Read Samoan Old Version Bible – O LE TUSI PAIA ESERA, 10 Bible Online

ESERA, 10 - Samoan Old Version Bible – O LE TUSI PAIA bible

ESERA, 10

¹A o talotalo Esera, ma ta‘uta‘u atu a latou agasala, o loo tagi, ma faapaū i luma o le fale o le Atua, ua faapotopoto mai ia te ia mai ia Isaraelu o le faapotopotoga tele lava, o tane ma fafine ma tama iti; auā sa fetagisi le nuu i le tagi tele.

²Ona tali mai lea o Sekania le atalii o Ieielu o lo le fanauga a Elama, ua faapea mai ia Esera, Ua agasala i matou i lo matou Atua, ina ua matou fai avā i fafine ese mai tagata o le nuu; a o lenei, ua i ai se faatuatuaga mo Isaraelu i lenei mea.

³O lenei, ia tatou osia le feagaiga ma lo tatou Atua, ia tatou aauina atu o avā uma, ma e ua fananau mai ia te i latou, e tusa ma le pule a oe lo‘u alii, ma e ua matatau i poloaiga a lo tatou Atua; ma ia faia e tusa ma le tulafono.

⁴Ina tulai ia, auā ua ia te oe lenei mea; matou te faatasi foi ma oe; ia e faamalosi, ma ia e faia.

⁵Ona tulai ai lea o Esera, ma fai atu ia tauto alii o le au faitaulaga, ma sa Levi, ma Isaraelu uma ia faia e tusa ma lenei upu. Ona latou tauto ai lea.

⁶Ona tulai lea o Esera ai luma o le fale o le Atua, ma ua alu atu i le potu o Ioanana le atalii o Eliasipa, ua oo foi o ia i ai, ua ia le ‘ai se areto, ua le inu foi se vai, auā sa faanoanoa ona o le agasala a le tafeaga.

⁷Ona latou tala‘i lea o le upu i Iuta ma Ierusalema, i tagata uma o le tafeaga, ia potopoto mai i Ierusalema;

⁸o i latou uma foi e le o mai i e luā, e tusa ma le pule a alii ma toeaina, e faatoina ane oloa uma, ma vavaeeseina o ia ai le faapotopotoga o le tafeaga.

⁹Ona faapotopoto mai ai lea o tagata uma o Iuta ma Peniamina i Ierusalema i le aso tolu. O le iva lea o masina, o le aso e luafulu o le masina; sa nonofo le nuu uma i le malae i luma o le fale o le Atua, ua tetemu ona o lena mea, atoa ma uaga.

¹⁰Ona tulai lea o Esera le faitaulaga, ua faapea atu ia te i latou, O outou na ua agasala outou, ina ua outou fai avā i fafine ese e faaopoopo ai i le agasala a Isaraelu.

¹¹O lenei, ia outou ta‘uta‘u atu a outou agasala ia Ieova le Atua o outou tama, ma ia outou faia lona finagalo, ma ia outou vavae ese i tagata o le nuu, ma fafine ese.

¹²Ona tali mai lea o le faapotopotoga uma, ua latou faapea mai ma le leo tele, E pei ona e fetalai mai ia te i matou, e faapea ona matou faia.

¹³A ua toatele le nuu, ma ua tele uaga i ona po nei, ma ua le lavā ai i matou ona tutū i fafo; e le mafai foi lenei mea i le aso e tasi, po o aso e lua; auā ua toatele i matou ua soli tulafono i lenei mea;

¹⁴ia tofia o matou alii o le faapotopotoga uma, o i latou uma foi o i a matou aai o e ua fai avā i fafine ese, ia o mai i latou i ona po a tuu, ma ia faatasi mai ma i latou o toeaina o lea aai ma lea aai, atoa ma faamasino o i ai, seia liliu ese ai ia te i matou le toasa tele o lo matou Atua ona o lenei mea.

¹⁵Na tofia i lenei mea na o Ionatana le atalii o Asaelu, ma Iekasia le atalii o Tikeva; o Mesulama foi ma Sapetai le sa Levi ua fesoasoani ia te i laua.

¹⁶Ua faia faapea foi e tagata o le tafeaga. Sa vavaeeseina o Esera le faitaulaga, ma matai sili e tusa ma aiga o latou tamā, o i latou uma foi ua ta‘ua o latou igoa, ua latou nonofo i lalo foi i le aso muamua o le masina ae sefulu e suesue i lena mea.

¹⁷Ua latou faaiuina ona suesue i tagata uma e na fai avā i fafine ese i le uluai aso o le masina muamua.

¹⁸Ua iloa foi atalii o faitaulaga e na fai ava i fafine ese; o isi atalii o Iosua le atalii o Iosataka ma ona uso, o Maaseia, ma Elisara, ma Iaripi, ma Ketalia.

¹⁹Ua latou tuuina atu o latou lima latou te aauina atu a latou avā; ona ua nofo sala foi i latou ua aumaia le mamoe poa mai le lafu ona o la latou agasala.

²⁰O isi foi atalii o Imere; o Hanani, ma Sepatia.

²¹O isi atalii o Harima; o Maaseia, ma Elia, ma Semaia, ma Ikieli, ma Usia.

²²O isi atalii o Pasura; o Elioenai, o Maaseia, o Isamaeli, o Natanielu, o Iosapata, ma Eliasa.

²³O isi foi o sa Levi; o Iosapata, ma Semi, ma Kilaia, o Kelita lea, o Petakia, o Iuta, ma Elisara.

²⁴O lo le au pepese; o Eliasipa. O isi foi o le au leoleo faitotoa; o Saluma, ma Telema, ma Auri.

²⁵O isi foi o Isaraelu; o isi atalii o Parose; o Ramea, ma Iesia, ma Malekia; ma Meamina, ma Eleasaro, ma Malekia, ma Penaia.

²⁶O isi atalii o Elama; o Matania, o Sakaria, ma Ieielu, ma Opeti, ma Ieremota, ma Elia.

²⁷O isi atalii o Satu; o Elioenai, o Eliasipa, o Matania, ma Ieremota, ma Sapata, ma Asesa.

²⁸O isi atalii o Pepai; o Ioanaua, o Hanania, o Sapai, ma Atalai.

²⁹O isi atalii o Pani; o Mesulama, o Maluka, ma Ataia, o Iasuvi, ma Seala, ma Ramota.

³⁰O isi atalii o Pakamoapi; o Atena, ma Kila, o Penaia, o Maaseia, o Matania, o Pesaleli, ma Pinui, ma Manase.

³¹O atalii foi o Harima, o Elisara, o Isea, o Malekia, o Semaia, ma Simeona.

³²O Peniamina, o Maluka, o Semaria.

³³O isi atalii o Hasumu; o Matenai, o Matata, o Sapata, o Elipelete, o Ieremai, o Manase, ma Semi.

³⁴O isi atalii o Pani; o Maatai, o Amaramo, ma Ueli,

³⁵o Penaia, o Petia, o Kilui,

³⁶o Vania, o Meremota, o Eliasipa,

³⁷o Matania, o Matenai, ma Iaasau,

³⁸ma Pani, ma Pinui, o Semi,

³⁹ma Selemia, ma Natano, ma Ataia,

⁴⁰o Makenatipai, o Sasai, o Sarai,

⁴¹o Asareelu, ma Selemia, o Semaria,

⁴²o Saluma, o Amaria, ma Iosefa.

⁴³O isi atalii o Nepo; o Ieielu, o Matatia, o Sapata, o Sapina, o Iatau, ma Ioelu, ma Penaia.

⁴⁴O i latou uma ia na fai avā i fafine ese; na i ai foi i nisi o i latou o avā na latou fanaua tama.