Read Samoan Old Version Bible – O LE TUSI PAIA ESETA, 4 Bible Online

ESETA, 4 - Samoan Old Version Bible – O LE TUSI PAIA bible

ESETA, 4

¹Ua iloa e Moretekai mea uma ua faia, ona saei ai lea e Moretekai ona ofu, ma ua ofu o ia i le ie talatala ma le lefulefu, ma alu atu i totonu o le aai, ma alaga i le alaga tele ma ua lotulotu.

²Ua alu atu lava o ia i luma o le faitotoa o le tupu, auā ua sa ona ulu atu i le faitotoa o le tupu a o ofu i le ie talatala.

³O lea itu malo foi ma lea itu malo uma na oo i ai le upu a le tupu ma lana tulafono, ua faanoanoa tele ai sa Iutā, ma ua anapogi, ma fetagisi, ma tagitu‘i; ua fofola foi e le toatele o latou moega i ie talatala ma le lefulefu.

⁴Ona o atu lea o le galu teine o Eseta ma ana eunuka, ma latou ta‘u atu ai ia te ia. Ona matuā tiga ai lea o le masiofo; ua ia avatu foi ofu e ofu ai Moretekai, ma ia ave ese lona ie talatala ia te ia; a e lei talia e ia.

⁵Ona valaau atu lea e Eseta ia Hatako, o le tasi eunuka a le tupu, le na ia tofia mo ia, ma na tuuina atu ia te ia le feau ia Moretekai ia iloa pe se a lena? Ona o le a foi?

⁶Ona alu atu ai lea o Hatako ia Moretekai i le malae o le aai sa i luma o le faitotoa o le tupu.

⁷Ona faailoa mai lea e Moretekai ia te ia o mea uma ua oo ia te ia, ma le tala tonu i le ario na fai atu ai Hamanu na te fuaina atu i mea e teu ai oloa a le tupu ona o sa Iutā, ina ia fano i latou.

⁸Na ia aumaia foi ia te ia le ata o le tusi o le tulafono na avatua mai Susana ia faaumatia i latou, ina ia faaali atu ai ia Eseta, ma ta‘u atu ia te ia, ma fai atu ia te ia ia alu atu o ia i le tupu, e aioi atu ia te ia, ma faatoga atu ia te ia mo lona nuu.

⁹Ona sau lea o Hatako, ma ta‘u mai ia Eseta upu a Moretekai.

¹⁰Ona tali atu lea o Eseta ia Hatako, ma na tuuina atu ia te ia le feau ia Moretekai,

¹¹ua faapea, Ua iloa e auauna uma a le tupu, ma tagata o itu malo o le tupu, ai se tane po o se fafine e alu atu i le tupu i le lotoā i totonu, a o lei amia, e tasi lana tulafono, e oti o ia; ua na o le e faaloaloa mai i ai e le tupu le tootoo auro e ola ai o ia. O a‘u foi, ua le amia a‘u e alu i le tupu i aso ia e tolu sefulu.

¹²Ona latou ta‘u atu lea ia Moretekai o upu a Eseta.

¹³Ona fai mai lea o Moretekai ia tali atu ia Eseta, Ne‘i e manatu i lou loto, ina ua e i ai i le aiga o le tupu, e faasaoina ai oe ai sa Iutā uma.

¹⁴Auā afai e te matuā faalologo i nei ona po, e tupu mai le tuusaunoaina ma le laveaiina o sa Iutā mai se tasi mea; a o oe, ma le aiga o lou tamā e fano outou; e iloa foi e ai po ua fai oe ma masiofo ona o se aso faapenei?

¹⁵Ona fai atu lea o Eseta, ia tali atu ia Moretekai,

¹⁶Alu ia oe, ia e faapotopoto i sa Iutā uma e o i ai i Susana, ma ia anapopogi outou ona o a‘u, aua foi ne‘i outou aai, aua foi le inu i aso e tolu i le po ma le ao; o a‘u foi, ma lo‘u galu teine matou te anapopogi faapenā; e faapena foi ona ou alu atu ai i le tupu o le mea e le tusa ma le tulafono; afai ou te oti ai, oti ai pea ia.

¹⁷Ona alu ai lea o Moretekai, ma na faia o mea uma e pei ona poloai atu ai e Eseta ia te ia.