Read Samoan Old Version Bible – O LE TUSI PAIA NEEMIA, 1 Bible Online

NEEMIA, 1 - Samoan Old Version Bible – O LE TUSI PAIA bible

NEEMIA, 1

¹O upu a Neemia le atalii o Hakalia. O le lua o sefulu o tausaga, o le masina o Kiselu, na ou i Susana i le maota,

²ona oo mai lea o Hanani, o le tasi o o‘u uso, o ia ma nisi tagata mai Iuta; ona ou fesili atu ai lea ia te i latou pe faapefea sa Iutā na sao o e na totoe o le tafeaga, i le ma Ierusalema.

³Ona faapea mai lea o i latou ia te au, O e totoe o e na totoe o le tafeaga o i ai i le itu malo, ua tele le puapuaga ma le gaogaoina o i latou; ua soloia foi le pa o Ierusalema, ma ua mu ona puipui i le afi.

⁴Ua ou faalogo i ia upu, ona ou nofo ai lea i lalo, ma ou tagi, ma faanoanoa i nisi aso, ma anapogi, ma tatalo i luma o le Atua o le lagi,

⁵ma ou faapea atu, Ieova e, le Atua o le lagi, ou te aioi atu ia te oe, o le Atua silisili ma le matautia, o le tausia le feagaiga ma le alofa ia te i latou o e alofa atu ia te ia, ma tausi i ana poloaiga;

⁶ia e faafofoga mai, ma ia silasila mai ou fofoga, ina ia e faafofoga i le tatalo a lau auauna, ou te tatalo atu ai nei i ou luma i le ao ma le po mo le fanauga a Isaraelu o au auauna, ma ta‘u atu i agasala a le fanauga a Isaraelu, ua matou agasala ai ia te oe; ua agasala foi a‘u atoa ma le aiga o lo‘u tamā.

⁷Ua matou agaleaga lava ia te oe, ma ua matou le tausi poloaiga, ma tulafono, ma faamasinoga, na e poloai mai ai ia Mose lau auauna.

⁸Ou te aioi atu ia te oe, ia e manatua le afioga na e poloai mai ai ia Mose lau auauna, ua faapea mai, A outou agasala, ou te faataapeapeina outou i nuu.

⁹A e afai tou te liliu mai ia te au, ma tausi a‘u poloaiga, ma outou faia, e ui lava ina tulia outou i le tuluiga o le lagi, ou te faapotopoto mai ai ia te i latou, ma aumaia i latou i le mea ua filifilia e a‘u e tuu ai lo‘u igoa.

¹⁰O lenei, o au auauna ia ma lou nuu, ua e faaolaina i lou mana tele, ma lou aao malosi.

¹¹Le Alii e, ou te aioi atu ia te oe, ia e faafofoga mai i le tatalo a a‘u lau auauna, ma tatalo a au auauna, o e fia matatau i lou suafa; ma ia e faamanuia lava i lau auauna i le aso nei, ma ia e tuu mai ia te au, ia alofaina i luma o lenei tagata. Auā sa fai a‘u ma tautu uaina i le tupu.