Read Samoan Old Version Bible – O LE TUSI PAIA ESERA, 4 Bible Online

ESERA, 4 - Samoan Old Version Bible – O LE TUSI PAIA bible

ESERA, 4

¹Ua faalogo e na ita mai ia Iuta ma Peniamina ua faia e tagata o le tafeaga le malumalu mo Ieova le Atua o Isaraelu;

²ona latou o mai lea ia Serupapelu ma matai sili, ma ua latou faapea mai ia te i latou, Se‘i tatou faia ia le fale faatasi ma outou; aua ua matou saili atu i lo outou Atua, pei o outou; o i matou foi ua matou fai taulaga ia te ia, talu ona po o Esarata le tupu o Asuria, o le na aveina ae i matou iinei.

³Ona fai atu lea o Serupapelu, ma Iosua, ma matai sili uma o Isaraelu ia te i latou, Tatou te le faia le fale o lo matou Atua ma outou; na o i matou nei lava matou te faia le fale o Ieova le Atua o Isaraelu, pei ona fetalai mai le tupu o Kuresa le tupu o Peresia ia te i matou.

⁴Ona faavaivaia lea o tagata o Iuta e tagata o le nuu, ma latou faaatuatuvaleina i latou a o faia le fale;

⁵ua latou faaoloaina foi ni e faulalo e faalavelave ia te i latou, ina ia faaleaogaina ai la latou filifiliga, i aso uma o Kuresa le tupu o Peresia, e oo foi i le nofoaiga a Tariu le tupu o Peresia.

⁶O le nofoaiga a Asueru, o le amataga o lana nofoaiga, ua tusi atu ai e i latou e momoli i e ua nonofo i Iuta ma Ierusalema.

⁷O ona aso foi o Aretaseta sa tusi atu ai Piselama, o Metereta, o Taveele, ma i latou uma e na pule faatasi ma i latou, ia Aretaseta le tupu o Peresia; o upu foi o le tusi sa tusi i le gagana a Arama, sa faamatalaina foi i le gagana a Arama.

⁸Ua tusi atu Rekumu le faamasino, ma Semesai le tusiupu, se tusi e momoli ai Ierusalema ia Aretaseta le tupu, ua faapea;

⁹ona tusi atu lea o Rekumu le faamasino, ma Semesai le tusiupu, ma i latou uma e na pule faatasi ma i laua; o tagata o Tinai, ma tagata o Afareseka, o tagata o Tarepelai, o tagata o Afaresai, o tagata o Areka, o tagata o Papelonia, o tagata o Susana, o tagata o Tiavei, o tagata o Elama,

¹⁰ma isi nuu uma na aumaia e Asenapa, o le alii tele ma le ta‘ua, ma na faanofoina i latou i aai o Samaria, ma i latou uma o i ona tala mai o le vaitafe, o ona po foi na tusi ai.

¹¹O le ata lenei o le tusi na avatu e i latou ia te ia, o le tupu o Aretaseta, O au auauna o tagata o i ona tala mai o le vaitafe, ua faapea atu,

¹²Ia silafia e le tupu, o tagata o Iuta e na o ae ia te i matou mai ia te oe, ua oo mai i latou i Ierusalema le aai fouvale ma le matua leaga, ua toe faia, ma ona pa ua faauma, ua soo foi ona faavae.

¹³Ia silafia nei e le tupu, afai e toe faia lenei aai, a faaumaina foi ona pa, ona le avatu lea e i latou o taulaga, ma taulaga i mea eseese, ma taulaga o ala; ona iu ai lea ina faaitiitiina mea a tupu.

¹⁴O lenei, ona ua aai i matou i mea mai le maota o le tupu, e le tatau ia i matou ona vaai i le faamativaina o le tupu; o le mea lea ua matou aauina atu ai nisi, ma matou faailoa atu ai i le tupu;

¹⁵ina ia suesuea i le tusi a ou tama e faamanatu a‘i, ona e maua ai lea i le tusi e faamanatu a‘i, ma e silafia ai, o lenei aai o le aai fouvale ma le ua leaga ai mea a tupu ma itu malo, ma latou faatupuina ai le fouvale talu anamua lava; o lea na faaumatia ai lenei aai.

¹⁶Ua matou faailoa atu i le tupu, afai e toe faia lenei aai, ma faaumaina ona pa, ona le toe ai lea sou tofi i lenei itu o le vaitafe.

¹⁷Ona au mai lea e le tupu le tusi ia Rekumu le faamasino, ma Semesai le tusiupu, ma i latou uma ua pule faatasi ma i laua o e nonofo i Samaria, ma e o i lela itu o le vaitafe, Ia manuia outou, o ona po foi na tusi ai.

¹⁸O le tusi na au mai e outou ia te i matou ua faitauina lava i o‘u luma.

¹⁹Ona ou fai atu ai lea, ona suesuea lea, ua iloa ai foi o lena aai ua faamaualuga i tupu talu anamua lava, ua faatupuina ai foi le fouvale ma le ‘āna‘āna.

²⁰Sa i ai foi i Ierusalema o tupu lima malolosi o e na pule i nuu uma i ona tala atu o le vaitafe, sa avatua foi ia te i latou o taulaga, ma taulaga i mea eseese, ma taulaga o ala.

²¹O lenei, ina poloai atu ia o outou ia vaoia ia tagata, aua foi ne‘i faia lena aai, seia ou tuuina atu se tasi poloaiga.

²²Ia outou, ne‘i outou faatamala i lenei mea; pe se a ea e tupu ai se leaga e faaitiitiina ai mea a tupu.

²³Ua faitauina le upu o le tusi a le tupu o Aretaseta i luma o Rekumu ma Semesai le tusiupu, ma e na pule faatasi ma i laua, ona latou o ai lea ua tele vavave i Ierusalema, i tagata o Iuta, ma latou vaoia i latou i le lima malosi.

²⁴Ona tuua ai lea o le galuega o le fale o le Atua o i Ierusalema. Ua tuua foi ua oo i le lua o tausaga o le nofoaiga a Tariu le tupu o Peresia.