Read Samoan Old Version Bible – O LE TUSI PAIA II. NOFOAIGA A TUPU, 35 Bible Online

II. NOFOAIGA A TUPU, 35 - Samoan Old Version Bible – O LE TUSI PAIA bible

II. NOFOAIGA A TUPU, 35

¹Ua faia foi e Iosia le paseka ia Ieova i Ierusalema; ma ua latou fasia le paseka i le sefulu ma le fa o aso o le masina muamua.

²Ona tofia lea e ia o le au faitaulaga i o latou tofiga, ma ua na faamalosi ia te i latou i le galuega o le fale o Ieova;

³na fai atu o ia i sa Levī, o e ua faapaiaina mo Ieova, o e ua a‘oa‘o ia Isaraelu uma, Ina tuu ia le atolaau paia i le fale na faia e Solomona le atalii o Tavita le tupu o Isaraelu; e le fai ai ma avega i o outou ua; o lenei, ina auauna ia outou ia Ieova lo outou Atua ma lona nuu o Isaraelu,

⁴ia sauniuni foi outou i aiga o outou tamā, e tusa ma o outou vasega, e faatatau i le tusi a Tavita le tupu o Isaraelu, e faatatau foi i le tusi a Solomona lona atalii.

⁵Ma ia tutū outou i le malumalu i vasega o aiga o tamā o outou uso, o tagata o le nuu, ma vasega o aiga o sa Levī.

⁶Ia outou fasia foi le paseka, ma ia faapaiaina outou e outou, ma ia outou sauniuni o outou uso, ina ia latou fai e tusa ma le afioga a Ieova ia Mose.

⁷Ona avatua lea e Iosia ai le lafu o tamai mamoe ma tamai ‘oti i le nuu, o manu uma ia e fai ai le paseka mo i latou uma sa i ai; o le faitau aofai e tolu sefulu o afe o manu, ma le tolu o afe o povi; o mea ia na au mai i mea a le tupu.

⁸O alii foi sa ia te ia na foai ma le loto i le nuu, ma le au faitaulaga, ma sa Levī; o Hilikia, ma Sakaria, ma Ieielu, o e pule i le fale o le Atua, ua latou avatu i le au faitaulaga mo le paseka, e lua afe ma le ono selau o manu, ma povi e tolu selau.

⁹O Konania foi, ma Semaia, ma Natanielu ona uso, ma Hasapea, ma Ieielu, ma Iosapata, o alii o sa Levī, ua latou avatu i sa Levī mo le paseka e lima afe o manu, ma povi e lima selau.

¹⁰Ua saunia foi le galuega, ma ua tutū le au faitaulaga i mea latou te tutū ai, ma sa Levī i o latou vasega, e tusa ma le poloaiga a le tupu.

¹¹Ona latou fasia lea o le paseka, ma ua sausau le toto e le au faitaulaga ai o latou lima, a ua saeeseina o pa‘u e sa Levī.

¹²Ua tuueseina e i latou o taulaga mu, ina ia latou avatua e tusa ma vasega o aiga o tagata o le nuu, e fai taulaga ia Ieova e pei ona tusia i le tusi a Mose. Sa faapea foi ona fai i povi.

¹³A ua latou tunu le paseka i le afi e tusa ma le tu; a o isi taulaga paia ua tunu i ulo, ma pani tetele, ma pani salafa, ma ua tufatufa faataalise i tagata uma o le nuu.

¹⁴E mulimuli ane ua latou sauniuni mo i latou ma le au faitaulaga; auā o le au faitaulaga o le fanauga a Arona ua mua ona osi taulaga mu ma ga‘o e oo i le po; o le mea lea ua sauniuni ai e sa Levī mo i latou lava ma le au faitaulaga o le fanauga a Arona.

¹⁵O le au pepese o le fanauga a Asafo sa i ai i latou i mea e tutū ai, e tusa ma le poloaiga a Tavita, ma Asafo, ma Hemana, ma Iutana o le tagata vaai a le tupu; ua leoleo foi le au leoleo faitotoa i lea faitotoa ma lea faitotoa; e lei tuu e i latou o a latou galuega; a o latou uso o sa Levī ua latou sauniuini mo i latou.

¹⁶Na uma ona saunia le galuega uma a Ieova i lea lava aso, e fai ai le paseka, ma osi taulaga mu i luga o le fata faitaulaga o Ieova, e tusa ma le poloaiga a le tupu o Iosia.

¹⁷O le fanauga a Isaraelu sa i ai ua latou faia le paseka i ia ona po, ma le tausamiga o areto e le faafefeteina i aso e fitu.

¹⁸E lei faia foi se paseka faapena i Isaraelu talu i ona po o Samuelu le perofeta; e lei faia foi e tupu uma o Isaraelu o se paseka e pei o lea na faia e Iosia, ma le au faitaulaga, ma sa Levī, ma Iuta uma, ma Isaraelu sa i ai, ma e ua nonofo i Ierusalema.

¹⁹Sa faia lenei paseka i le sefulu ma le valu o tausaga o le nofoaiga a Iosia.

²⁰Ua mavae ia mea uma, ua saunia foi e Iosia le fale, ona alu ae lea o Neko le tupu o Aikupito e tau ma Karekimisa i Eufirate; ona alu atu ai lea o Iosia e tau ma ia.

²¹A ua aauina mai e ia o le sāvali ia te ia, ua faapea mai, Se a lau na ia te au, o oe le tupu o Iuta? Ou te lei alu atu e tau ma oe i lenei aso, a o le tasi aiga matou te tau; auā na fetalai mai le Atua ia te au ia faataalise; soia lava oe, auā le Atua, o ia o loo ia te au, ina ne‘i fano oe ia te ia.

²²A e lei liliu ese Iosia ia te ia, a ua ofu ese o ia, ina ia tau ma ia, ma ua le faalogo i upu a Neko mai le fofoga o le Atua, a ua alu atu o ia e tau le taua i le vanu o Mekito.

²³Ua fana atu o e fanafana i u i le tupu o Iosia; ona fai atu lea o le tupu i ana auauna, Ia outou ave ese ia te au; auā ua leaga lo‘u manua.

²⁴Ona siitia lea o ia e ana auauna ai lea kariota, ma ua faatietie ia te ia i lona lua o kariota sa ia te ia; ma ua latou au mai ia te ia i Ierusalema; ua oti foi o ia, ma ua tanumia o ia i tuugamau o ona tamā. Ua faanoanoa Iuta uma ma Ierusalema ona o Iosia.

²⁵Ona lagi lea o le fatu e aualofa a‘i e Ieremia ona o Iosia; o le au pepese tane uma foi atoa ma le au pepese fafine ua latou ta‘uta‘u ia Iosia i a latou fatu e aualofa a‘i ua oo i le aso nei, ua fai ai ma tu ia Isaraelu; faauta foi, ua tusia i fatu e aualofa a‘i.

²⁶O toe o mea na faia e Iosia, ma lona agalelei, e tusa ma mea ua tusia i le tulafono a Ieova,

²⁷o ana mea na fai, o mea muamua ma mea mulimuli, faauta, ua tusia i le tusi i tupu o Isaraelu ma Iuta.