Read Samoan Old Version Bible – O LE TUSI PAIA II. NOFOAIGA A TUPU, 34 Bible Online

II. NOFOAIGA A TUPU, 34 - Samoan Old Version Bible – O LE TUSI PAIA bible

II. NOFOAIGA A TUPU, 34

¹E valu tausaga o Iosia ina ua fai o ia ma tupu; ua fai foi o ia ma tupu i Ierusalema i tausaga e tolu sefulu ma le tasi.

²Na faia e ia le amiotonu i luma o ieova, ma ua savali i ala o Tavita lona tamā, e lei ‘alo ese i le itu taumatau, po o le itu tauagavale.

³O le tausaga e valu foi o lana nofoaiga, ina o taulealea pea o ia, ua amata ai o ia ona saili i le Atua o Tavita lona tamā; o le tausaga foi e sefulu ma le lua ua ia amata ai ona faamamāina o Iuta ma Ierusalema e tea ai mea maualuluga, ma tupua o Asaira, ma tupua ua ta, ma tupua uamea.

⁴Ua latou lepetia foi fata faitaulaga o Paala i ona luma; ua ia vavae i lalo tupua o le la sa i o latou luga ae, ma nutipalaina e ia o tupua o Asaira, ma tupua ua ta, ma tupua uamea, ma ua fai ai ma efuefu, ma ua lulu ai i luga o latou tuugamau e na fai taulaga i ai.

⁵Ua susunuina e ia o ivi o faitaulaga i luga o latou fata faitaulaga, ma ua faamamāina Iuta ma Ierusalema.

⁶Sa faapea ona faia i aai o Manase, ma Efaraima, ma Simeona, ua oo atu i Nafatali i a latou mea gaogao i itu uma.

⁷Ua lepetia e ia o fata faitaulaga, ma tupua o Asaira, ma ua tu‘ininiia tupua ua ta e fai ma efuefu, ma ua vavae i lalo o tupua uma o le la i le nuu uma o Isaraelu; ona toe foi mai ai lea o ia i Ierusalema.

⁸O le sefulu ma le valu o tausaga o lana nofoaiga ina ua faamamāina e ia o le nuu ma le fale, ona ia aauina atu ai lea o Safana le atalii o Asalaia, ma Maaseia le alii o le aai, ma Ioaa le atalii o Ioaasa o le fatua‘iupu, e toe teuteu le fale o Ieova lona Atua.

⁹Ua latou oo mai ia Hilikia le faitaulaga sili, ona latou avatu ai lea o tupe na aumaia i le fale o le Atua, na faapotopotoina e sa Levī, o e na leoleo i le faitotoa, nai lima o Manase, ma Efaraima, ma e ua totoe uma o Isaraelu, ma Iuta uma, ma Peniamina, atoa ma e ua nonofo i Ierusalema.

¹⁰Ua latou avatu ai i le au faigaluega e na pule i le fale o Ieova, ma latou avatu ai i e fai galuega e galulue i le fale o Ieova, e toe faasoo ai le fale.

¹¹Ona latou avatu ai lea i tufuga, ma tufuga ati fale e faatau a‘i maa talai, ma laau e faasoo a‘i, ma ia fai ma laau faalava, mo fale na faataugaina e tupu o Iuta.

¹²Ua faia e tagata le galuega ma le faamaoni; ua pule ia te i latou o Iata ma Opetaia, o sa Levī, ai le fanauga a Merari; o Sakaria foi ma Mesulama, ai le fanauga a Koato, e leoleo ai; ma sa Levī, o e popoto uma i laaupese.

¹³Ua latou pule foi i e ave avega, ma leoleo ia te i latou uma o e fai galuega i galuega eseese; o isi o sa Levī sa fai ma tusiupu, ma faipule, ma leoleo faitotoa.

¹⁴Ua latou avatu tupe na aumaia i le fale o Ieova, ona maua lea e Hilikia le faitaulaga o le tusi o le tulafono a Ieova na tusia e Mose.

¹⁵Ona fai atu lea o Hilikia, ua faapea atu ia Safana le tusiupu, Ua ou maua le tusi o le tulafono i le fale o Ieova. Ona tuuina atu ai lea e Hilikia o le tusi ia Safana.

¹⁶Ona ave ai lea o le tusi e Safana i le tupu, ma ua au mai le tala i le tupu, ua faapea mai, O galuega uma na e tuuina atu ai i au auauna, o loo latou faia lava.

¹⁷Ua sasaaina e i latou o tupe na maua i le fale o Ieova, ma ua latou tuuina atu ai i e pule lima o e fai galuega.

¹⁸Ona fai mai lea o Safana le tusiupu i le tupu, ua faapea mai, Ua au mai ia te au e Hilikia le faitaulaga le tusi. Ona faitau ai lea e Safana i luma o le tupu.

¹⁹Ua faalogo le tupu i upu o le tulafono, ona ia saei ai lea o ona ofu.

²⁰Ona fai atu lea o le tupu ia Hilikia, ma Aikamo le atalii o Safana, ma Apetonu le atalii o Mika, ma Safana le tusiupu, ma Asaia le auauna a le tupu, ua faapea atu,

²¹Ina o ia, ina fesili ia Ieova mo a‘u, ma e o totoe i Isaraelu, ma Iuta i upu o le tusi ua maua; auā ua tele le toasa o Ieova ua liligi ifo ia te i tatou, ina ua le anaana o tatou tamā i le afioga a Ieova, e fai mea uma ua tusi i lenei tusi.

²²Ona o atu ai lea o Hilikia, ma i latou na tofia e le tupu, ia Ulata le perofeta fafine, o le avā a Saluma le atalii o Tikeva le atalii ia o Areasa o le tausi i ofu; (sa nofo foi o ia i Ierusalema i le mea ua ta‘ua o le lua o aai;) ma ua latou tautala ma ia i lenei mea.

²³Ona tali mai lea o ia ia te i latou, O loo faapea ona fetalai mai o Ieova le Atua o Isaraelu, Ia outou fai atu i le tagata na aauina mai outou ia te au,

²⁴o loo faapea ona fetalai mai o Ieova, Faauta, o le a a‘u au mai le leaga i lenei mea ma e nonofo ai, o fetuu uma ua tusia i le tusi na faitauina atu e i latou i luma o le tupu o Iuta;

²⁵auā ua latou tuua a‘u, a e faamu mea manogi i atua ese, ina ia latou faaonoono mai ia te au i galuega uma a o latou lima; o lea e liligi ai lo‘u ita i lenei mea, e le tineia lava.

²⁶A o le tupu o Iuta na aauina mai outou e fesili ia Ieova, ia faapea ona outou fai atu ia te ia, O loo faapea ona fetalai mai o Ieova le Atua o Isaraelu i upu na e faalogo ai;

²⁷auā sa vaivai lou loto, ma ua e faamaulalo i luma o le Atua, ina ua e faalogo i ana upu i lenei mea, ma ē nonofo ai, ma ua e faamaulalo i o‘u luma, ma ua e saei i ou ofu, ma ua e tagi i o‘u luma; o loo fetalai mai Ieova, Ua ou faalogo ai lava.

²⁸Faauta, ou te faatasiina atu oe i ou tamā, e oo atu foi oe i lou tuugamau ma le filemu; a e le iloa e ou mata le malaia uma ou te faaoo mai i luga o lenei mea, ma luga o e nonofo ai. Ona latou au mai ai lea o le upu i le tupu.

²⁹Ona alu lea o le feau a le tupu, ma ua faapotopotoina toeaina uma o Iuta ma Ierusalema.

³⁰Ona alu ae ai lea o le tupu i le fale o Ieova, o ia ma tagata uma o Iuta, ma e ua nonofo i Ierusalema, ma le au faitaulaga, ma sa Levī, ma le nuu uma, o e matutua atoa ma tama iti; ona faitau atu lea e ia, o latou o faalogologo ai, i upu uma o le tusi o le feagaiga na maua i le fale o Ieova.

³¹Ua tu foi le tupu i le tulaga ma ua osi le feagaiga i luma o Ieova, e mulimuli ia Ieova, ma tausi i ana poloaiga, ma ana tulafono, atoa ma ana sauniga, i lona loto atoa, ma lona agaga atoa, ma usiusitai i upu o le feagaiga ua tusia i lenei tusi.

³²Ua pule foi o ia ia auga ia i latou uma sa i Ierusalema ma Peniamina lea feagaiga. Ua faia foi e i latou ua nonofo i Ierusalema e tusa ma le feagaiga a le Atua, le Atua o latou tama.

³³Ona aveeseina lea e Iosia o mea leaga uma i nuu uma sa i le fanauga a Isaraelu, ma ua pule ia auauna o i latou uma sa i Ierusalema, ia auauna lava ia Ieova lo latou Atua. Ua latou le o ese i ona aso uma i lo latou mulimuli ia Ieova le Atua o latou tamā.