Read Samoan Old Version Bible – O LE TUSI PAIA II. NOFOAIGA A TUPU, 29 Bible Online

II. NOFOAIGA A TUPU, 29 - Samoan Old Version Bible – O LE TUSI PAIA bible

II. NOFOAIGA A TUPU, 29

¹E luafulu ma le lima o tau saga o Esekia ina ua fai o ia ma tupu, ma ua fai o ia ma tupu i Ierusalema i tausaga e luafulu ma le iva. O Avi le igoa o lona tinā, o le afafine o Sakaria.

²Sa faia e ia le amiotonu i luma o Ieova, e tusa ma mea uma na faia e Tavita lona tamā.

³O le tausaga muamua o lana nofoaiga i le masina muamua ua tatalaina e ia o faitotoa o le fale o Ieova, ma na toe teuteu ai.

⁴Ua aumaia foi e ia o le au faitaulaga ma sa Levī, ma ua faapotopotoina i latou i le malae i sasae,

⁵ua ia faapea atu foi ia te i latou, O outou o sa Levī, faalogologo mai ia ia te au. Ina faapaiaina ia outou e outou, ma ia outou faapaiaina le fale o Ieova le Atua o outou tamā, ma ia aveeseina mea leaga ai le malumalu.

⁶Auā ua agasala o tatou tamā, ma ua fai amio leaga i luma o Ieova lo tatou Atua; ua latou tuua foi o ia, ma ua liliu ese o latou mata ai le afioaga a Ieova, a ua liliu mai ai o latou tua.

⁷Ua latou tapuni foi i faitotoa o le faapaologa, ma latou tineia lamepa, ma ua latou le faamuina mea manogi, ua latou le faia foi taulaga mu i le mea paia i le Atua o Isaraelu.

⁸Ua oo mai ai le toasa o Ieova ia Iuta ma Ierusalema, ma ua tuuina atu i latou ia faaatuatuvaleina, ma ia fai ma mea e ofo ai, ma ia uisa ai, e pei ona vaavaai i ai o outou mata.

⁹Faauta foi, ua fāsia o tatou tamā i le pelu; o tatou atalii foi, ma o tatou afafine, ma a tatou avā, ua avea faatagataotaua ona o lenei mea.

¹⁰O lenei, o i ai i lo‘u loto e osi le feagaiga ma Ieova le Atua o Isaraelu, ina ia mavae ese ia te i tatou le toasa tele.

¹¹O lenei, o o‘u atalii e, aua tou te faatamala; auā ua filifilia outou e Ieova tou te tutū i ona luma e auauna ia te ia, ma ia avea outou ma auauna ia te ia, ma faamu ai mea manogi.

¹²Ona tutū ai lea o sa Levī, o Makata le atalii o Amesai, ma Ioelu le atalii o Asaraia, o isi o le fanauga a sa Koatō; ma ni o le fanauga a Merari; o Kiso le atalii o Opeti, ma Asaraia le atalii o Ialeelu; o lo sa Keresonā foi; o Ioaa le atalii o Sema, ma Etena le atalii o Ioaa.

¹³O isi o le fanauga a Elisafano; o Semeri, ma Ieielu; ma nisi o le fanauga a Asafo; o Sakaria, ma Matania;

¹⁴ma nisi o le fanauga o Hemana; o Ieielu, ma Semi; ma nisi o le fanauga a Iutana; o Semaia, ma Asielu.

¹⁵Ua latou faapotopotoina o latou uso, ma ua faapaiaina i latou e i latou, ua o mai i latou e tusa ma le poloaiga a le tupu, i le afioga a Ieova, e faamamā i le fale o Ieova.

¹⁶Ona ulu atu lea o le au faitaulaga i totonu o le fale o Ieova e faamamā ai, ma ua latou au mai i le lotoā o le fale o Ieova o mea leaga uma na latou iloa i le malumalu o Ieova. Ona talia ai lea e sa Levī e ave i fafo i le alia o Ketarono.

¹⁷O le aso muamua o le masina muamua na latou amata ai ona faapaiaina, o le aso valu foi o le masina ua latou oo ai i le faapaologa o le fale o Ieova; ua faapaiaina e i latou le fale o Ieova i aso e valu; o le aso e sefulu ma le ono o le masina muamua na faauma ai.

¹⁸Ona latou ulufale mai lea ia Esekia le tupu, ma ua faapea mai, Ua faamamāina e i matou le fale uma o Ieova, ma le fata e fai ai taulaga mu, ma ona ipu uma, ma le laulau o areto e laulauina i luma, ma ona ipu uma.

¹⁹O ipu uma foi na faaleagaina e le tupu o Aasa i lana nofoaiga i lana agasala, ua matou saunia, ma ua faapaiaina, faauta foi, ua i luma o le fata faitaulaga o Ieova.

²⁰Ona tulai lea i le taeao lava le tupu o Esekia ma na faapotopotoina alii o le aai, ma latou o ae i le fale o Ieova.

²¹Ua latou au mai foi povi e fitu, ma mamoe poa e fitu, ma tamai mamoe e fitu, ma ‘oti poa e fitu, e fai ma taulaga mo le agasala ona o le malo, ma le malumalu, ma Iuta. Ua ia fai atu foi i le au faitaulaga o le fanauga a Arona ia fai ai taulaga mu i luga o le fata faitaulaga o Ieova.

²²Ona latou fafasi ai lea o povi, ma ua talia le toto e le au faitaulaga, ma sausau ai i le fata faitaulaga; ua latou fafasi foi o mamoe poa, ma ua sausau le fata faitaulaga i le toto; ua latou fafasi foi o tamai mamoe, ma ua sausau le fata faitaulaga i le toto.

²³Ona latou faalatalata mai ai lea i luma o le tupu ma le faapotopotoga o ‘oti poa e fai ma taulaga mo le agasala; ma latou faaee i ai o latou lima;

²⁴ona fasi ai lea e le au faitaulaga ma latou fai ai le taulaga mo le agasala i o latou toto i le fata faitaulaga, e togiolaina a‘i Isaraelu uma; auā ua fai atu le tupu ia fai le taulaga mu ma le taulaga mo le agasala mo Isaraelu uma.

²⁵Ua tofia foi sa Levī i le fale o Ieova ma sumepalo, ma napeli, ma kitara, e tusa ma le poloaiga a Tavita, ma Kato le tagata vaai a le tupu, ma Natano le perofeta; auā sa faapea le poloaiga a Ieova i ana perofeta.

²⁶Ona tutū lea o sa Levī ma laaupese a Tavita, o le au faitaulaga foi ua i ai pu.

²⁷Ua fai atu foi Esekia ia fai le taulaga mu i le fata faitaulaga. O le itu la ua amata ai ona fai o le taulaga mu, ua amata ai ona pese ia Ieova, ma pu, ma laaupese na saunia e Tavita le tupu o Isaraelu.

²⁸Ona ifo lea o le faapotopotoga uma, ma ua pepese le au pepese, ma ua ili pu le au ili pu; sa fai pea ia mea uma ina seia uma le taulaga mu.

²⁹Ua uma ona fai o le taulaga mu, ona tootuli ai lea o le tupu, ma tagata uma sa faatasi ma ia, ma ua latou ifo.

³⁰Ua fai atu foi Esekia le tupu ma alii i sa Levī ia vivii ia Ieova i upu a Tavita, ma Asafo le tagata vaai. Ua latou vivii atu ma le fiafia, ma ua latou punonou ma ifo.

³¹Ona fai atu lea o Esekia, ua faapea atu, O lenei, ua tofia outou e outou mo Ieova, faalatalata mai ia, ma au mai ai taulaga, ma taulaga faafetai i le fale o Ieova. Ona au mai ai lea e le faapotopotoga o taulaga, ma taulaga faafetai; na au mai ai foi o taulaga mu e i latou uma na manatu i ai o latou loto.

³²O le faitau o taulaga mu na au mai e le faapotopotoga, o povi e fitugafulu, o mamoe poa e tasi le selau, ma tamai mamoe e lua selau; o mea uma ia sa fai a‘i taulaga mu ia Ieova.

³³O mea foi sa faasaina o povi e ono selau, ma mamoe e tolu o afe.

³⁴A ua toaitiiti le au faitaulaga, ua le mafaia ona saeeseina le pa‘u o taulaga mu uma; ona fesoasoani ai lea o latou uso o sa Levī ia te i latou ina seia uma le tofia, ina seia uma foi ona faapaiaina o isi o le au faitaulaga; auā ua sili ona tonu o loto o sa Levī latou te faapaiaina i latou i lo le au faitaulaga.

³⁵Ua tele foi taulaga mu, ma le ga‘o o taulaga faafetai, ma taulaga i mea e inu mo taulaga mu taitasi. Ua faapea ona saunia o le galuega o le fale o Ieova.

³⁶Ua fiafia Esekia atoa ma le nuu uma ina ua saunia le nuu e le Atua; auā sa faafuasei ona fai o lenei mea.