Read Samoan Old Version Bible – O LE TUSI PAIA ESETA, 6 Bible Online

ESETA, 6 - Samoan Old Version Bible – O LE TUSI PAIA bible

ESETA, 6

¹O lena lava po na le iloa ai e le tupu sina moe. Ona fai atu lea o le tupu e au mai le tusi e faamanatu a‘i tala i nofoaiga. Ona faitaulia ai lea i luma o le tupu.

²Ona iloa lea ua tusia le mea na ta‘u atu e Moretekai ia Piketano ma Terese, o eunuka ia e toalua a le tupu, e na leoleo i le faitotoa, o e na fia faaoo o la lima i le tupu o Asueru.

³Ona fai atu lea o le tupu, Pe se a se mea lelei ma se mamalu ua faia mo Moretekai ona o lenei mea? Ona tali mai lea o auauna a le tupu o e na auauna atu ia te ia, E leai se mea ua faia mo ia.

⁴Ona fai atu lea o le tupu, O ai ea ua i le lotoā? Auā ua alu ane Hamanu i le lotoā? Auā ua alu ane Hamanu i le lotoā i fafo o le fale o le tupu e fai atu ai i le tupu ia faatautauina Moretekai i le laau ua ia saunia mo ia.

⁵Ona tali mai lea o auauna a le tupu ia te ia, Faauta, o loo tu mai Hamanu i le lotoā. Ona fai atu lea o le tupu, Ina sau ia o ia.

⁶Ua ulufale mai Hamanu, ona fai atu lea o le tupu ia te ia Se a se mea e faia i le tagata ua loto i ai le tupu ona ia faaneeneeina o ia? Ona faapea ifo lea o Hamanu i lona loto, Po o ai se isi e finagalo le tupu ona faaneeneeina o ia, na o a‘u lava?

⁷Ona tali mai lea o Hamanu i le tupu, O le tagata ua finagalo i ai le tupu ona faaneeneeina o ia,

⁸ia aumaia le ofu o le tupu e ofu ai le tupu, ma le solofanua e tietie ai le tupu, ma le palealii o le tupu e tuuina i lona ao;

⁹ia tuuina atu lena ofu ma lena solofanua i se tasi alii o alii sili ua i le tupu, ma ia latou faaofu ai le tagata ua finagalo i ai le tupu ona ia faaneeneeina o ia; ia latou faatietie foi ia te ia i le solofanua i le malae o le aai, ma ia latou alalaga i ona luma, E faapea ona faia i le tagata ua finagalo i ai le tupu ona ia faaneeneeina o ia.

¹⁰Ona fai atu lea o le tupu ia Hamanu, Ina vave ia, ia e ave le ofu ma le solofanua, e pei ona e fai mai na, ia e fai faapea ia Moretekai o lo sa Iutā, o le nofo i le faitotoa o le tupu, aua le tuua se mea e tasi i mea uma ua e fai mai na.

¹¹Ona ave lea e Hamanu o le ofu ma le solofanua, ma na faaofu ia Moretekai, na ia faatietie foi ia te ia i le solofanua i le malae o le aai, ma alaga i ona luma, E faapea ona faia i le tagata ua finagalo i ai le tupu ona faaneeneeina o ia.

¹²Ona foi atu lea o Moretekai i le faitotoa o le tupu; a ua faataalise atu Hamanu i lona fale ma le faanoanoa, ma ua ufiufi lona ulu.

¹³Ona faamatalaina atu lea e Hamanu ia Seresa lana avā ma ana uo uma, o mea uma ua oo ia te ia. Ona fai atu ai lea ia te ia o ona tagata popoto ma Seresa lana avā, Afai o so le fanau a sa Iutā o Moretekai, le ua e amata ai ona paū i ona luma, e te le manumalo ia te ia, a e matuā paū lava oe i ona luma.

¹⁴Ona oo mai lea o eunuka a le tupu, a o tautalatala i latou ma Hamanu, ma latou nanati ia te ia, ia alu i le taumafataga ua saunia e Eseta.