Read Samoan Old Version Bible – O LE TUSI PAIA NEEMIA, 3 Bible Online

NEEMIA, 3 - Samoan Old Version Bible – O LE TUSI PAIA bible

NEEMIA, 3

¹Ona tutū lea i luga o Eliasipa le faitaulaga sili, ma ona uso o faitaulaga, ma ua latou faia le faitotoa mamoe; ua latou faapaia i ai, ua latou faatuina foi ona puipui; e oo i le ‘olo o Meaa ua latou faapaia i ai, e oo atu i le ‘olo o Hananiali.

²Na ati e aupito ane ia te ia o tagata o Ieriko. Na ati e aupito ane ia te i latou o Sakuro le atalii o Imeru.

³A o le faitotoa o i‘a na faia lea e le fanauga a Hasenaa, ua latou faatatauina ona laau, ma ua latou faatuina ona puipui, o ona faamau, ma ona faamaufaalava.

⁴Ua ati e aupito ane ia te i latou o Meremota le atalii o Uria, o le atalii ia o Kosa. Ua ati e aupito ane ia te i latou o Mesulama le atalii o Perekia, o le atalii ia o Mesesapelu. Ua ati e aupito ane ia te i latou o Satoka le atalii o Paana.

⁵Ua ati e aupito ane ia te i latou o tagata o Tikoa; a o latou alii, ua latou le fesoasoani i le galuega a lo latou Alii.

⁶Ua fai e Ioata le atalii o Pasea, ma Mesulama le atalii o Pesotia le faitotoa tuai; na la faatatauina ona laau, ma ua la faatuina ona puipui, ma ona faamau, ma ona faamaufaalava.

⁷Ua ati e aupito ane ia te i laua o Melatia le Kipeona, ma Iatonu le Marono, o tagata o Kipeona ma ē o Mesepa, ua oo i le nofōalii o le alii e pule i ona tala mai o le vaitafe.

⁸Ua ati e aupito ane ia te ia o Usialu le atalii o Haraia, o lo le au tufuga fai mea auro. Ua ati e aupito ane ia te ia o Hanania le atalii o le tasi o le au fai mea manogi; na tuua foi e i latou o Ierusalema ua oo i le pa lautele.

⁹Ua ati e aupito ane ia te i latou o Refaia le atalii o Huro, o le alii e pule i le tasi itu o Ierusalema.

¹⁰Ua ati e aupito ane ia te i latou o Ietaia le atalii o Harumapu, i luma foi o lona fale. Ua ati e aupito ane ia te ia o Hatusa le atalii o Hasapenia.

¹¹Ua toe ati e Malekia le atalii o Harima, ma Hasupo le atalii o Paka-moapi le tasi ogapa, ma le ‘olo o ogaumu.

¹²Ua ati e aupito ane ia te ia o Saluma le atalii o Halokesu, o le alii e pule i le tasi itu o Ierusalema, o ia ma ona afafine.

¹³Ua faia e Anuni ma tagata Sanoa le faitotoa o le vanu, ua latou fai ai, ma faatuina ona puipui, ma ona faamau, ma ona faamaufaalava, o le afe foi o kupita i le pa, ua oo i le faitotoa o le otaota.

¹⁴Ua faia le faitotoa o le otaota e Malekia le atalii o Rakapa, o le alii e pule i le tasi pito nuu o Peteakarema; na ia fai ai, ma faatuina ona puipui, o ona faamau, ma ona faamaufaalava.

¹⁵Ua toe faia le faitotoa o le vaipuna e Saluna le atalii o Kolukose, o le alii e pule i le tasi pito nuu o Mesepa; na ia faia, ma ufiufi ai, ma faatuina ona puipui, o ona faamau, ma ona faamaufaalava, ma le pa o le vailepa o Seloa i tala ane o le faatoaga o le tupu, ua oo foi i le ala faaapefai e ui ifo ai mai le aai o Tavita.

¹⁶E aupito ane ia te ia ua ati e Neemia le atalii o Asepuka, o le alii e pule i le tasi itu o Petesura, e oo i luma o tuugamau o Tavita, mai le vailepa na faia, e oo foi i le fale o e malolosi.

¹⁷E aupito ane ia te ia ua ati e sa Levī, o Rekumu le atalii o Pani. Ua ati e aupito ane ia te ia o Hasapea, o le alii e pule i le tasi itu o Kaila, i lona pito nuu.

¹⁸E aupito ane ia te ia ua ati e o latou uso, o Pavai le atalii o Henatati, o le alii e pule i le tasi itu o Kaila.

¹⁹Ua ati e aupito ane ia te ia o Esera le atalii o Iosua, o le alii e pule i Mesepa, o le tasi ogapa i luma o le mea e alu a‘e ai i le fale o le auupega i le tulimanu.

²⁰E aupito ane ia te ia ua ati ma le faamalosi e Paruka le atalii o Sapai, o le tasi ogapa, e afua i le tulimanu ua oo i le faitotoa o le fale o Eliasipa le faitaulaga sili.

²¹E aupito ane ia te ia ua ati e Meremota le atalii o Uria le atalii o Kosa, o le tasi ogapa, e afua i le faitotoa o le fale o Eliasipa ua oo i le mea e gata mai ai le fale o Eliasipa.

²²E aupito ane ia te ia ua ati e le au faitaulaga, o tagata o le fanua laugatasi.

²³E aupito ane ia te i latou ua ati e Peniamina ma Hasupo i luma o lo la fale. E aupito ane ia te ia ua ati e Asaria le atalii o Maaseia o le atalii ia o Anania i ona tafāfale.

²⁴E aupito ane ia te ia ua ati e Penui le atalii o Henatati o le tasi ogapa, e afua i le fale o Asaria ua oo i le gauaiga o le pa, ua oo foi i le tulimanu.

²⁵Ua ati e Palala le atalii o Usai i luma o le gauaiga o le pa, ma le ‘olo ua sili atu i le fale maualuga o le tupu e lata ane i le lotoā o le fale puipui. E aupito ane ia te ia o Petaia le atalii o Parose.

²⁶Sa nonofo foi le au netini i Ofele, e oo i luma o le faitotoa o le vai i gagae, ma le ‘olo ua sili atu.

²⁷E aupito ane i ai ua ati e tagata Tikoa o le tasi ogapa, e afua i luma o le ‘olo tele ua sili atu, ua oo foi i le pa o Ofele.

²⁸Ua ati e le au faitaulaga na fua mai i luga o le faitotoa o solofanua, taitoatasi i lona lumāfale.

²⁹E aupito ane ia te i latou ua ati e Satoka le atalii o Imere i lona lumāfale. E aupito ane foi ia te ia ua ati e Semaia le atalii o Sekania, o le leoleo o le faitotoa i gagae.

³⁰E aupito ane ia te ia ua ati e Hanania le atalii o Selemia, ma Anuni o lona toaono o atalii o Salafa, o le tasi ogapa. E aupito ane ia te ia ua ati e Mesulama le atalii o Perekia i luma o lona potu.

³¹E aupito ane ia te ia ua ati e Malekia le atalii o le tufuga fai mea auro e oo i le fale o le au netini, ma tagata faatau, i luma o le faitotoa o Mefekato, e oo foi i le afeafe aupitoaluga o le tulimanu.

³²Ua ati e tufuga fai mea auro ma tagata faatau i le va o le afeafe aupitoaluga o le tulimanu e oo i le faitotoa o mamoe.