Read Samoan Old Version Bible – O LE TUSI PAIA ESETA, 8 Bible Online

ESETA, 8 - Samoan Old Version Bible – O LE TUSI PAIA bible

ESETA, 8

¹O lena lava aso na foaiina atu ai e le tupu o Asueru mo le masiofo o Eseta, le fale o Hamanu o le na ita i sa Iutā. Ua alu atu foi Moretekai i luma o le tupu, auā ua ta‘u atu e Eseta la te aiga.

²Ona to ese ai lea e le tupu o lana mama ua ia aveeseina ia Hamanu, ma na tuuina atu ai ia Moretekai. Ua tofia foi Moretekai e Eseta e pule i le fale o Hamanu.

³Ona toe tautala atu lea o Eseta i le tupu, ua ia faapaū foi i luma o ona vae, ma tagi, ma aioi ia te ia, ia faaliliuseina e ia le leaga a Hamanu o lo sa Akakō, ma lana manatu na ia manatu ai i sa Iutā.

⁴Ona faaloaloa mai lea e le tupu o le tootoo auro ia Eseta. Ona tulai ai lea o Eseta, ma tu atu i luma o le tupu, ona ia fai atu lea,

⁵Afai e lelei i le tupu, afai foi ua alofaina a‘u e ia, ma ua tonu lenei mea i le finagalo o le tupu, ma ua fiafia o ia ia te au, ia tusia ina ia liliueseina tusi o le manatu a Hamanu le atalii o Hametatu, o lo sa Akakō, o le na tusi atu ina ia fano sa Iutā, o e o i ai i itu malo uma o le tupu;

⁶auā ou te mafaia faapefea ona ou vaai atu i le leaga o le a oo i lo‘u nuu? Ou te mafaia faapefea ona ou vaai atu i le fanoga o lo‘u aiga?

⁷Ona fai mai lea o le tupu o Asueru i le masiofo o Eseta, ma Moretekai o lo sa Iutā, Faauta, ua ou tuuina atu ia Eseta le fale o Hamanu, ua latou faatautau foi ia te ia i le laau, auā ua na faaoo lona lima i sa Iutā.

⁸Ina tusi foi ia oulua ona o sa Iutā, faitalia oulua se mea e tusi i le igoa o le tupu, ma ia faamaufaailogaina i le mama a le tupu; auā o le tusi ua tusia i le igoa o le tupu, ma faamaufaailogaina i le mama a le tupu e le mafai ona liliueseina.

⁹Ona valaauina lea o e tusiupu a le tupu i lena lava itu aso i le tolu o masina, o le masina lea o Sevana, i lona aso e lua sefulu ma le tolu; ona tusia lea o mea uma e pei ona fai atu ai o Moretekai e avatu i sa Iutā, ma alii sili, ma e pule i nuu, ma alii e pule i itu malo e gata mai i Initia e oo atu i Aitiope, o itu malo e tasi le selau ma le lua sefulu ma le fitu; na tusi atu i lea itu malo ma lea itu malo e tusa ma a latou tusilima, ma lea nuu ma lea nuu e tusa ma a latou gagana, o sa Iutā foi e tusa ma la latou tusilima ma la latou gagana.

¹⁰Ua ia tusi atu foi i le igoa o le tupu o Asueru, ma faamaufaailogaina ai i le mama a le tupu; ona molia atu lea o ia tusi e ua tele vavave e na tietie i solofanua, o e na tietie i manu tele vavave, ma falata, o tama ia a solofanua fafine.

¹¹Auā ua tuuina atu e le tupu i sa Iutā o e ua i lea aai ma lea aai, ia latou potopoto, ma tetee atu ia ola ai i latou; ia faaumatia, ia fasiotia, ma fano o ‘au uma a le nuu ma le itu malo o e faasaua mai ia te i latou, o tama iti atoa ma fafine, ma ia vetea a latou mea,

¹²i le aso e tasi ia fai ai i itu malo uma o le tupu o Asueru, o le aso e tasi le sefulu ma le tolu o le masina e sefulu ma le lua o le masina lea o Atara.

¹³Ua faailoa i nuu uma le tusi na tusia e avatua e fai ma tulafono i itu malo uma, ina ia saunia sa Iutā i lena aso e taui ma sui e ua ita ia te i latou.

¹⁴Ua o atu e ua tele vavave e na tietie manu tele vavave, ma falata, ua faataaliseina, ma faavaveina i le poloaiga a le tupu. Na avatua foi tulafono ai Susana le maota.

¹⁵Ona alu atu lea o Moretekai nai luma o le tupu ua ofu i ofu o tupu, o le ie uli, ma le ie lino sinasina, ma le pale auro tele, ma le ofu talaloa o le ie vavae ma le pāuli. Ua alalaga fiafia foi ma olioli le aai o Susana.

¹⁶Na i ai foi i sa Iutā o le malamalama, ma le olioli, ma le fiafia, ma le mamalu.

¹⁷O mea foi na oo i ai le poloaiga a le tupu ma lana tulafono, i itu malo uma, ma aai uma, ua tupu ai le olioli ma le fiafia i sa Iutā, ua fai foi le tausamiga ma le aso lelei. E toatele foi tagata o le nuu ua fai ma tagata o sa Iutā; auā ua matatau i latou i sa Iutā.