Read Samoan Old Version Bible – O LE TUSI PAIA ESETA, 7 Bible Online

ESETA, 7 - Samoan Old Version Bible – O LE TUSI PAIA bible

ESETA, 7

¹Ua o atu le tupu ma Hamanu e taumamafa faatasi ma le masiofo o Eseta.

²Ona fai atu ai lea o le tupu ia Eseta i lena aso e lua ao fai le taumafataga o le uaina, Le masiofo e, Eseta, se a le mea e te ole mai ai? E avatua lava ia te oe; pe se a foi le mea e te faatoga mai ai? E oo lava i le vaeluaina o le malo e faia lava.

³Ona tali mai lea e le masiofo o Eseta, ua faapea mai, Le tupu e, afai ua alofaina a‘u e oe, afai e lelei foi i le tupu, se‘i e faaola mai ia te au i lo‘u ole atu, ia faaola foi lo‘u nuu i lo‘u faatoga atu;

⁴auā ua faatauina i matou, o a‘u ma lo‘u nuu, ina ia faaumatia, ma ia fasiotia, ma ia fano. A e afai ana faatauina atu i matou o tane ma fafine e fai ma pologa e ui ina le mafai i le ua ita mai ona faia o se mea e tusa ona aoga ma mea a le tupu a faamaumauina, a ua ou faalologo.

⁵Ona fai atu lea o le tupu o Asueru, ua faapea atu i le masiofo o Eseta, Po o ai lena? Po o fea o iai le ua manatu i lona loto ia faia faapena?

⁶Ona fai mai lea o Eseta, O le tagata ua ita mai ma faasaua mai, o lenei tagata amio leaga o Hamanu. Ona mata‘u tele ai lea o Hamanu i luma o le tupu ma le masiofo.

⁷Ona tulai lea o le tupu nai le taumafataga o le uaina ua ita, ua alu i le fanua o le maota. Ona tulai lea o Hamanu e aioi i le masiofo o Eseta, ia faaolaina o ia; auā ua ia iloa ua tonu i le tupu e faaoo ia te ia se leaga.

⁸Ua foi atu le tupu mai le fanua o le maota i le fale na fai ai le taumafataga o le uaina, ua paū foi Hamanu i le moega o i ai Eseta; ona fai ane lea o le tupu, Pe a toso ea foi le masiofo i o‘u luma i le fale? Ua mavae atu le upu i le fofoga o le tupu, ona latou ufitia lea mata o Hamanu.

⁹Ua fai ane foi i luma o le tupu e Harepono, o le tasi eunuka ia, Faauta foi i le laau na saunia e Hamanu mo Moretekai o le na ta‘u le mea e sao ai le tupu, o loo tu i le fale o Hamanu, e limagafulu kupita lona maualuga. Ona fai atu lea e le tupu, Ia outou faatautau ia te ia i ai.

¹⁰Ona latou faatautau ai lea ia Hamanu i le laau na ia saunia mo Moretekai. Ona maona ai lea o le ita o le tupu.