Read Samoan Old Version Bible – O LE TUSI PAIA II. NOFOAIGA A TUPU, 7 Bible Online

II. NOFOAIGA A TUPU, 7 - Samoan Old Version Bible – O LE TUSI PAIA bible

II. NOFOAIGA A TUPU, 7

¹Ua faaiu e Solomona lana tatalo, ona paū ifo ai lea o le afi mai le lagi, ua faaumatia ai le taulaga mu ma taulaga; ua tumu foi le fale i le pupula o Ieova.

²Ua le mafaia foi e le au faitaulaga ona ulufale i le fale o Ieova, auā ua tumu le fale o Ieova i le pupula o Ieova.

³Ua iloa e le fanauga a Isaraelu uma o le afi ua paū ifo, ma le pupula o Ieova i luga o le fale, ona latou faapauu fao ai lea i le paepae, ma latou ifo, ma vivii atu ia Ieova, ua faapea atu, Auā e lelei o ia; auā e faavavau lona alofa.

⁴Ona fai taulaga lea i luma o Ieova o le tupu, atoa ma le nuu uma.

⁵Ua faia e Solomona le tupu o le taulaga o povi e lua sefulu o afe ma afe e lua, ma mamoe e selau afe ma afe e luafulu; ua faaulufaleina ai le fale o le Atua e le tupu ma le nuu uma.

⁶Ua tutū atu le au faitaulaga i o latou tofi; o sa Levī foi ua i ai laaupese a Ieova, na faia e Tavita le tupu e vivii atu ai ia Ieova, auā e faavavau lona alofa; o ia mea na vivii atu ai e Tavita; ua ili pu le au faitaulaga i o latou luma, ua tutū mai foi o Isaraelu uma.

⁷Ua faapaiaina foi e Solomona i totonu o le lotoā i luma o le fale o Ieova; auā na osia ai e ia o taulaga mu, ma ga‘o o taulaga faafetai, auā o le fata faitaulaga ‘apa memea na faia e Solomona e lei ofi ai taulaga mu ma taulaga i mea e ‘ai, ma ga‘o.

⁸O ona po ia na fai ai e Solomona atoa ma Isaraelu uma faatasi ma ia o le tausamiga e fitu ona aso, o le faapotopotoga tele lava, e gata mai i le mea e ui atu a i Amato, e gata mai i le alia o Aikupito.

⁹O le aso valu ua latou fai ai le faapotopotoga; auā o le faasaina o le fata faitaulaga na faia i aso e fitu, e fitu foi aso o le tausamiga.

¹⁰O le luafulu ma le tolu o aso o le fitu o masina na tuuina atu ai e ia o le nuu e ō i o latou fale ie, ua olioli ma loto fiafia ona o mea lelei na faia e Ieova ia Tavita, ma Solomona, ma lona nuu o Isaraelu.

¹¹Ua faauma e Solomona le fale o Ieova, ma le fale o le tupu; o mea uma foi na loto Solomona e fai i le fale o Ieova ma lona fale, na faia e ia ma le manuia.

¹²Ona faaali mai lea o Ieova ia Solomona i le po, ua faapea mai ia te ia, Ua ou faalogo i lau tatalo, ma ua ou filifilia lenei mea mo a‘u e fai ma fale e fai ai taulaga.

¹³Afai ou te pupuni le lagi ma ua le ua ai, afai foi ou te fai atu i sē ‘akava e faaumatia le fanua, afai foi ou te tuuina atu le faamai i lo‘u nuu;

¹⁴afai e faamaulalo lo‘u nuu ē ua ta‘ua i lo‘u igoa, ma latou tatalo, ma sailiili ia te au, ma liliu ese i o latou ala leaga, ona ou faalogo ai lea mai le lagi, ma faamagalo i a latou agasala, ma faaolaina lo latou nuu.

¹⁵O lenei, e vaavaai o‘u mata, ma liliu o‘u taliga i le tatalo e faia i lenei mea.

¹⁶Auā ua ou filifilia ma faapaiaina lenei fale, ina ia i ai lo‘u igoa e faavavau; e faasaga i ai foi o‘u mata ma lo‘u loto i aso uma.

¹⁷A o oe, afai e te savali i o‘u luma e pei ona savali lou tamā o Tavita, ma e faia ia tusa ma mea uma na ou fai atu ai ia te oe, ma e tausi a‘u tulafono ma a‘u faamasinoga;

¹⁸ona ou faatumauina lea o le nofoālii o lou malo, e faapei ona ma osia le feagaiga ma lou tamā o Tavita, ua faapea atu, E le motu lou gafa e pule ia Isaraelu.

¹⁹A e afai tou te liliu ese, ma tuua au tulafono ma a‘u poloaiga, ua ou tuuina atu i o outou luma, ma outou o atu, ma auauna atu i atua ese, ma ifo ia te i latou;

²⁰ona ou liaiina atu lea o i latou ai lo‘u laueleele ua ou foaiina atu ia te i latou; o lenei fale foi, ua ou faapaiaina mo lo‘u igoa, ou e lafoai atu ai i o‘u luma, ma ou faia ma upu faatusa ma tauemuga i nuu uma lava.

²¹O lenei fale foi, o loo ua maualuga, e fai ma mea e ofo ai i latou uma o e ui ane ai, ma fai ane, Se a le mea ua faapea ai ona fai e Ieova i lenei nuu ma lenei fale

²²Ona tali mai lea o i latou, Auā ua latou tuua Ieova le Atua o latou tamā o le na au mai ia te i latou nai le nuu o Aikupito, ma latou taofi i atua ese, ma ifo atu ia te i latou, ma auauna atu ia te i latou; o le mea lea ua faaooina ai e ia lenei malaia uma ia te i latou.