Read Samoan Old Version Bible – O LE TUSI PAIA ESETA, 1 Bible Online

ESETA, 1 - Samoan Old Version Bible – O LE TUSI PAIA bible

ESETA, 1

¹O ona po o Asueru, o Asueru lea o le na fai ma tupu e gata mai i Initia e oo atu i Aitiope, i itu malo e tasi le selau e lua sefulu ma le fitu;

²o ona po ia, ina o nofo le tupu o Asueru i le nofoālii o lona malo, sa i ai i Susana le maota,

³o le tolu o tausaga o lana nofoaiga na ia fai ai le tausamiga mā alii uma ua ia te ia ma ana auauna; o e ua sili o Peresia ma Metai, o alii ma alii o itu malo, na i ona luma;

⁴ina o faaaliatua le sosia o lona malo mamalu, ma le silisili o le matagofie o lona malualii, i aso e tele, o aso e selau ma le valu sefulu.

⁵Ua atoatoa ia aso, ona fai ai lea e le tupu o le tausamiga mā tagata uma na i Susana le maota, o alii atoa ma tagata nuu, i aso e fitu, i le lotoā o le fanua o le maota o le tupu.

⁶Na tautau ai ie lino sinasina; o ie lelei ma ie uli, na faamauina i maea vavae ma le pāuli i mama ario ma pou sesa; na i ai moega auro ma ario i luga o le paepae o paata, ma sesa, ma tara, ma sokere.

⁷Na avatu ipu auro latou te feinu ai, o ipu e tino eseese, ma uaina a le tupu e tele, e pei ona tatau i le tupu.

⁸Na faatatau foi i le tulafono ona inu; ua leai se na faatauanau atu i se tasi; auā sa faapea ona poloai e le tupu i e pule uma i lona aiga, ia taitasi le tagata ma lana faitalia.

⁹O Vasati foi le masiofo, na ia faia le tausamiga mā fafine i le fale o le tupu, o le fale lea o le tupu o Asueru.

¹⁰O le aso e fitu ina o fiafia le loto o le tupu i le uaina, na ia fai atu ai ia Meumanu, ma Piseta, ma Harepona, ma Pigeta, ma Avageta, o Setara ma Karekase, o eunuka ia e toafitu e na auauna atu i luma o le tupu o Asueru,

¹¹ia au mai le masiofo o Vasati i luma o le tupu, ma le palealii o le masiofo, ina ia faaali atu lona lalelei i le nuu ma alii; auā e lalelei lava o ia.

¹²A e lei mafai le masiofo o Vasati ona alu ane i le feau a le tupu na o atu ai eunuka; ona matuā ita ai lea o le tupu, na tupu tele lava le tiga o lona loto.

¹³Ona fai atu lea o le tupu i e popoto, e na iloa tausaga; (auā na faapea le masani a le tupu ia te i latou uma na iloa tulafono ma faamasinoga;

¹⁴na latalata ane ia te ia o Karesena, o Setaru, o Atematu, o Tasesa, o Merese, o Maresena, o Memukana, o alii ia e toafitu o Peresia ma Metai o e na iloa fofoga o le tupu, e na sili i le malo;)

¹⁵Se a se mea e faia i le masiofo o Vasati, e tusa ma le tulafono, ina ua le mafai o ia i le upu a le tupu o Asueru na o atu ai eunuka?

¹⁶Ona tali mai lea o Memukana i luma o le tupu ma alii, E le na o le tupu na aga faapiopio i ai le masiofo o Vasati, a e atoa ma alii uma ma tagata uma o i itu malo uma o le tupu o Asueru;

¹⁷auā e oo atu le tala i le masiofo i fafine uma ona inosia ai lea e i latou o a latou tane, pe a latou ta‘u ane, Na poloai atu le tupu o Asueru ia au mai i ona luma le masiofo o Vasati, a e lei alu ane o ia.

¹⁸O tamaitai foi o Peresia ma Metai e ua faalogo i le tala i le masiofo, e fai atu ai i latou i le aso nei i alii uma ua i le tupu, ona tele ai lea o le ‘ino‘ino ma le feitagai.

¹⁹Afai e lelei i le tupu, ia oo atu lana afioga mai ia te ia lava, ma ia tusia faatasi ma tulafono a Peresia ma Metai, e le toe tālaina, aua le toe oo mai o Vasati i luma o le tupu o Asueru; a ia fai se masiofo a le tupu e sui ai o ia, o se tasi e sili ona lelei ia te ia.

²⁰A logo atu foi le pule a le tupu, na te faia, i lona malo uma, auā ua tele lea, ona faaaloalo ai lea o fafine uma i a latou tane, o alii atoa ma tagatā nuu.

²¹Ua lelei foi lena upu i le manatu o le tupu ma alii; ona faia lea e le tupu e pei ona fai atu ai Memukana.

²²Ua ia avatu tusi i itu malo uma o le tupu, ua faatatau ma le tusilima a lea itu malo ma lea itu malo, e tusa foi ma le gagana a lea nuu ma lea nuu, ina ia taitoatasi le tane ma pule i lona aiga, ma ia tautala i le gagana a lona nuu.