Read Samoan Old Version Bible – O LE TUSI PAIA ESOTO 10 Bible Online

ESOTO 10 - Samoan Old Version Bible – O LE TUSI PAIA bible

ESOTO 10

¹Ua fetalai mai Ieova ia Mose, Ina ulufale atu ia ia Farao, auā ua ou faamaaa i lona loto ma loto o ana auauna, ina ia ou tuuina atu a‘u nei faailoga i ona luma;

²ina ia e ta‘u atu i taliga o lau fanau atoa ma le fanau a lau fanau, o mea na ou faia i Aikupito, ma a‘u faailoga na ou tuuina atu ai ia te i latou, ina ia outou iloa ai, o a‘u lava o Ieova.

³Ona ulufale atu lea o Mose ma Arona ia Farao, ua la fai atu ia te ia, O loo faapea ona fetalai mai o Ieova le Atua o sa Eperū; e te le mafai ea seia afea ona e faamaulalo i o‘u luma? Tuu mai ia lo‘u nuu e o, ina ia latou auauna mai ia te au.

⁴Auā pe afai e te le mafia ona tuu mai o lo‘u nuu e o, faauta, a taeao ou te auina mai ai o sē akerise i lou nuu;

⁵e lilo ai le fogāeleele, e le mafai ai ona iloa le eleele, e ‘aina ai foi toe mea na sao ma totoe mā outou i le uato‘a; e uma foi ona ‘aina o laau uma o loo tutupu mo outou i le fanua.

⁶E tutumu ai foi ou fale, ma fale o au auauna uma lava, atoa ma fale o Akupito uma lava; na le iloa se mea faapea e ou mātua, po o mātua o ou mātua, talu le aso na latou nonofo ai i le nuu e oo i le aso nei. Ona liliu ai lea o ia ua ulufafo atu nai ia Farao.

⁷Ona fai ane lea o auauna a Farao ia te ia, E fai ma mailei lenei tagata ia te i tatou seia afea? Ia e tuu atu ia tagata e o, ina ia latou auauna ia Ieova lo latou Atua; e te le āu silafia ea ua faaumatia Aikupito?

⁸Ona toe faafoisia lea o Mose ma Arona ia Farao, ona fai mai lea o ia ia te i laua, Ina o ia outou, auauna atu ia Ieova lo outou Atua; a o ai ea ma ai tou te o?

⁹Ua tali atu Mose, Matou te o ma o matou taulelea, ma o matou toeaina, ma o matou atalii, ma o matou afafine, matou te o atu foi ma a matou lafu mamoe, atoa ma a matou lafu povi; auā o le a fai lo matou tausamiga ia Ieova.

¹⁰Ona fai mai lea o ia ia te i laua, Ia faapea ona i ai o Ieova ia te outou, pe afai ou te tuuina atu outou e o ma a outou fanau; ia outou, auā o loo lumanai le leaga ia te outou.

¹¹E le faapea lava; o atu ia outou tane, ma auauna ia Ieova, auā o le mea lea na outou mananao i ai. Ona tulia lea o i laua nai luma o Farao.

¹²Ona fetalai mai lea o Ieova ia Mose, Faaloaloa ia lou lima i luga o le laueleele o Aikupito i le sē akerise, ia o ae i luga o le laueleele o Aikupito; e ‘aina ai foi o laau afu uma o le fanua, o mea uma lava ua totoe i le uato‘a.

¹³Ona faaloaloa lea e Mose o lona tootoo i luga o le laueleele o Aikupito, ona faaagi mai lea e Ieova o le matagi mai sasae i le laueleele i lea lava ao uma ma lea lava po uma; ua oo i le taeao, ona au mai ai lea o sē akerise e le matagi mai sasae;

¹⁴ua o ae foi o sē akerise i luga o le laueleele uma lava o Aikupito, ua nonofo foi i nuu uma lava o Aikupito, ua tele lava; sa leai lava anamua ni sē akerise e tusa ma ia sē akerise, e le toe faapea lava.

¹⁵Ua ufitia ai le fogāeleele uma lava, ua faapouliuligia ai foi le nuu; ua ‘aina ai foi o laau afu uma o le nuu, atoa ma fua uma lava o laau na totoe i le uato‘a, e lei toe lava sina lau i se laau po o se laau afu i le fanau i le nuu atoa uma o Aikupito.

¹⁶Ona faataalise lea o Farao ona aami ia Mose ma Arona; na ia fai mai foi i ai, Ua ou agasala ia Ieova lo outou Atua, atoa foi ma oulua;

¹⁷a o lenei, ia aveeseina la‘u agasala, na o lenei lava, ma ia oulua faatoga atu ia Ieova lo outou Atua, ina ia aveeseina e ia ia te au, na o lenei lava mala.

¹⁸Ona alu ese lea o ia ia Farao, ma faatoga atu ai ia Ieova.

¹⁹Ona faaliliuina lea e Ieova o le matagi mai sisifo e malosi lava, ua siitia ai o sē akerise, ma lafoia i le sami Ulaula; ona le toe ai lea o se sē akerise e tasi i le nuu uma lava o Aikupito.

²⁰A ua faamaaaina e Ieova le loto o Farao, e le tuuina mai lava le fanauga a Isaraelu e o.

²¹Ona fetalai mai lea o Ieova ia Mose, Ina faaloaloa ia lou lima i le lagi, ina ia pouliuli le nuu o Aikupito, o le pouliuli e mafai ona tagofia.

²²Ona faaloaloa lea e Mose o lona lima i le lagi, ona pouliuli tele lava lea o le nuu atoa uma o Aikupito, e tolu aso.

²³Ua le feiloai i latou, e lei tulai se tagata i le mea sa nofo ai, e tolu aso; a o le fanauga uma lava a Isaraelu, ua malamalama mea uma sa latou nonofo ai.

²⁴Ona valaau mai lea o Farao ia Mose, ma ia fai mai, Ina o ia outou, tou te auauna ia Ieova; ma o outou lafu mamoe ma o outou lafu povi tuu pea ia, a e tou o ma a outou fanau.

²⁵A ua tali atu Mose, Ia e tuu mai foi ia i matou o taulaga ma taulaga mu, ina ia matou osi taulaga ai ia Ieova lo matou Atua;

²⁶e ave lava a matou manu, e le tuuna se atigivae e tasi; auā o mea ia e ave matou te auauna ai ia Ieova lo matou Atua, matou te le iloa foi mea matou te auauna ai ia Ieova seia matou oo atu ai.

²⁷A ua faamaaa e Ieova le loto o Farao, e le mafia foi o ia ona tuuina mai o i latou e o.

²⁸Ona fai mai lea o Farao ia te ia, Alu ese ia oe ia te au, ia oe lava, ne‘i ta toe feiloai ma oe; aua o le aso ta te feiloai ia ma oe, e te oti ai lava.

²⁹Ona tali atu lea o Mose, E moni lava lau fetalaiga, ta te le toe feiloai ma oe.