Read Samoan Old Version Bible – O LE TUSI PAIA NEEMIA, 6 Bible Online

NEEMIA, 6 - Samoan Old Version Bible – O LE TUSI PAIA bible

NEEMIA, 6

¹Ua faalogo Sanepalata, ma Tovia, ma Gesemu le Arapi, atoa ma i latou uma e na ita mai ia te i matou, ua atia e a‘u le pa, ma ua le toe i ai se mea o solo; (a ona po ia na ou le faatuina ai puipui i faitotoa;)

²ona sau lea ia te au o le feau a Sanepalata ma Gesemu, ua faapea mai, Sau ia, ina tatou fetaiai i aai i le fanua laugatasi o Ono. A ua latou manatu e fai se mea leaga ia te au.

³Ona ou auina atu lea o le sāvali ia te i latou, ua faapea atu, O loo faia e a‘u le galuega tele, ou te le mafai ai ona alu ifo. Se a le mea e tuua ai le galuega i lo‘u tuulafoai ma alu ifo ia te outou?

⁴A ua foi faafa mai la la feau faapena ia te au; ua faapena foi ona ou tali atu ia te i latou.

⁵Ona auina mai lea e Sanepalata o lana auauna ia te au i le feau faapena lava, o le atu lima lea; ua i lona lima foi le tusi e lei faamauina.

⁶Ua tusia ai, Ua logoa mai i nuu, ua fai mai ai foi Gesemu, ua e manatu oe ma sa Iutā e fou; o le mea lea ua e ati ai le pa, ia fai oe ma tupu ia te i latou e tusa ma nei upu.

⁷Ua tofia foi e oe o perofeta e tala‘iina oe i Ierusalema, o loo faapea atu, O loo fai le tupu o Iuta; o le a logo atu i le tupu e tusa ma ia upu. O lenei, ina sau ia oe, ma ia ta filifili faatasi.

⁸Ona alu atu lea la‘u feau ia te ia, ua faapea atu, E leai ni mea ua faia e pei o ia mea ua e fai mai ai, a ua e fatu fua ai i lou lava loto.

⁹Auā na faamatau i latou uma ia te i matou, ua faapea ane, E faavaivaia o latou lima i le galuega, ia le faia. O lenei, le Atua e, ia e faamalosi mai o‘u lima.

¹⁰Ona ou alu atu lea i le fale o Semaia le atalii o Talaia, le atalii ia o Meatapala, sa puipuia foi o ia; ona fai mai lea o ia ia te au, Ia ta o faatasi i le fale o le Atua i totonu o le malumalu, ma pupuni faitotoa o le malumalu; auā latou te o mai e fasioti ia te oe; latou te o po mai lava e fasioti ia te oe.

¹¹Ona ou fai atu lea, E sola ea le tagata e pei o a‘u? O ai ea e pei o a‘u e alu i le malumalu ia ola ai o ia?

¹²Ou te le alu lava. Faauta foi, na ou iloa e lei auina mai o ia e le Atua; a ua fai mai e ia lenei valoaga ia leaga ai a‘u; auā na faaoloaina lava ia e Tovia ma Sanepalata.

¹³O le mea lea na faaoloaina ai o ia, ina ia ou mata‘u, ma ia ou faapea ona fai, ou te agasala ai, ia maua e i latou se mea e fai ma tala leaga ina ia ta‘uleagaina ai a‘u.

¹⁴Lo‘u Atua e, ia e manatu ia Tovia ma Sanepalata e tusa ma ia mea ua la faia, atoa foi ma le perofeta fafine o Noataia, ma isi perofeta o e na taufaamatau mai ia te au.

¹⁵Ua faauma foi le pa i le aso e luafulu ma le lima o le masina o Elula; na faia i aso e limagafulu ma le lua.

¹⁶Ua faalogo i latou uma e na ita mai ia te i matou, ma ua iloa e nuu uma na vagavagai ia te i matou, ona matuā faavaivai lea o i latou; auā ua latou iloa o lo tatou Atua na fai ai lena galuega.

¹⁷O na ona aso foi ua aveina atu ai e alii o Iuta tusi e tele ia Tovia, ua oo mai foi tusi a Tovia ia te i latou.

¹⁸Auā e toatele i Iuta ua tauto ia te ia, auā o le tane ia o le afafine o Sekania o le atalii o Araka; na fai avā foi lona atalii o Ioanana i le afafine o Mesulama le atalii o Perekia.

¹⁹Ua latou talatala mai foi lona agalelei i o‘u luma, ua ta‘u atu foi a‘u upu ia te ia. Ua au mai foi e Tovia o tusi e faamatau mai ia te au.