Read Samoan Old Version Bible – O LE TUSI PAIA II. NOFOAIGA A TUPU, 5 Bible Online

II. NOFOAIGA A TUPU, 5 - Samoan Old Version Bible – O LE TUSI PAIA bible

II. NOFOAIGA A TUPU, 5

¹Ua uma foi ona fai o le galuega uma na faia e Solomona mo le fale o Ieova; ona aumaia lea e Solomona o mea na faasaina e Tavita lona tamā, o ario, ma auro, atoa ma mea uma, ua ia tuu faatasia ma oloa o le fale o le Atua.

²Ona faapotopotoina lea e Solomona o toeaina o Isaraelu, ma matai uma o itu aiga, o alii sili o le fanauga a Isaraelu, i Ierusalema, e avae le atolaau o le feagaiga a Ieova nai le aai a Tavita, o Siona lea.

³Ona faapotopotoina mai lea i le tupu o tagata uma o Isaraelu i le tausamiga, o le fitu o masina lea.

⁴Ua o mai toeaina uma o Isaraelu; ona avae lea e sa Levī o le atolaau.

⁵Ua aumaia e i latou le atolaau, ma le fale fetafai o le faapotopotoga, ma mea paia uma na i le fale fetafai, na aumaia ia lava mea e le au faitaulaga ma sa Levī.

⁶O le tupu o Solomona, ma le faapotopotoga uma o Isaraelu, na faapotopotoina mai ia te ia i luma o le atolaau, ua latou fai taulaga i mamoe, ma povi, e le mafaitauina, e le masino lava, ina na tele lava.

⁷Ua ave e le au faitaulaga le atolaau o le feagaiga a Ieova i le mea e tuu ai, i le mea e fetalai mai ai o i le fale, o le mea e sili ona paia, i lalo o apaau o kerupi;

⁸auā na faaloaloa e kerupi o la apaau i luga o le mea e tuu ai le atolaau; ma ua faamalumalu ifo ai kerupi i le atolaau ma ona amo.

⁹Ua latou faasili mai amo, na iloa foi pito o amo ai le atolaau i luma o le mea e fetalai mai ai; a e lei iloa i fafo. O loo i ai ua oo i ona po nei.

¹⁰Na le i ai se mea i le atolaau, ua na o papa e lua na tuu ai e Mose i Horepa, ina ua osia le feagaiga e Ieova ma le fanauga a Isaraelu, ina ua latou o mai nai Aikupito.

¹¹Ua ulufafo mai le au faitaulaga nai le mea paia, auā sa faapaiaina le au faitaulaga uma ua i ai, ua latou le tausi i vasega.

¹²O sa Levī foi o e pepese, o i latou uma o sa Asafō, ma sa Hemanā, ma sa Iutanā, ma o latou atalii, ma o latou uso, ua oofu i ie vavae, ua i ai sumepalo, ma napeli, ma kitara, ua tutū i le itu i sasae o le fata faitaulaga, ua faatasi ma i latou le au faitaulaga e toaselau ma le toaluafulu i latou o ili pu.

¹³O e ili pu ma e o pepese ua peiseai o se toatasi, ua tasi le leo i le viiga ma le faamanu ia Ieova; ua latou pepese faatasi ma pu, ma sumepalo, ma laaupese, e vivii atu ai ia Ieova, o loo faapea atu, Auā e lelei o ia, auā e faavavau lava lona alofa, Ona tumu ai lea o le fale i le ao, o le fale lava o Ieova.

¹⁴Ua le mafai ai le au faitaulaga ona tutū e auauna ona o le ao; auā na tumu le fale o le Atua i le pupula o Ieova.