le faitotoa, ma alii ma e ili pu e latalata i le tupu; o tagata uma o le nuu ua olioli ma ilia pu, ma ē pepese ma laaupese, ma i latou o e a‘oa‘o atu i viiga; ona saei ai lea e Atalia i ona ofu, ma faapea atu, O le fouvale, o le fouvale.

¹⁴Ona aumaia lea i fafo e Ieoiata le faitaulaga o alii o taitoaselau, o alii o ‘au, ma na faapea atu ia te i latou, Ina ave ia ia te ia i tua o ‘au ua faaatusolo; ai se mulimuli atu ia te ia ia fasiotia o ia i le pelu; auā na faapea a le faitaulaga, Aua le fasioti ia te ia i le fale o Ieova.

¹⁵Ua latou pue ia te ia; ua oo atu o ia i le ala e ui ai i le faitotoa o solofanua i le fale o le tupu; ona latou fasioti lea ia te ia i lea mea.

¹⁶Ona osi lea o le feagaiga a Ieoiata, o ia, ma le nuu uma, ma le tupu, e avea i latou ma nuu o Ieova.

¹⁷Ona o atu lea o le nuu uma i le fale o Paala, ma latou lepetia, ma latou tu‘imomoia ona fata faitaulaga ma ona tupua, ma latou fasiotia Matana le faitaulaga a Paala i luma o fata faitaulaga.

¹⁸Ua tofia e Ieoiata o tofiga o le fale o Ieova e faia e le au faitaulaga o sa Levī, o i latou na tofia e Tavita i le fale o Ieova e fai taulaga mu ia Ieova, e pei ona tusia i le tulafono a Mose, ma le fiafia ma le pese, e pei ona faia e Tavita.

¹⁹Ua tofia foi e ia o leoleo faitotoa i faitotoa o le fale o Ieova, ina ne‘i ulufale mai lē ua leaga i se mea e tasi.

²⁰Ua ave foi e ia o alii o taitoaselau, ma alii, ma faipule o le nuu, atoa ma tagata uma o le nuu, ma latou o ifo ma le tupu nai le fale o Ieova; ma ua latou ui mai ai i le faitotoa aupitoaluga i le fale o le tupu, ma ua latou faanofo le tupu i le nofoālii o le malo.

²¹Ona olioli lea o tagata uma o le nuu; ua filemu foi le aai, ina ua fasiotia e i latou o Atalia i le pelu.