Read Samoan Old Version Bible – O LE TUSI PAIA ESERA, 9 Bible Online

ESERA, 9 - Samoan Old Version Bible – O LE TUSI PAIA bible

ESERA, 9

¹Ua uma nei mea, ona o mai lea ia te au o alii, ua faapea mai, O le nuu o Isaraelu, ma le au faitaulaga, ma sa Levi, ua latou le vavaeina i latou ai tagata o nuu ese, a o loo fai e tusa ma a latou mea e inosia, o sa Kananā, o sa Heti, o sa Perisē, o sa Iepusē, o sa Amoni, o sa Moapi, o tagata Aikupito, ma sa Amori.

²Auā ua latou fai avā i o latou afafine, o i latou atoa ma o latou atalii, ma ua fefiloi le fanau paia ma tagata o ia nuu, ma ua solomua alii ma faipule i lenei agasala.

³Ua ou faalogo i lenei mea, ona ou saeia lea o lo‘u ofu ma lo‘u ofu talaloa, ma ou futi o‘u lauulu, ma la‘u ‘ava, ma ou nofo i lalo ua segia lo‘u mauli.

⁴Ona potopoto mai ai lea ia te au o i latou uma na matatau i afioga a le Atua o Isaraelu, ona o le agasala a le tafeaga; ua ou nofo foi ua segia lo‘u mauli, ua oo i le taulaga o le afiafi.

⁵Ua oo i le taulaga o le afiafi, ona ou tulai lea ai lo‘u tiga, ua saeia lo‘u ofu, ma lo‘u ofu talaloa, ma ua ou tootuli i o‘u tulivae, ma faaloaloa atu o‘u lima ia Ieova lo‘u Atua,

⁶ma ou faapea atu, Lo‘u Atua e, ua ou mā, ma ou masiasi i tepa ae o‘u mata ia te oe, lo‘u Atua e; auā ua tele lo matou leaga ua oo i luga o matou ulu, ma ua tupu tele la matou agasala ua oo lava i le lagi.

⁷Talu ona po o matou tama ua ia i matou le agasala tele ua oo i le aso nei; ona o lo matou leaga foi ua tuuina ai matou, o matou tupu, ma a matou faitaulaga, i lima o tupu o ia nuu, i le pelu, ia tafia, ma ia vetea, ma ia masiasi, e pei ona fai i le aso nei.

⁸A o nei ona po, e pei o se emo itiiti, ua ia te i matou le alofa mai ia Ieova lo matou Atua, ina ia faatoeina ia te i matou o e ua sao, ma ia tuuina mai ia te i matou se fao i lana mea paia, e faamalamalamaina ai o matou mata e lo matou Atua, e tuuina mai ai foi se olataga itiiti ina o fai i matou ma pologa.

⁹Auā o pologa i matou, a ua le tiaiina i matou e lo matou Atua ina o fai i matou ma pologa, a ua ia faaoo ia te i matou le alofa i luma o tupu o Peresia, ia tuuina mai ia te i matou le olataga, ia faatuina le fale o lo matou Atua, ma ia teuteuina mea o i ai ua lepetia, ma ia tuuina mai ia te i matou le pa i Iuta ma Ierusalema.

¹⁰O lenei, lo matou Atua e, se a ea la matou e fai atu ai ina ua e faia na mea? Auā ua tuua e i matou au poloaiga,

¹¹na e poloai mai ai i au auauna le au perofeta, ua faapea mai, O le nuu tou te o i ai e fai mo outou o le nuu lea ua leaga i le leaga o tagata o ia nuu, i a latou mea e inosia ua tutumu ai i lea itu ma lea itu i lo latou leaga.

¹²O lenei, aua tou te avatua o outou afafine i o latou atalii, aua foi tou te aumaia o latou afafine ma o outou atalii, aua foi tou te sailia e faavavau se mea e filemu ai i latou pe manuia ai i latou; ina ia malolosi ai outou, ma ia outou aai ai i mea lelei o i le laueleele, ma fai ai mo outou atalii e faavavau.

¹³Ua uma ona oo mai o nei mea uma ia te i matou ona o a matou amio leaga, ma la matou agasala tele, auā o oe lo matou Atua e, ua e laveai mai, ua le faia e tusa ma lo matou leaga, ma ua e faasaoina i matou faapenei;

¹⁴a toe solia e i matou au poloaiga, ma feavāgai ma tagata e fai ia mea e inosia, e te le toasa mai ai ea ia te i matou seia faaumatia i matou, ina ia leai ni e totoe pe faasaoina?

¹⁵Ieova e, le Atua o Isaraelu, o oe o le amiotonu; auā ua faatotoeina i matou, ua faasaoina, e pei ona fai i le aso nei; faauta, o i ou luma i matou ma a matou agasala; auā e le mafai ona tutu i matou i ou luma ona o lenei mea.