Read Samoan Old Version Bible – O LE TUSI PAIA II. NOFOAIGA A TUPU, 27 Bible Online

II. NOFOAIGA A TUPU, 27 - Samoan Old Version Bible – O LE TUSI PAIA bible

II. NOFOAIGA A TUPU, 27

¹E luafulu ma le lima o tausaga o Iotama ina ua fai o ia ma tupu; ua fai foi o ia ma tupu i Ierusalema i tausaga e sefulu ma le ono. O le igoa foi o lona tinā o Ierusa o le afafine o Satoka.

²Ua faia e ia le amiotonu i luma o Ieova, e tusa ma mea uma na faia e Usia lona tamā; a ua le ulufale atu o ia i le malumalu o Ieova. Ua fai pea foi mea leaga e le nuu.

³Ua faia e ia le faitotoa aupito i luga o le fale o Ieova, ma ua faia foi galuega e tele i le pa o Ofele.

⁴Ua ia faia foi aai i mauga o Iuta, ua faia foi ‘olo ma fale leoleo i vao matua.

⁵Ua ia tau foi ma le tupu o le fanauga a Amoni, ma ua malo ia te i latou. Ona au mai lea ia te ia e le fanauga a Amoni i lea tausaga e selau taleni o ario, ma le sefulu o afe o kori o saito, ma le sefulu o afe o kori o karite. Sa faapea ona au mai ia te ia e le fanauga a Amoni i lona lua o tausaga, ma lona tolu.

⁶Sa faamalosia Iotama, auā na ia saunia ona ala i luma o Ieova lona Atua.

⁷O toe o mea na faia e Iotama, ma ona taua uma, ma ana amio, faauta, ua tusia i le tusi i tupu o Isaraelu ma Iuta.

⁸E luafulu ma le lima ona tausaga ina ua fai o ia ma tupu; o tausaga foi e sefulu ma le ono na fai ai o ia ma tupu i Ierusalema.

⁹Ona taoto lea o Iotama faatasi ma ona tamā, ma ua latou tanumia o ia le aai a Tavita. Ona soloai ane ai lea o Aasa lona atalii e fai ma tupu.