Read Samoan Old Version Bible – O LE TUSI PAIA NEEMIA, 5 Bible Online

NEEMIA, 5 - Samoan Old Version Bible – O LE TUSI PAIA bible

NEEMIA, 5

¹Sa tele le alalaga o le nuu ma a latou avā i o latou uso o sa Iuta.

²Auā sa i ai o e ua faapea mai, O matou atalii, ma o matou afafine, ua matou toatele; o le mea lea ua matou avae ai saito, ia matou aai, ma ola ai.

³Sa i ai foi nisi o e na faapea mai, Ua tuufaafaatau e i matou o matou fanua, ma o matou tovine, ma o matou fale, e maua ai saito, auā o le oge.

⁴Sa i ai foi nisi o e na fai mai, Ua matou aitalafu tupe e fai ma taulaga i le tupu, ua tuufaafaatau ai o matou fanua ma o matou tovine.

⁵A o lenei, e tusa o matou tino ma tino o matou uso, e tusa a matou fanau ma a latou fanau; faauta foi, ua matou faapologa i o matou atalii ma o matou afafine a fai ma pologa; o loo nofo pologa nei lava nisi o matou afafine; matou te le mafaia ona toe faatau mai ia te i latou; auā o matou fanua ma o matou tovine ua fai mo tagata ese.

⁶Ona ou matuā ita lava lea ina ua ou faalogo i lo latou alaga, ma ia upu.

⁷Ona ou filifili ifo ai lea i lo‘u loto, ma ou finau atu i alii ma faipule, ma ou faapea atu ia te i latou, Ua outou talia taui faasili taitoatasi i lona uso. Ona ou tala‘iina lea o le faapotopotoga tele ona o i latou.

⁸Ona ou fai atu lea ia te i latou, Ua matou faatauina mai o tatou uso o sa Iutā, sa faatauina atu i nuu ese, e tusa ma mea na ia te i matou; a o outou tou te faatauina atu ea o outou uso? pe faatauina mai ea o i latou ia te i tatou? Ona latou faalologo lea, ua le mau tali lava.

⁹Ua ou fai atu foi, E le tatau le mea ua outou faia; tou te le savavali ea ma le mata‘u i lo tatou Atua ona o le faaluma mai o nuu ese ua ita mai ia te i tatou?

¹⁰O a‘u foi, ma o‘u uso, ma a‘u auauna, matou te mafaia ona fai faafaatau ia te i latou o tupe, ma saito; se‘i tatou tuu ia lena taui faasili.

¹¹Se‘i outou toe tuu atu ia ia te i latou i lenei lava aso o latou fanua, o latou tovine, o latou toolive, ma o latou fale, ma le taitasi i selau tupe, ma le saito, ma le uaina, ma le uu, ua outou fai faafaatau ia te i latou.

¹²Ona fai mai lea o i latou, Matou te toe tuuina atu lava, matou te le toe saili atu se mea ia te i latou; e pei ona e fetalai mai, e faapea ona matou faia. Ona ou valaau atu lea i le au faitaulaga, ma ou fai atu ia tauto i latou, ia latou fai e tusa ma lenei upu.

¹³Ua ou lulu foi le fatafata o lo‘u ofu, ma ou fai atu, Ia faapea ona luluina e le Atua tagata uma o e le faataunuuina lenei upu, ai lona fale ma lana galuega, ia faapea lava ona luluina ma faamativaina o ia. Ona fai mai lea o le faapotopotoga uma, Amene; ma latou vivii atu ia Ieova. Ua fai foi e le nuu e tusa ma lenei upu.

¹⁴Talu lava le aso na tofia ai a‘u e fai ma alii e pule i le nuu o Iuta, e afua i le tausaga e luafulu ua oo lava i le tausaga e tolugafulu ma le lua o Aretaseta le tupu, o tausaga e sefulu ma le lua ia, ua matou le aai, o a‘u ma ou uso, i le mea e ‘ai a le alii e pule.

¹⁵A o alii na muai pule o e na muamua ia te au, na mafatia le nuu ia i latou, ma ua latou talia mai ia te i latou o areto ma uaina, atoa ma sekeli ario e fagafulu; o a latou lava auauna foi na latou pule i le nuu; a o a‘u, ou te lei faia faapea, ona o le mata‘u i le Atua.

¹⁶Ua ou faamalosi foi i le galuega o lenei pa, matou te lei faatau foi ni fanua; na faapotopotoina ai foi i le galuega o a‘u auauna uma lava.

¹⁷Sa aai foi i la‘u laulau o sa Iutā ma faipule e toaselau ma le toalimagafulu o tagata, i le ma i latou na o mai ia te i matou ai nuu ese e vagavagai ia i matou.

¹⁸O mea foi nei na saunia i lea aso ma lea aso mo le povi e tasi ma mamoe lelei e ono; na saunia foi ma a‘u o manu felelei; e taipoagafulu foi ma uaina eseese uma e tele; e ui foi i lea ou te lei fai atu ia aumaia le mea e ‘ai a le alii e pule, auā sa mamafa le galuega i lenei nuu.

¹⁹Lo‘u Atua e, ia e manatua mai a‘u ia ou manuia ai, e tusa ma mea uma ua ou faia i lenei nuu.