Read Samoan Old Version Bible – O LE TUSI PAIA ESERA, 7 Bible Online

ESERA, 7 - Samoan Old Version Bible – O LE TUSI PAIA bible

ESERA, 7

¹E mulimuli ane foi i nei mea, i le nofoaiga Aretaseta le tupu o Peresia, ua alu ae ai Esera le atalii o Seraia, o le atalii ia o Asaria, o le atalii ia o Hilikia,

²o le atalii ia o Saluma, o le atalii ia o Satoka, o le atalii ia o Akitopo,

³o le atalii ia o Amaria, o le atalii ia o Asaria, o le atalii ia o Meraiota,

⁴o le atalii ia o Serakia, o le atalii ia o Usi, o le atalii ia o Puki,

⁵o le atalii ia o Apisua, o le atalii ia o Fineaso, o le atalii ia o Eleasaro, o le atalii ia o Arona le faitaulaga sili.

⁶O Esera lea na alu ae nai Papelonia; o le tusiupu poto foi o ia i le tulafono a Mose, na tuuina mai e Ieova le Atua o Isaraelu; ua tuuina mai foi e le tupu ia te ia atoa uma mea na ia fai atu ai, e tusa ma le aao o Ieova lona Atua na ia te ia.

⁷Ua o ae foi nisi o le fanauga a Isaraelu, ma nisi o le au faitaulaga, ma sa Levi, ma e pepese, ma leoleo faitotoa, ma netini, i Ierusalema, i le fitu o tausaga o le tupu o Aretaseta.

⁸Ua oo foi o ia i Ierusalema i le lima o masina o le fitu o tausaga o le tupu.

⁹Auā o le aso muamua o le masina muamua na amata ai ona alu ae o ia nai Papelonia; o le aso muamua foi o le lima o masina na oo atu ai o ia i Ierusalema, e tusa ma le aao alofa o lona Atua ua ia te ia.

¹⁰Auā na saunia e Esera lona loto e saili i le tulafono a Ieova ma fai ai, ma a‘oa‘o atu i Isaraelu i le tulafono, ma faamasinoga.

¹¹O le ata lenei o le tusi na avatua e le tupu o Aretaseta ia Esera le faitaulaga le tusiupu, o le tusiupu lea i upu o poloaiga a Ieova, ma ana tulafono ia Isaraelu.

¹²O Aretaseta le tupu o tupu ia Esera le faitaulaga, o le tusiupu o le tulafono a le Atua o le lagi; ia atoatoa lou manuia, ua faapea, Ou te fai atu,

¹³O i latou uma o le nuu o Isaraelu, ma ona faitaulaga, ma sa Levi, o i lo‘u malo, o e loto ina o, ia latou o faatasi ma oe i Ierusalema.

¹⁴Ona ua auina oe e le tupu, ma alii e pule e toafitu ua ia te ia, e suesue ia Iuta ma Ierusalema, e tusa ma le tulafono a lou Atua ua i ou lima;

¹⁵e te avatua foi le ario ma le auro ua foai ma le loto e le tupu, ma alii e pule ua ia te ia, i le Atua o Isaraelu o le ua i ai i Ierusalema lona malumalu,

¹⁶atoa ma le ario uma ma le auro e te maua i le itu malo uma o Papelonia, ma mea ua foai ma le loto e le nuu, ma faitaulaga, o foai ma le loto mo le fale o lo latou Atua o i Ierusalema;

¹⁷ina ia matua faatau i nei tupe, o povi poa, o mamoe poa, o tamai mamoe, ma o latou taulaga i mea e ‘ai, ma o latou taulaga i mea e inu, ma fai taulaga a‘i i le fata faitaulaga o i le fale o lo outou Atua o i Ierusalema.

¹⁸O le mea foi e lelei ia te oe ma ou uso e fai i toe o ario ma auro, ia faia lea e tusa ma le finagalo o lo outou Atua.

¹⁹O ipu foi ua avatua ia te oe e auauna a‘i i le fale o lou Atua, ia e tuuina atu ai i luma o le Atua o Ierusalema.

²⁰O isi mea foi e aoga i le fale o lou Atua, e te manatu i ai e avatu, ia avatua nai le fale oloa o le tupu.

²¹O a‘u foi, o a‘u le tupu o Aretaseta, ua ou poloai atu i tausi oloa uma o i ona tala atu o le vaitafe, ia matua faia mea uma e fai atu ai ia te outou e Esera le faitaulaga, o le tusiupu o le tulafono a le Atua o le lagi,

²²e oo i le selau o taleni o ario, e oo foi i le selau o kori o saito, e oo foi i le selau o paita o uaina, e oo foi i le selau o paita o suāuu, ma masima ua le tusia sona fua.

²³O mea uma ua poloai mai ai e le Atua o le lagi, ia matua faia mo le fale o le Atua o le lagi; auā se a ea le mea e oo ai le toasa i le malo o le tupu ma ona atalii?

²⁴Ua matou faailoa atu foi ia te outou ia le au faitaulaga uma, ma sa Levi, o le au pepese, o le au leoleo faitotoa, o le au netini, ma le au faigaluega i lena fale o le Atua, aua ne‘i totogi atu ia te i latou ia faia taulaga, ma taulaga i mea eseese, ma taulaga o ala.

²⁵O oe foi Esera e, ia e tofia, e tusa ma le poto o lou Atua o ia te oe, o faamasino ma faatonu, latou te faatonuina atu i le nuu uma o i ona tala atu o le vaitafe, o i latou uma o e iloa le tulafono a lou Atua; o i latou foi o e le iloa, ia e a‘oa‘o atu ia te i latou.

²⁶Ai so latou na te le faia le tulafono a lou Atua, ma le tulafono a le tupu, ia matuā faasalaina o ia, po o le oti, po o le tafia, po o se totogi ia faia, pe ia noanoatia.

²⁷Ia faafetaia Ieova le Atua o tatou tamā, o le na tuuina mai lenei mea i le finagalo o le tupu, e faamatagofie ai le fale o Ieova o i Ierusalema;

²⁸ma na faaoo mai le alofa ia te au i luma o le tupu, ma ana faipule, ma luma foi o alii fitafita uma o le tupu. Na faamalosia foi a‘u e tusa ma le aao o Ieova lo‘u Atua na ia te au, ua ou faapotopotoina foi mai ia Isaraelu o alii matou te o ae ma a‘u.